ಪ್ಲೇಆಫ್​ಗೆ 3 ತಂಡಗಳು ಫಿಕ್ಸ್​! SRH ಎದುರು ಸೋತರೂ ಅಗ್ರ 4ನೇ ಸ್ಥಾನಕ್ಕೇರಲು ಸಿಎಸ್​ಕೆಗಿದೆ ಚಾನ್ಸ್​; ಹೀಗಿದೆ ಲೆಕ್ಕಾಚಾರ

IPL Playoffs: ನಿನ್ನೆ (ಮೇ.18) ಚೆಪಾಕ್​ ಕ್ರೀಡಾಂಗಣದಲ್ಲಿ ಸನ್​ರೈಸರ್ಸ್​ ಹೈದರಾಬಾದ್ ಎದುರು 5 ವಿಕೆಟ್​ಗಳ ಹೀನಾಯ ಸೋಲಿನಿಂದ ಪ್ಲೇಆಫ್​ ಪ್ರವೇಶಿಸುವ ಸುಲಭ ಅವಕಾಶವನ್ನು ಕೈಚೆಲ್ಲಿದ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಕ್ರಿಕೆಟ್​ ಪ್ರಿಯರು ಭಾರೀ ಬೇಸರ ಹೊರಹಾಕಿದ್ದಾರೆ. 

ನಿರ್ಣಾಯಕ ಪಂದ್ಯದಲ್ಲಿ ಕಡೆಗೂ ಸಿಎಸ್​ಕೆ ಸೋಲಿನ ಹಾದಿ ಹಿಡಿಯುವ ಮೂಲಕ ಪ್ಲೇಆಫ್​ ರೇಸ್​ನಿಂದ ದೂರ ಸರಿಯಿತು. ಇಶಾನ್ ಕಿಶನ್​ ಮತ್ತು ಹೆನ್ರಿಚ್​ ಕ್ಲಾಸೆನ್​ ಅವರ ಅಮೋಘ ಬ್ಯಾಟಿಂಗ್ ಪ್ರದರ್ಶನದಿಂದ ಸಿಎಸ್​ಕೆ ನೀಡಿದ್ದ 181 ರನ್​ಗಳ ಗುರಿಯನ್ನು ಎಸ್​ಆರ್​ಎಚ್ ಸುಲಭವಾಗಿ ತಲುಪಿ, ಅಂಕಪಟ್ಟಿಯ ಅಗ್ರ ನಾಲ್ಕರಲ್ಲಿ ತಮ್ಮ ಸ್ಥಾನ ಭದ್ರಪಡಿಸಿಕೊಂಡಿತು. ಈ ಪಂದ್ಯದಲ್ಲಿ ಸಿಎಸ್​ಕೆ ಸೋತಿದ್ದರೂ ಪ್ಲೇಆಫ್​ ಕನಸು ಇನ್ನೂ ಛಿದ್ರವಾಗಿಲ್ಲ ಎಂಬುದಕ್ಕೆ ಈ ಲೆಕ್ಕಾಚಾರವೇ ಸಾಕ್ಷಿ.   

ಈಗಾಗಲೇ ಐಪಿಎಲ್​ ಅಂಕಪಟ್ಟಿಯ ಅಗ್ರ ಮೂರು ಸ್ಥಾನಗಳಲ್ಲಿ ಮೊದಲು ಆರ್​ಸಿಬಿ, ದ್ವಿತೀಯ ಗುಜರಾತ್ ಟೈಟಾನ್ಸ್​ ಮತ್ತು ಮೂರನೇ ಸ್ಥಾನದಲ್ಲಿ ಸನ್​ರೈಸರ್ಸ್​ ಹೈದರಾಬಾದ್​ ತಂಡಗಳಿವೆ. ಈಗ ಉಳಿದಿರುವುದು ಒಂದೇ ಒಂದು ಸ್ಥಾನ. ಅದಕ್ಕೆ ಮೂರು ಟೀಮ್​ಗಳು ರೇಸ್​ನಲ್ಲಿವೆ. ರಾಜಸ್ಥಾನ ರಾಯಲ್ಸ್, ಚೆನ್ನೈ ಸೂಪರ್​ ಕಿಂಗ್ಸ್​ ಮತ್ತು ಪಂಜಾಬ್ ಕಿಂಗ್ಸ್​. ಈ ಮೂವರಲ್ಲಿ ಉಳಿದ ಪಂದ್ಯಗಳನ್ನು ಪಂಜಾಬ್​ ಮತ್ತು ಆರ್​ಆರ್​ ಸೋತರೆ, ಖಂಡಿತ ಚೆನ್ನೈ ಪಡೆಗೆ ಪ್ಲೇಆಫ್​ ಕನಸು ಈಡೇರಲಿದೆ. ಆದ್ರೆ, ಇದೊಂದು ನಡೆಯಲೇಬೇಕು.

ರಾಜಸ್ಥಾನ ರಾಯಲ್ಸ್​ಗೆ ಎರಡು ಪಂದ್ಯಗಳಿದ್ದು, ಸಿಎಸ್​ಕೆ ಮತ್ತು ಪಂಜಾಬ್ ಕಿಂಗ್ಸ್​ಗೆ ತಲಾ ಒಂದು ಪಂದ್ಯಗಳು ಆಡಲು ಬಾಕಿ ಉಳಿದಿವೆ. ಈಗ, ಅದರಲ್ಲಿ ಆರ್​ಆರ್​ 2ಕ್ಕೆ ಎರಡು ಪಂದ್ಯ ಮತ್ತು ಶ್ರೇಯಸ್​ ಅಯ್ಯರ್​ ಪಡೆ ಒಂದು ಪಂದ್ಯದಲ್ಲಿ ಸೋಲಬೇಕು. ಇಷ್ಟೇ ಅಲ್ಲ, ಇದು ಸಂಭವಿಸುವುದರ ಜೊತೆಗೆ ಮುಂದಿನ ಹಾಗೂ ಕೊನೆಯ ಪಂದ್ಯದಲ್ಲಿ ಸಿಎಸ್​ಕೆ ಎಲ್​ಎಸ್​ಜಿ ವಿರುದ್ಧ ಗೆಲ್ಲಬೇಕು. ಆಗ ಮಾತ್ರ ಪ್ಲೇಆಫ್​ಗೆ ಸಿಂಹದಂತೆ ಎಂಟ್ರಿ ಕೊಡಬಹುದು. ಇಲ್ಲವೇ, ವಿಜಿಲ್​ ಪೋಡು, ಮನೆಗೆ ಓಡು ಎಂದು ಸುಮ್ಮನಾಗಬೇಕಷ್ಟೇ.