ಒಲಿಂಪಿಕ್ಸ್​ ಟಿ20 ಕ್ರಿಕೆಟ್ ಅರ್ಹತೆ​ ಮಾನದಂಡ ಪ್ರಕಟಿಸಿದ ಐಸಿಸಿ: ಭಾರತ ಮಹಿಳೆಯರಿಗೆ ಪ್ರವೇಶ ಖಚಿತ; ಪುರುಷರಿಗೂ ಬಹುತೇಕ ಖಾತ್ರಿ!

ಮಹಿಳಾ ವಿಭಾಗದಲ್ಲಿ ಭಾರತದೊಂದಿಗೆ ಆಸ್ಟ್ರೆಲಿಯಾ, ಬ್ರಿಟನ್​ (ಇಂಗ್ಲೆಂಡ್​), ದಣ ಆಫ್ರಿಕಾ ತಂಡಗಳು ಏಷ್ಯಾ, ಒಶಿಯಾನಿಯಾ, ಯುರೋಪ್​ ಮತ್ತು ಆಫ್ರಿಕಾದ ಅಗ್ರ ತಂಡಗಳಾಗಿ ಅರ್ಹತೆ ಗಳಿಸಿವೆ. ಭಾರತ ಮಹಿಳಾ ತಂಡ ಸೆಮಿಫೈನಲ್​ಗೇರಲು ವಿಫಲವಾದ ನಡುವೆಯೂ ಒಲಿಂಪಿಕ್ಸ್​ ಅರ್ಹತೆ ಒಲಿಸಿಕೊಂಡಿರುವುದು ಗಮನಾರ್ಹವೆನಿಸಿದೆ.

ಪುರುಷರ ವಿಭಾಗದಲ್ಲಿ ಐಸಿಸಿ ರ್ಯಾಂಕಿಂಗ್​ನಲ್ಲಿ ಪ್ರತಿ ಖಂಡದ ಅಗ್ರ ತಂಡಕ್ಕೆ ಒಲಿಂಪಿಕ್ಸ್​ ಅರ್ಹತೆ ನೀಡಲಾಗುತ್ತದೆ. ಇದಕ್ಕೆ ಅಂತಿಮ ಗುಡುವು ಡಿಸೆಂಬರ್​ 31 ಆಗಿದೆ. ಭಾರತ ಪುರುಷರ ತಂಡ ಐಸಿಸಿ ರ್ಯಾಂಕಿಂಗ್​ನಲ್ಲಿ ಸದ್ಯ ಅಗ್ರಸ್ಥಾನದಲ್ಲಿದ್ದು, 6ನೇ ಸ್ಥಾನದಲ್ಲಿರುವ ಪಾಕಿಸ್ತಾನ ಸಮೀಪದಲ್ಲಿರುವ ಏಷ್ಯಾದ ತಂಡವಾಗಿದೆ. ಭಾರತ-ಪಾಕ್​ ನಡುವೆ 32 ಅಂಕಗಳ ಅಂತರವಿದೆ. ಹೀಗಾಗಿ ಪುರುಷರ ವಿಭಾಗದಲ್ಲೂ ಭಾರತಕ್ಕೆ ಒಲಿಂಪಿಕ್ಸ್​ ಅರ್ಹತೆ ಬಹುತೇಕ ಖಚಿತ ಎನ್ನಬಹುದು.

ಒಲಿಂಪಿಕ್ಸ್​ನಲ್ಲಿ ಸ್ಪರ್ಧಿಸುವ 6ನೇ ತಂಡವನ್ನು ಗ್ಲೋಬಲ್​ ಅರ್ಹತಾ ಟೂರ್ನಿಯ ಮೂಲಕ ಆರಿಸಲಾಗುತ್ತದೆ. ಇದರಲ್ಲಿ ಐಸಿಸಿ ರ್ಯಾಂಕಿಂಗ್​ನಲ್ಲಿ, ಮೊದಲೇ ಅರ್ಹತೆ ಪಡೆದಿರದ ಅಗ್ರ 8 ತಂಡಗಳು ಭಾಗವಹಿಸಲಿವೆ. ಇದರಲ್ಲಿ ಒಂದು ಖಂಡದಿಂದ ಇಷ್ಟೇ ತಂಡ ಭಾಗವಹಿಸಬೇಕು ಎಂಬ ಮಿತಿ ಇರುವುದಿಲ್ಲ.

ಪುರುಷರ ಮತ್ತು ಮಹಿಳಾ ವಿಭಾಗದಲ್ಲಿ ತಲಾ 6 ತಂಡಗಳು ಒಲಿಂಪಿಕ್ಸ್​ ಪದಕ ಸ್ಪರ್ಧೆಯಲ್ಲಿ ಭಾಗವಹಿಸಲಿವೆ. ಈ 6 ತಂಡಗಳನ್ನು ತಲಾ 3ರಂತೆ 2 ಗುಂಪುಗಳಲ್ಲಿ ವಿಂಗಡಿಸಲಾಗುತ್ತದೆ. ಗುಂಪಿನ ರೌಂಡ್​ ರಾಬಿನ್​ ಬಳಿಕ ಇನ್ನೊಂದು ಗುಂಪಿನಲ್ಲಿರುವ, ಸಮಾನ ಸ್ಥಾನ ಪಡೆದಿರದ 2 ತಂಡಗಳ ವಿರುದ್ಧ ತಲಾ 1 ಪಂದ್ಯ ಆಡಲಾಗುತ್ತದೆ. ಅಂತಿಮವಾಗಿ ಅಗ್ರ 2 ತಂಡಗಳು ಸ್ವರ್ಣ ಪದಕಕ್ಕೆ ಸೆಣಸಲಿವೆ. 3-4ನೇ ಸ್ಥಾನಿ ತಂಡಗಳು ಕಂಚಿಗೆ ಹೋರಾಡಲಿವೆ. ಪದಕ ಸ್ಪರ್ಧೆಗೆ ಮುನ್ನ ಎಲ್ಲ ತಂಡಗಳಿಗೆ ತಲಾ 4 ಪಂದ್ಯ ಆಡುವ ಅವಕಾಶ ಲಭಿಸಲಿದೆ. ಪುರುಷ-ಮಹಿಳಾ ವಿಭಾಗದಲ್ಲಿ ತಲಾ 14 ಪಂದ್ಯಗಳು ನಡೆಯಲಿವೆ ಎಂದು ಐಸಿಸಿ ತಿಳಿಸಿದೆ.

