ಚಿನ್ನಸ್ವಾಮಿ ಸ್ಟೇಡಿಯಂ ಅನುಭವ ಬೇರೆಲ್ಲೂ ಸಿಗದು; ಆರ್​ಸಿಬಿ ಬ್ಯಾಟರ್​ ದೇವದತ್​ ಪಡಿಕ್ಕಲ್​ ಅಭಿಮತ

ನಮ್ಮ ಹೊಸ ತವರು ಮೈದಾನವಾಗಿರುವ ರಾಯ್ಪುರದಲ್ಲಿ ಎಲ್ಲರೂ ಐಪಿಎಲ್​ ಪಂದ್ಯ ನೋಡಲು ಕಾತರಗೊಂಡಿದ್ದರು. ಬಸ್​ನಲ್ಲಿ ಸ್ಟೇಡಿಯಂಗೆ ಹೋಗುವಾಗ ಜನರ ಖುಷಿಯನ್ನು ನೋಡಿದೆವು. ಅವರ ಉತ್ಸಾಹ, ಪ್ರೋತ್ಸಾಹ ನಮಗೂ ಉತ್ತೇಜನ ತುಂಬಿತು. ಇದರಿಂದ ನಮಗೂ ತವರಿನ ಪಂದ್ಯವನ್ನೇ ಆಡುತ್ತಿರುವ ಭಾವನೆ ಬಂದಿತು. ಆದರೆ ರಾಯ್ಪುರಕ್ಕೂ, ಬೆಂಗಳೂರಿನ ಮೈದಾನಕ್ಕೂ ತುಂಬ ವ್ಯತ್ಯಾಸಗಳಿವೆ. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಆಡುವುದು ಸಂಪೂರ್ಣ ಭಿನ್ನ ಅನುಭವ. ಬೇರೆ ಎಲ್ಲೂ ಆ ಅನುಭವ ಸಿಗದು ಎಂದು ಐಪಿಎಲ್​ ಹಾಲಿ ಚಾಂಪಿಯನ್​ ಆರ್​ಸಿಬಿ (RCB) ತಂಡದಲ್ಲಿರುವ ಏಕೈಕ ಕನ್ನಡಿಗ ಹಾಗೂ ಎಡಗೈ ಬ್ಯಾಟರ್​ ದೇವದತ್​ ಪಡಿಕ್ಕಲ್​ (devdutt padikkal) ಹೇಳಿದರು.

ಎರಡನೇ ತವರು ಮೈದಾನದಲ್ಲಿ ಮೊದಲ ಪಂದ್ಯ ಆಡಿ ಗೆದ್ದ ಬಳಿಕ ನಡೆದ ರಾಜ್ಯದ ಆಯ್ದ ಪತ್ರಕರ್ತರ ಜತೆಗಿನ ಸಂವಾದದಲ್ಲಿ ಮಾತನಾಡಿದ ಪಡಿಕ್ಕಲ್​, ಇಲ್ಲಿನ ಪಿಚ್​ ನಮಗೂ ಹೊಸದಾಗಿತ್ತು. ಹೇಗೆ ವರ್ತಿಸುತ್ತದೆ ಎಂದು ಗೊತ್ತಿರಲಿಲ್ಲ. ಇಲ್ಲಿ ಜಾಸ್ತಿ ಪಂದ್ಯ ನಡೆದಿಲ್ಲ. ಆದರೆ ನಾವು ಉತ್ತಮವಾಗಿಯೇ ಇಲ್ಲಿಗೆ ಹೊಂದಿಕೊಂಡಿದ್ದೇವೆ. ಮುಂದಿನ ಪಂದ್ಯದಲ್ಲೂ ಇದೇ ರೀತಿಯ ಆಟವಾಡಿದರೆ ಇನ್ನೊಂದು ಗೆಲುವು ಸಿಗಬಹುದು ಎಂದರು. 

