ಜಪಾನ್‌ನಲ್ಲಿ ಕಳಪೆ ವ್ಯವಸ್ಥೆಗೆ ಬಿಸಿಸಿಐ ಗರಂ: ಟೆಂಟ್‌ಗಳೇ ಡ್ರೆಸ್ಸಿಂಗ್ ರೂಮ್!, ಏಷ್ಯಾಡ್‌ಗೆ ಬಿ ತಂಡ ಕಳುಹಿಸಲು ಚಿಂತನೆ?

ನವದೆಹಲಿ: ಮುಂಬರುವ ಏಷ್ಯನ್ ಗೇಮ್ಸ್‌ನ ಟಿ20 ಕ್ರಿಕೆಟ್ ಸ್ಪರ್ಧೆಯ ಪುರುಷರ ವಿಭಾಗದಲ್ಲಿ

ಭಾರತ ಬಿ ದರ್ಜೆಯ ತಂಡವನ್ನು ಕಣಕ್ಕಿಳಿಸಲು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಚಿಂತನೆ ನಡೆಸಿದೆ ಎನ್ನಲಾಗಿದೆ. ಜಪಾನ್‌ನಲ್ಲಿ ಆಟಗಾರರಿಗೆ ಕಲ್ಪಿಸಲಾಗಿರುವ ಕ್ರಿಕೆಟ್ ಮೂಲಸೌಕರ್ಯಗಳ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿರುವ ಬಿಸಿಸಿಐ, ಸೌಲಭ್ಯಗಳ ಪರಿಶೀಲಿಸಲು ತನ್ನ ವೀಕ್ಷಕರನ್ನು ಕಳುಹಿಸುವ ಸಾಧ್ಯತೆಗಳಿವೆ.

ಜಪಾನ್ ಐಚಿ-ನಗೋಯಾದಲ್ಲಿ ಸೆ.17ರಂದು ಕ್ರಿಕೆಟ್ ಸ್ಪರ್ಧೆಗಳು ಆರಂಭವಾಗಲಿದ್ದು, ಅಲ್ಲಿನ ತಾತ್ಕಾಲಿಕ ಸೌಲಭ್ಯಗಳ ಬಗ್ಗೆ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ಎಸಿಸಿ) ಸಭೆಯಲ್ಲಿ ಸದಸ್ಯ ಮಂಡಳಿಗಳು

ಅಸಮಾಧಾನ ವ್ಯಕ್ತಪಡಿಸಿದ್ದವು.

ಶ್ರೇಯಸ್ ಅಯ್ಯರ್ ನಾಯಕತ್ವದಲ್ಲಿ ಜಸ್‌ಪ್ರೀತ್ ಬುಮ್ರಾ, ಸಂಜು ಸ್ಯಾಮ್ಸನ್ ಸಹಿತ ಪ್ರಮುಖ ಆಟಗಾರರ ತಂಡವನ್ನು ಬಿಸಿಸಿಐ ಈಗಾಗಲೇ ಪ್ರಕಟಿಸಿದೆ. ಆದರೆ, ಈ ಸೌಲಭ್ಯಗಳ ಪರಿಶೀಲನೆಗಾಗಿ ಬಿಸಿಸಿಐ ಜತೆಗೆ ಎಸಿಸಿಯು ಪರಿಶೀಲನಾ ವೀಕ್ಷಕರ ನಿಯೋಗವನ್ನು ಜಪಾನ್‌ಗೆ ಕಳುಹಿಸಲಿದೆ. ಈ ನಿಯೋಗದ ವರದಿ ಕೈ ಸೇರಿದ ನಂತರವೇ ಪ್ರಮುಖ ಆಟಗಾರರು ಒಳಗೊಂಡ ತಂಡ ಅಥವಾ ಎರಡನೇ ದರ್ಜೆಯ ಬಿ ತಂಡವನ್ನು ಕಳುಹಿಸಬೇಕೇ ಎಂಬ ಅಂತಿಮ ನಿರ್ಧಾರವನ್ನು ಬಿಸಿಸಿಐ ತೆಗೆದುಕೊಳ್ಳಲಿದೆ.

