ಕೆಕೆಆರ್ ಗೆ ಗಾಯದ ಮೇಲೆ ಬರೆ... ನಾಯಕ ರಹಾನೆಗೆ ದಂಡದ ಬಿಸಿ; ಕಾರಣವೇನು ಗೊತ್ತಾ...? Ajinkya Rahane

ಚೆನ್ನೈನ ಎಂಎ ಚಿದಂಬರಂ ಕ್ರೀಡಾಂಗಣದಲ್ಲಿ ಸಿಎಸ್‌ಕೆ ವಿರುದ್ಧ ಮೊದಲು ಬೌಲಿಂಗ್ ಮಾಡಲು ನಿರ್ಧರಿಸಿದ ರಹಾನೆ ತಂಡ ನಿಗದಿತ ಸಮಯದಲ್ಲಿ ತನ್ನ ಪಾಲಿನ ಓವರ್​ಗಳನ್ನು ಪೂರ್ಣಗೊಳಿಸುವಲ್ಲಿ ವಿಫಲವಾಯಿತು. ಐಪಿಎಲ್‌ನ ನೀತಿ ಸಂಹಿತೆಯ ಆರ್ಟಿಕಲ್ 2.22 ರ ಅಡಿಯಲ್ಲಿ, ಕನಿಷ್ಠ ಓವರ್ ದರದ ಅಪರಾಧಗಳಿಗೆ ಸಂಬಂಧಿಸಿದ ಕೆಕೆಆರ್‌ನ ಈ ಸೀಸನ್​ನ ಮೊದಲ ಅಪರಾಧ ಇದಾಗಿರುವುದರಿಂದ ನಾಯಕನಿಗೆ 12 ಲಕ್ಷ ರೂ. ದಂಡ ವಿಧಿಸಲಾಗಿದೆ.

ಐಪಿಎಲ್ ನಿಯಮಗಳ ಪ್ರಕಾರ, ಒಂದು ಸೀಸನ್‌ನಲ್ಲಿ ತಂಡವೊಂದು ಮೂರು ಬಾರಿ ನಿಧಾನಗತಿಯ ಬೌಲಿಂಗ್ ಮಾಡಿದರೆ, ನಾಯಕನಿಗೆ ದಂಡದ ಜೊತೆಗೆ ಒಂದು ಪಂದ್ಯದ ನಿಷೇಧವನ್ನು ಹೇರಬಹುದು. ಒಂದು ವೇಳೆ ಹಾಗಾದಲ್ಲಿ ಪ್ರಸ್ತುತ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿರುವ ಕೆಕೆಆರ್ ತಂಡಕ್ಕೆ ರಹಾನೆ ಅಲಭ್ಯತೆ ದೊಡ್ಡ ಹೊಡೆತವಾಗಲಿದೆ. ಆದ್ದರಿಂದ ಮುಂದಿನ ಪಂದ್ಯಗಳಲ್ಲಿ ಸಮಯದ ಕುರಿತು ತಂಡವು ಹೆಚ್ಚಿನ ಗಮನ ಹರಿಸಬೇಕಾದ ಅನಿವಾರ್ಯತೆ ಇದೆ.

ಪಂದ್ಯದ ವೇಳೆ ಆಟಗಾರರು ಬೌಲಿಂಗ್​ನಲ್ಲಿ ಉತ್ತಮ ಪ್ರದರ್ಶನ ನೀಡಿದರೂ ಕೂಡ ಬ್ಯಾಟ್ಸ್​ಮನ್​​​ಗಳು ವಿಫಲರಾಗಿದ್ದು, ಅಗ್ರ ಕ್ರಮಾಂಕದ ಆರು ಆಟಗಾರರಲ್ಲಿ ಯಾವ ಒಬ್ಬರಿಂದಲೂ ದೊಡ್ಡ ಇನ್ನಿಂಗ್ಸ್ ಬರಲಿಲ್ಲ.

ಸುನಿಲ್ ನರೈನ್ , ರಹಾನೆ ಮತ್ತು ಅಂಗ್‌ಕ್ರಿಶ್ ರಘುವಂಶಿ ಅವರಂತಹ ಆಟಗಾರರು 20 ರನ್‌ಗಳ ಗಡಿ ದಾಟಿದರೂ ಕೂಡಾ ದೊಡ್ಡ ಮೊತ್ತವನ್ನು ಗಳಿಸಲು ಸಾಧ್ಯವಾಗಲಿಲ್ಲ. ಕೆಕೆಆರ್ ತಮ್ಮ 20 ಓವರ್‌ಗಳಲ್ಲಿ 7 ವಿಕೆಟ್‌ಗಳನ್ನು ಕಳೆದುಕೊಂಡು 160 ರನ್​ಗಳನ್ನು ಮಾತ್ರ ಗಳಿಸಿತು. ರಮಣದೀಪ್ ಸಿಂಗ್ ಮತ್ತು ರೋವ್‌ಮನ್ ಪೊವೆಲ್ ಕ್ರಮಾಂಕದಲ್ಲಿ ತೀವ್ರವಾಗಿ ಪ್ರಯತ್ನಿಸಿದರು ಆದರೆ ಅವರ ಅಗ್ರ ಕ್ರಮಾಂಕದಿಂದ ಹೆಚ್ಚಿನ ರನ್​ಗಳಿಸಲು ಸಾಧ್ಯವಾಗಲಿಲ್ಲ (ಏಜೆನ್ಸೀಸ್​).