ಆರ್​ಸಿಬಿ ತಂಡಕ್ಕೆ ಎಲ್ಲೇ ಹೋದರೂ ಉತ್ತಮ ಬೆಂಬಲ ಸಿಗುತ್ತದೆ. ಸ್ಟೇಡಿಯಂ ತುಂಬಿರುತ್ತದೆ. ಮುಂಬೈ, ಗುವಾಹಟಿಯಲ್ಲೂ ಆರ್​ಸಿಬಿ ತಂಡಕ್ಕೆ ತುಂಬ ಬೆಂಬಲ ಲಭಿಸಿತ್ತು. ಹೀಗಾಗಿ ರಾಯ್ಪುರದಲ್ಲೂ ನಮಗೆ ಸಿಕ್ಕ ಬೆಂಬಲ ಅಚ್ಚರಿ ತರಲಿಲ್ಲ ಎಂದು ಪಡಿಕ್ಕಲ್​ ವಿವರಿಸಿದರು.

ಆರ್​ಸಿಬಿ ತಂಡ ಕಳೆದ ವರ್ಷ ಟ್ರೋಫಿ ಗೆದ್ದ ಬಳಿಕ ಆಟಗಾರರಿಗೆ ದೊಡ್ಡ ನಿರಾಳತೆಯೊಂದು ಸಿಕ್ಕಿದೆ. ಇದರ ಹೊರತಾಗಿ, ಚಾಂಪಿಯನ್​ ಆದ ಬಳಿಕ ತಂಡದ ಮನೋಭಾವದಲ್ಲಿ ದೊಡ್ಡ ಬದಲಾವಣೆ ಏನೂ ಆಗಿಲ್ಲ ಎಂದು ಪಡಿಕ್ಕಲ್​ ಹೇಳಿದರು.

ನಾನು ಹಿಂದೆ ಮೊದಲ ಎಸೆತದಿಂದಲೇ ಆಕ್ರಮಣಕ್ಕಿಳಿಯವ ಬ್ಯಾಟರ್​ ಆಗಿರಲಿಲ್ಲ. ಮೊದಲ 10 ಎಸೆತಗಳನ್ನು ಎಚ್ಚರಿಕೆಯಿಂದ ಆಡುತ್ತಿದ್ದೆ. ಆದರೆ ಈಗ ಟಿ20 ಕ್ರಿಕೆಟ್​ನಲ್ಲಿ ಆಟ ಬದಲಾಯಿಸಿದ್ದು, ಆರಂಭದಿಂದಲೇ ಆಕ್ರಮಣಕ್ಕಿಳಿಯುತ್ತಿರುವೆ. ತಂಡ ಹಿತದೃಷ್ಟಿಯಿಂದಲೂ ಇದು ಅಗತ್ಯವೆನಿಸಿದೆ. ಯಾಕೆಂದರೆ ಈಗ 200 ಪ್ಲಸ್​ ಮೊತ್ತವೂ ಸುರತವೆನಿಸಿಲ್ಲ. ಇನ್ನು ಕರ್ನಾಟಕ ತಂಡದ ನಾಯಕತ್ವ ಸಿಕ್ಕ ಬಳಿಕ ನಾನು ಆಟವನ್ನು ನೋಡುವ ರೀತಿಯೂ ಬದಲಾಗಿದೆ. ನಾಯಕನಾಗಿ ಆಟದ ಎಲ್ಲ ಆಯಾಮವನ್ನೂ ಯೋಚಿಸುತ್ತಿರಬೇಕಾಗುತ್ತದೆ. ಇದು ಕೇವಲ ಬ್ಯಾಟರ್​ ಆಗಿ ಅಡುವಾಗಲೂ ನನ್ನ ಮನೋಭಾವವನ್ನು ಬದಲಾಯಿಸಿದೆ. ಎದುರಾಳಿ ಹೇಗೆ ಆಲೋಚಿಸುತ್ತಿರುತ್ತಾರೆ ಎಂಬ ಕಡೆಗೂ ಗಮನಕೊಡುತ್ತೇನೆ. ಭಿನ್ನ ಆಟಗಾರರ ಮನಸ್ಥಿತಿಯನ್ನು ಅರ್ಥಮಾಡಿಕೊಳ್ಳಲು ಪ್ರಯತ್ನಿಸುತ್ತಿರುತ್ತೇನೆ. ಇದು ಬೌಲರ್​ಗಳನ್ನು ಎದುರಿಸುವ ಹೊಸ ಯೋಜನೆಗಳನ್ನು ನೀಡುತ್ತದೆ ಎಂದು ಪಡಿಕ್ಕಲ್​, ತನ್ನ ಬದಲಾದ ಬ್ಯಾಟಿಂಗ್​ ಶೈಲಿ ಮತ್ತು ರಾಜ್ಯ ತಂಡದ ನಾಯಕತ್ವ ಸಿಕ್ಕ ನಂತರದ ಲಾಭವನ್ನು ವಿವರಿಸಿದರು. 