ಏಷ್ಯನ್ ಗೇಮ್ಸ್‌ನ ಕ್ರಿಕೆಟ್‌ನ ಪುರುಷರ-ಮಹಿಳೆಯರ ಎರಡೂ ವಿಭಾಗಗಳಲ್ಲಿ ಭಾರತ ತಂಡವೇ ಹಾಲಿ ಚಾಂಪಿಯನ್ ಎನಿಸಿದೆ.

ಜಪಾನ್‌ನ ನಿಸ್ಶಿನ್ ನಗರದ ‘ಕೊರೊಗಿ ಸ್ಪೋರ್ಟ್ಸ್ ಪಾಕ್’ನಲ್ಲಿ ಪುರುಷರ ಹಾಗೂ ಮಹಿಳೆಯರ ವಿಭಾಗದ ಪಂದ್ಯಗಳು ನಡೆಯಲಿವೆ. ಆದರೆ, ಇದುವರೆಗೆ ಪರೀಕ್ಷಿಸಲ್ಪಡದ ಹೈಬ್ರಿಡ್ ಪಿಚ್ (ಸಹಜ ಹುಲ್ಲು ಹಾಗೂ ಕೃತಕ ಫೈಬರ್ ಮಿಶ್ರಿತ) ಆಗಿದ್ದು, ಮೂಲತಃ ಬೇಸ್‌ಬಾಲ್ ಮೈದಾನವಾಗಿದೆ. ಕಳೆದ ಮಾರ್ಚ್‌ನಲ್ಲಿ ಇದನ್ನು ಕ್ರಿಕೆಟ್ ಮೈದಾನವಾಗಿ ನವೀಕರಿಸಲಾಗಿದ್ದು, ಹೈಬ್ರಿಡ್ ಪಿಚ್ ಆಗಿಯೂ ಪರಿವರ್ತಿಸಲಾಗಿದೆ. ಹಾಲಿ ವರ್ಷ ಮೇ ತಿಂಗಳಲ್ಲಿ ಒಂದೆರಡು ಪಂದ್ಯಗಳನ್ನು ಆಡಿಸಲಾಗಿತ್ತು. ಆದರೆ, ಅಂತಾರಾಷ್ಟ್ರೀಯ ಪಂದ್ಯಗಳಿಗೆ ಈ ಪಿಚ್ ಎಷ್ಟು ಸೂಕ್ತ ಎಂಬುದನ್ನು ಇದುವರೆಗೆ ಪರೀಕ್ಷಿಸಿಲ್ಲ. ಐಸಿಸಿ ಟೆಸ್ಟ್ ಮಾನ್ಯತೆ ಹೊಂದಿರುವ ಎಲ್ಲ ಕ್ರಿಕೆಟ್ ಮಂಡಳಿಗಳು, ಕೂಟಕ್ಕೆ ಪ್ರಮುಖ ಆಟಗಾರರನ್ನು ಒಳಗೊಂಡ ತಂಡಗಳನ್ನು ಆರಿಸಿವೆ. ಇದರಿಂದ ಆಟಗಾರರು ಗಾಯದ ಸಮಸ್ಯೆ ಎದುರಿಸುವ ಬಗ್ಗೆ ಆತಂಕ ವ್ಯಕ್ತವಾಗಿದೆ.

ಜಪಾನ್‌ನಲ್ಲಿ ಬೇಸ್‌ಬಾಲ್ ಪ್ರಮುಖ ಕ್ರೀಡೆ ಆಗಿದ್ದು, ಏಷ್ಯನ್ ಗೇಮ್ಸ್‌ಗಾಗಿ ಬೇಸ್‌ಬಾಲ್ ಮೈದಾನವನ್ನು ತಾತ್ಕಾಲಿಕವಾಗಿ ಕ್ರಿಕೆಟ್‌ಗೆ ಅಗತ್ಯವಿರುವಂತೆ ಬದಲಾಯಿಸಲಾಗಿದೆ. ಕ್ರೀಡಾಂಗಣದ ಔಟ್‌ಫೀಲ್ಡ್ ಮತ್ತು ಬೌಂಡರಿ ಅಳತೆಗಳು ಸರಿಯಾದ ಪ್ರಮಾಣದಲ್ಲಿಲ್ಲದಿರುವ ಬಗ್ಗೆ ಎಸಿಸಿ ಸಭೆಯಲ್ಲಿ ಬಿಸಿಸಿಐ, ಪಿಸಿಬಿ, ಆ್ಘನ್ ಮಂಡಳಿಗಳು ಅಸಮಾಧಾನ ವ್ಯಕ್ತಪಡಿಸಿವೆ.