ಆತಿಥೇಯ ಅಮೆರಿಕದ ತಂಡಗಳು ಪುರುಷ-ಮಹಿಳಾ ವಿಭಾಗದ ಐಸಿಸಿ ರ್ಯಾಂಕಿಂಗ್​ನಲ್ಲಿ ಡಿ.31ರ ವೇಳೆಗೆ ಅಗ್ರ 15ರೊಳಗಿದ್ದರೆ ಮಾತ್ರ ನೇರಪ್ರವೇಶ ನೀಡಲಾಗುತ್ತದೆ ಎಂದು ಐಸಿಸಿ ಷರತ್ತು ವಿಧಿಸಿದೆ. ಅಮೆರಿಕ ಪುರುಷರ ತಂಡ ಸದ್ಯ 13ನೇ ಸ್ಥಾನದಲ್ಲಿದ್ದರೆ, ಮಹಿಳಾ ತಂಡ 20ನೇ ಸ್ಥಾನದಲ್ಲಿದೆ. ಹೀಗಾಗಿ ಮಹಿಳೆಯರು ಇನ್ನೂ 5 ಸ್ಥಾನ ಬಡ್ತಿ ಪಡೆದರಷ್ಟೇ ಒಲಿಂಪಿಕ್ಸ್​ನಲ್ಲಿ ಸ್ಪರ್ಧಿಸಲಿದ್ದಾರೆ.

ವೆಸ್ಟ್​ ಇಂಡೀಸ್​ ತಂಡ ಹಾಲಿ ಮಹಿಳಾ ಟಿ20 ವಿಶ್ವಕಪ್​ನಲ್ಲಿ ಸೆಮಿಫೈನಲ್​ಗೇರಿದೆ. ಆದರೆ ಇದು ಕ್ರಿಕೆಟ್​ನಲ್ಲಿ ಕೆರಿಬಿಯನ್​ ದ್ವೀಪರಾಷ್ಟ್ರಗಳ ಸಮೂಹ ತಂಡವಾಗಿ ಭಾಗವಹಿಸಿದರೆ, ಒಲಿಂಪಿಕ್ಸ್​ನಲ್ಲಿ ದೇಶದ ತಂಡಗಳಿಗಷ್ಟೇ ಪ್ರವೇಶ ನೀಡಲಾಗುತ್ತದೆ. ಹೀಗಾಗಿ ವೆಸ್ಟ್​ ಇಂಡೀಸ್​ ತಂಡವಾಗಿ ಒಲಿಂಪಿಕ್ಸ್​ನಲ್ಲಿ ಭಾಗವಹಿಸಲು ಅವಕಾಶವಿಲ್ಲ. ಇದರಿಂದ ಐಸಿಸಿಯು, ಆಂಟಿಗಾ, ಜಮೈಕಾ, ಗ್ರೆನೇಡ, ಗಯಾನಾ, ಸೇಂಟ್​ ಕಿಟ್ಸ್​, ಬಾರ್ಬಡೋಸ್​ ಸೇರಿದಂತೆ ಕೆರಿಬಿಯನ್​ ದ್ವೀಪರಾಷ್ಟ್ರಗಳಿಗೆ ಪ್ರತ್ಯೇಕ ಅರ್ಹತಾ ಟೂರ್ನಿಯನ್ನು ಆಯೋಜಿಸಲಿದೆ. ಇದರಲ್ಲಿ ಗೆದ್ದ ಗ್ಲೋಬಲ್​ ಅರ್ಹತಾ ಟೂರ್ನಿಯಲ್ಲಿ ಭಾಗವಹಿಸಬೇಕಾಗುತ್ತದೆ. ಪುರುಷರ ವಿಭಾಗದಲ್ಲೂ ವೆಸ್ಟ್​ ಇಂಡೀಸ್​ ಐಸಿಸಿ ರ್ಯಾಂಕಿಂಗ್​ನ ಅಗ್ರ 8 ತಂಡಗಳಲ್ಲಿ ಒಂದಾಗಿದ್ದರೆ, ಗ್ಲೋಬಲ್​ ಅರ್ಹತಾ ಟೂರ್ನಿಗೆ ಕೆರಿಬಿಯನ್​ ಅರ್ಹತಾ ಟೂರ್ನಿಯಿಂದ ತನ್ನ ಪ್ರತಿನಿಧಿಯನ್ನು ಆರಿಸಬಹುದಾಗಿದೆ.