ಈ ಬಾರಿ ಐಪಿಎಲ್​ನಲ್ಲಿ ಕರ್ನಾಟಕದ 10 ಕ್ರಿಕೆಟಿಗರು ವಿವಿಧ ತಂಡಗಳಲ್ಲಿದ್ದರೂ, ಕೆಲವರಷ್ಟೇ ಆಡುವ 11ರ ಬಳಗದಲ್ಲಿ (ಪಡಿಕ್ಕಲ್​, ರಾಹುಲ್​) ಕಾಯಂ ಸ್ಥಾನ ಪಡೆಯುತ್ತಿರುವ ಬಗೆಗಿನ ಪ್ರಶ್ನೆಗೆ ಉತ್ತರಿಸಿದ ರಾಜ್ಯ ತಂಡದ ನಾಯಕ ದೇವದತ್​ ಪಡಿಕ್ಕಲ್​, ರಾಜ್ಯದ 10 ಆಟಗಾರರು ಐಪಿಎಲ್​ನಲ್ಲಿರುವುದೇ ದೊಡ್ಡ ವಿಷಯ. ಕಳೆದ ಒಂದೆರಡು ವರ್ಷಗಳಲ್ಲಿ ದೇಶೀಯ ಟಿ20 ಟೂರ್ನಿಗಳಲ್ಲಿ (ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿ) ನಮ್ಮ ತಂಡ ಅಷ್ಟೇನೂ ಉತ್ತಮವಾಗಿ ಆಡಿಲ್ಲ. ಕಳೆದ ಬಾರಿ ನಾಕೌಟ್​ಗೂ ಅರ್ಹತೆ ಪಡೆಯಲಿಲ್ಲ. ನಮ್ಮ ಎಲ್ಲ 10 ಆಟಗಾರರು ಆಡದಿದ್ದರೂ, ಅವರು ಅನುಭವ ಪಡೆಯಲಿದ್ದಾರೆ. ಇದು ಮುಂದಿನ ಋತುವಿನಲ್ಲಿ ಅವರಿಗೆ ಇನ್ನಷ್ಟು ಉತ್ತಮ ನಿರ್ವಹಣೆ ತೋರಲು ನೆರವಾಗಲಿದೆ. ಇದರಿಂದ ಮುಂದಿನ ಐಪಿಎಲ್​ನಲ್ಲಿ ರಾಜ್ಯದಿಂದ ಇನ್ನಷ್ಟು ಆಟಗಾರರು ಅವಕಾಶವನ್ನೂ ಪಡೆಯಬಹುದು ಮತ್ತು ಆಡುವ 11ರ ಬಳಗದಲ್ಲೂ ಸ್ಥಾನ ಗಳಿಸಬಹುದು ಎಂದರು.