ತಾತ್ಕಾಲಿಕ ಕ್ರಿಕೆಟ್ ಮೈದಾನದಲ್ಲಿ ಆಟಗಾರರಿಗಾಗಿ ಯಾವುದೇ ಶಾಶ್ವತ ಅಥವಾ ಸುಸಜ್ಜಿತ ಡ್ರೆಸ್ಸಿಂಗ್ ರೂಮ್ ಕಟ್ಟಡಗಳಿಲ್ಲ. ಬದಲಿಗೆ ಆಯೋಜಕರು ತಾತ್ಕಾಲಿಕ ಟೆಂಟ್‌ಗಳ ವ್ಯವಸ್ಥೆ ಕಲ್ಪಿಸಿದ್ದು, ಅಲ್ಲಿಂದ 500 ಮೀಟರ್ ದೂರದಲ್ಲಿ ಶೌಚಾಲಯಗಳನ್ನು ನಿರ್ಮಿಸಲಾಗಿದೆ ಎಂದು ವರದಿಯಾಗಿದೆ. ಅಂತಾರಾಷ್ಟ್ರೀಯ ಮಟ್ಟದ ಆಟಗಾರರಿಗೆ ಇದು ತೀವ್ರ ಮುಜುಗರನ್ನುಂಟು ಮಾಡಲಿದೆ ಎಂಬುದು ಮಂಡಳಿಗಳು ದೂರಿವೆ.

ಈ ಬಾರಿಯ ಏಷ್ಯನ್ ಗೇಮ್ಸ್‌ನಲ್ಲಿ ಪ್ರತ್ಯೇಕ ‘ಕ್ರೀಡಾ ಗ್ರಾಮ’ ಸಂಪೂರ್ಣವಾಗಿ ಲಭ್ಯವಿಲ್ಲದ ಕಾರಣ, ಕೆಲ ಕ್ರೀಡಾಪಟುಗಳಿಗೆ ಹೋಟೆಲ್‌ಗಳಲ್ಲಿ ವಸತಿ ಕಲ್ಪಿಸಲಾಗಿದೆ. ಆದರೆ, ನಗೋಯಾದಲ್ಲಿ ನೀಡಿರುವ ಹೋಟೆಲ್ ಕೊಠಡಿಗಳು ಅತ್ಯಂತ ಚಿಕ್ಕದಾಗಿದ್ದು, ಕ್ರಿಕೆಟಿಗರ ಕಿಟ್‌ಬ್ಯಾಗ್ ಇಡಲು ಜಾಗವಿಲ್ಲ ಎನ್ನಲಾಗಿದೆ. ಒಬ್ಬ ಆಟಗಾರ ತನ್ನ ದೊಡ್ಡ ಕ್ರಿಕೆಟ್ ಕಿಟ್‌ಬ್ಯಾಗ್ ತೆರೆದಿಟ್ಟರೆ, ಮತ್ತೊಬ್ಬ ಆಟಗಾರ ನಿಲ್ಲಲು ಜಾಗವಿಲ್ಲದಷ್ಟು ಸಣ್ಣ ಕೊಠಡಿಗಳನ್ನು ನೀಡಲಾಗಿದೆ. ಇಬ್ಬರು ಆಟಗಾರರು ಈ ಕೊಠಡಿಗಳಲ್ಲಿ ಉಳಿದುಕೊಳ್ಳುವುದು ಅತ್ಯಂತ ಕಷ್ಟಕರವಾಗಿದೆ ಎನ್ನಲಾಗಿದೆ.