Cricket Records: ಬೌಂಡರಿಗಳ ಸುನಾಮಿ, ಸಿಕ್ಸರ್‌ಗಳ ಅಬ್ಬರ: 50 ಓವರ್‌ಗಳಲ್ಲಿ 822 ರನ್ ಸಿಡಿಸಿ ಸ್ಕಾರ್ಪಿಯನ್ಸ್ ವಿಶ್ವದಾಖಲೆ!

ಸ್ಕಾರ್ಪಿಯನ್ಸ್ ಕ್ರಿಕೆಟ್ ಕ್ಲಬ್ ಮತ್ತು ಮೀಥೇನ್ ಲಯನ್ಸ್ ತಂಡಗಳ ನಡುವೆ ನಡೆದ ಈ ಪಂದ್ಯವು ಶುದ್ಧ ಬ್ಯಾಟಿಂಗ್ ಕಗ್ಗೊಲೆಗೆ ಸಾಕ್ಷಿಯಾಯಿತು. ಟಾಸ್ ಗೆದ್ದ ಸ್ಕಾರ್ಪಿಯನ್ಸ್ ತಂಡದ ನಾಯಕಿ ಪ್ರೈಸ್ ಮಕಾಜಾ ಮೊದಲು ಬ್ಯಾಟಿಂಗ್ ಮಾಡುವ ನಿರ್ಧಾರ ಕೈಗೊಂಡರು. ಆರಂಭದಿಂದಲೇ ಅಬ್ಬರಿಸಿದ ಸ್ಕಾರ್ಪಿಯನ್ಸ್ ಬ್ಯಾಟರ್‌ಗಳು ಎದುರಾಳಿ ಬೌಲರ್‌ಗಳನ್ನು ದಂಡಿಸಲು ಆರಂಭಿಸಿದರು. ನಿಗದಿತ 50 ಓವರ್‌ಗಳಲ್ಲಿ ಈ ತಂಡವು ಕೇವಲ 4 ವಿಕೆಟ್ ನಷ್ಟಕ್ಕೆ 822 ರನ್‌ಗಳ ಬೃಹತ್ ಮೊತ್ತವನ್ನು ಪೇರಿಸಿತು.

ಈ ಐತಿಹಾಸಿಕ ಮೊತ್ತಕ್ಕೆ ಪ್ರಮುಖ ಕಾರಣಕರ್ತರಾಗಿದ್ದು ಬ್ಯಾಟರ್ ಟಕುಂಡಾ ಮಡೆಂಬೊ. ಕೇವಲ 143 ಎಸೆತಗಳನ್ನು ಎದುರಿಸಿದ ಮಡೆಂಬೊ, ಬರೋಬ್ಬರಿ 50 ಬೌಂಡರಿ ಹಾಗೂ 7 ಸಿಕ್ಸರ್‌ಗಳ ನೆರವಿನಿಂದ 302 ರನ್ ಸಿಡಿಸಿ ಅಜೇಯರಾಗುಳಿದರು. ಅಂದರೆ, ಅವರು ಕೇವಲ ಬೌಂಡರಿ ಮತ್ತು ಸಿಕ್ಸರ್‌ಗಳ ಮೂಲಕವೇ 242 ರನ್‌ಗಳನ್ನು ಕಲೆಹಾಕಿದ್ದರು! ಇಡೀ ಇನ್ನಿಂಗ್ಸ್‌ನಲ್ಲಿ ಸ್ಕಾರ್ಪಿಯನ್ಸ್ ತಂಡವು ಪ್ರತಿ ಓವರ್‌ಗೆ 16.44 ರನ್ ಸರಾಸರಿಯಲ್ಲಿ ರನ್ ಗಳಿಸಿದ್ದು ಮತ್ತೊಂದು ವಿಶೇಷ.

823 ರನ್‌ಗಳ ಹಿಮಾಲಯದಂತಹ ಗುರಿಯನ್ನು ಬೆನ್ನಟ್ಟಿದ ಮೀಥೇನ್ ಲಯನ್ಸ್ ತಂಡವು ಸ್ಕಾರ್ಪಿಯನ್ಸ್ ನೀಡಿದ ಆಘಾತದಿಂದ ಚೇತರಿಸಿಕೊಳ್ಳಲೇ ಇಲ್ಲ. ಮೊದಲ ಇನ್ನಿಂಗ್ಸ್‌ನಲ್ಲಿ ಬ್ಯಾಟಿಂಗ್ ಸ್ವರ್ಗದಂತಿದ್ದ ಪಿಚ್, ಎರಡನೇ ಇನ್ನಿಂಗ್ಸ್‌ನಲ್ಲಿ ಲಯನ್ಸ್ ಪಾಲಿಗೆ ನರಕವಾಗಿ ಮಾರ್ಪಟ್ಟಿತು. ಲಯನ್ಸ್ ತಂಡದ ಬ್ಯಾಟರ್‌ಗಳು ಪೆವಿಲಿಯನ್‌ಗೆ ಪರೇಡ್ ನಡೆಸಿದರು. ಅಂತಿಮವಾಗಿ ಕೇವಲ 28 ರನ್‌ಗಳಿಗೆ 7 ವಿಕೆಟ್ ಕಳೆದುಕೊಂಡ ಲಯನ್ಸ್ ತಂಡವು 794 ರನ್‌ಗಳ ಅಂತರದ ಹೀನಾಯ ಸೋಲನ್ನು ಒಪ್ಪಿಕೊಂಡಿತು.

ಈ ಪಂದ್ಯಕ್ಕೂ ಮೊದಲು ಕ್ರಿಕೆಟ್ ಇತಿಹಾಸದಲ್ಲಿ ಕೆಲವು ಬೃಹತ್ ಮೊತ್ತಗಳು ದಾಖಲಾಗಿದ್ದವು.

ಬಿಹಾರ: ವಿಜಯ ಹಜಾರೆ ಟ್ರೋಫಿಯಲ್ಲಿ ಅರುಣಾಚಲ ಪ್ರದೇಶ ವಿರುದ್ಧ 574/6 ರನ್ ಗಳಿಸಿತ್ತು.

ತಮಿಳುನಾಡು: 2022ರಲ್ಲಿ ಅರುಣಾಚಲ ಪ್ರದೇಶ ವಿರುದ್ಧ 506/2 ರನ್ ಕಲೆಹಾಕಿತ್ತು.

ಇಂಗ್ಲೆಂಡ್: ನೆದರ್ಲ್ಯಾಂಡ್ಸ್ ವಿರುದ್ಧ ಏಕದಿನ ಪಂದ್ಯದಲ್ಲಿ 498/4 ರನ್ ಗಳಿಸಿರುವುದು ಅಂತರಾಷ್ಟ್ರೀಯ ದಾಖಲೆಯಾಗಿದೆ.

ಆದರೆ, ಸ್ಕಾರ್ಪಿಯನ್ಸ್ ತಂಡದ ಈ 822 ರನ್‌ಗಳ ಸ್ಕೋರ್ ಈ ಎಲ್ಲಾ ದಾಖಲೆಗಳನ್ನು ನಗಣ್ಯವಾಗಿಸಿದೆ. ಇದು ಅಧಿಕೃತ ಕ್ರಿಕೆಟ್‌ನಲ್ಲಿ ದಾಖಲಾದ ಅತ್ಯಂತ ಗರಿಷ್ಠ ಮೊತ್ತಗಳಲ್ಲಿ ಒಂದಾಗಿ ಇತಿಹಾಸದ ಪುಟ ಸೇರಿದೆ,(ಏಜೆನ್ಸೀಸ್​).