ಟಿ20 ಕ್ರಿಕೆಟ್​ನಲ್ಲಿ ಸ್ಥಿರ ನಿರ್ವಹಣೆಗಿಂತ ಆಯಾ ಪಂದ್ಯದ ಪರಿಸ್ಥಿತಿಗೆ ತಕ್ಕಂತೆ ಇಂಪ್ಯಾಕ್ಟ್​ ಮಾಡುವುದೇ ಮುಖ್ಯವಾಗಿರುತ್ತದೆ. ರನ್​ ಪ್ರಕಾರದಲ್ಲಿ ಐಪಿಎಲ್​ನಲ್ಲಿ ಸ್ಥಿರ ನಿರ್ವಹಣೆ ತೋರಿಸಿರುವ ಆಟಗಾರರು ಕಡಿಮೆ. ತಂಡದಲ್ಲಿ ನಮಗೆ ಸಿಕ್ಕಿರುವ ಪಾತ್ರವನ್ನು ಸಮರ್ಥವಾಗಿ ನಿಭಾಯಿಸಬೇಕಾಗಿರುತ್ತದೆ. ನಾನು ಪವರ್​ಪ್ಲೇನಲ್ಲಿ ಕ್ರೀಸ್​ಗೆ ಇಳಿದರೆ ಬಿರುಸಿನ ಆಟವಾಡಿ ರನ್​ಗತಿ ಏರಿಸಬೇಕಾಗಿರುತ್ತದೆ. ಆಗ ಚೆಂಡನ್ನು ನೋಡಿ ಹೊಡೆಯುವುದಷ್ಟೇ ನನ್ನ ಸರಳ ಕಾರ್ಯತಂತ್ರವಾಗಿರುತ್ತದೆ ಎಂದು ಪಡಿಕ್ಕಲ್​, ಆರ್​ಸಿಬಿ ತಂಡದಲ್ಲಿ ತನಗೆ ನೀಡಲಾಗಿರುವ ಪಾತ್ರದ ಬಗ್ಗೆ ವಿವರಿಸಿದರು. 

ಟೂರ್ನಿಯಲ್ಲಿ ಇದುವರೆಗೆ ನಡೆದ ಪಂದ್ಯಗಳಲ್ಲಿ ಮುಂಬೈ ಎದುರು ಇಲ್ಲಿ ಸಿಕ್ಕ ಗೆಲುವೇ ವಿಶೇಷವಾಗಿತ್ತು. ಯಾಕೆಂದರೆ ಲಾಸ್ಟ್​ ಬಾಲ್​ ವಿಕ್ಟರಿ ಯಾವಾಗಲೂ ವಿಶೇಷವಾಗಿರುತ್ತದೆ. ಪಿಚ್​ ಸವಾಲಿನಿಂದ ಕೂಡಿತ್ತು. ಹೊಸ ಚೆಂಡನ್ನು ಎದುರಿಸುವುದು ಸುಲಭವಾಗಿರಲಿಲ್ಲ. ಕೃನಾಲ್​ ಪಾಂಡ್ಯ ಸಾಮರ್ಥ್ಯ ನಮಗೆಲ್ಲರಿಗೂ ತಿಳಿದಿದೆ. ಬೇಗನೆ ವಿಕೆಟ್​ಗಳು ಬಿದ್ದಾಗ ಅವರನ್ನು ಬೇಗನೆ ಕಣಕ್ಕಿಳಿಸುವುದೇ ತಂಡದ ಕಾರ್ಯತಂತ್ರವಾಗಿದೆ. ಕೃನಾಲ್​ ಔಟಾದ ನಂತರವೂ ಗೆಲ್ಲುವ ಭರವಸೆ ಇತ್ತು. ಆದರೆ ಭುವನೇಶ್ವರ್​ ಎದುರಿಸಿದ ಮೊದಲ ಎಸೆತದಲ್ಲೇ ಸಿಕ್ಸರ್​ ಸಿಡಿಸಿದ್ದು ಅಮೋವಾಗಿತ್ತು. ಟೂರ್ನಿಯ ಈ ಹಂತದಲ್ಲಿ ಇದೊಂದು ಪ್ರಮುಖ ಗೆಲುವಾಗಿದೆ. ಇನ್ನೂ 2 ಪಂದ್ಯಗಳನ್ನು ಗೆದ್ದು, ಅಗ್ರ 2ರಲ್ಲಿ ಸ್ಥಾನ ಪಡೆಯುವ ಗುರಿ ಇದೆ ಎಂದು ಪಡಿಕ್ಕಲ್​, ಹೊಸ ತವರಿನ ಮೊದಲ ಪಂದ್ಯದ ಗೆಲುವಿನ ಬಗ್ಗೆ ಹೇಳಿದರು.