ಲಂಕಾ ಆಟಗಾರನ ಜತೆ ವೈಭವ್ ಸೂರ್ಯವಂಶಿ ಜಗಳ: ಕೊನೆಗೂ ಮೌನ ಮುರಿದ ಬಿಸಿಸಿಐ! Vaibhav Suryavanshi

Vaibhav Suryavanshi : ಇತ್ತೀಚಿನ ದಿನಗಳಲ್ಲಿ ಸಿಕ್ಕಾಪಟ್ಟೆ ಸುದ್ದಿಯಲ್ಲಿರುವ 15 ವರ್ಷದ ಯುವ ಬ್ಯಾಟ್ಸ್‌ಮನ್ ವೈಭವ್ ಸೂರ್ಯವಂಶಿ, ಪ್ರಸ್ತುತ ತ್ರಿಕೋನ 'ಎ' ಸರಣಿಯಲ್ಲಿ ಭಾರತ 'ಎ' ತಂಡದ ಪರವಾಗಿ ಆಡುತ್ತಿದ್ದು, ಆಡಿದ ನಾಲ್ಕು ಪಂದ್ಯಗಳಲ್ಲಿ ಕ್ರಮವಾಗಿ 14, 44, 21 ಹಾಗೂ 38 ರನ್‌ಗಳನ್ನು ಗಳಿಸಿ, ವೈಫಲ್ಯ ಅನುಭವಿಸಿದ್ದಾರೆ. ಜೂನ್​ 15 ರಂದು ಶ್ರೀಲಂಕಾ 'ಎ' ತಂಡದ ವಿರುದ್ಧ ನಡೆದ ರೋಚಕ ಪಂದ್ಯದಲ್ಲಿ, ಸೂಪರ್ ಓವರ್‌ನಲ್ಲಿ ಭಾರತ 'ಎ' ತಂಡವು ಕೇವಲ 8 ರನ್‌ಗಳ ಅಂತರದಿಂದ ಸೋಲನ್ನು ಅನುಭವಿಸಿತು. ಈ ಪಂದ್ಯದ ಬೆನ್ನಲ್ಲೇ, ಲಂಕಾ ಆಟಗಾರ ಮತ್ತು ವೈಭವ್ ನಡುವೆ ನಡೆದ ಜಟಾಪಟಿ ಕ್ರೀಡಾ ಜಗತ್ತಿನಲ್ಲಿ ಭಾರಿ ಚರ್ಚೆಗೆ ಕಾರಣವಾಯಿತು. ಕೆಲವರು ಲಂಕಾ ಆಟಗಾರರನ್ನು ಟೀಕಿಸಿದರೆ, ಇನ್ನು ಕೆಲವರು ವೈಭವ್​ ಅವರನ್ನು ಟೀಕಿಸಿದರು. ಇದೀಗ ಈ ವಿವಾದದ ಬಗ್ಗೆ ಭಾರತೀಯ ಕ್ರಿಕೆಟ್​ ನಿಯಂತ್ರಣ ಮಂಡಳಿ (ಬಿಸಿಸಿಐ) ಕೊನೆಗೂ ಪ್ರತಿಕ್ರಿಯೆ ನೀಡಿದೆ.

ಅಂದಹಾಗೆ, ಈ ವಿವಾದದ ಬೆನ್ನಲ್ಲೇ ಬಿಸಿಸಿಐ, ಸೂರ್ಯವಂಶಿ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬಹುದು ಅಥವಾ ಅವರಿಗೆ ಎಚ್ಚರಿಕೆ ನೀಡಬಹುದು ಎಂಬ ವದಂತಿಗಳು ಹರಡಿದ್ದವು. ಆದರೆ, ಈ ವಿವಾದದ ಕುರಿತು ಇತ್ತೀಚೆಗೆ ಪ್ರತಿಕ್ರಿಯಿಸಿರುವ ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ ಅವರು, ವೈಭವ್ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತದೆ ಎಂಬ ಊಹಾಪೋಹಗಳನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ.

ಪ್ರಸ್ತುತ ನಮ್ಮ ಆಟಗಾರರು ಕೇವಲ ತ್ರಿಕೋನ ಸರಣಿ ಕಡೆಗೆ ಗಮನ ಹರಿಸಬೇಕೆಂದು ನಾವು ಬಯಸುತ್ತೇವೆ ಮತ್ತು ಇಂತಹ ಬಾಹ್ಯ ವಿವಾದಗಳಿಂದ ಅವರ ಗಮನವನ್ನು ಬೇರೆಡೆಗೆ ಸೆಳೆಯಲು ನಮಗೆ ಇಷ್ಟವಿಲ್ಲ ಎಂದು ದೇವಜಿತ್ ಸೈಕಿಯಾ ಸ್ಪಷ್ಟಪಡಿಸಿದ್ದಾರೆ. ಇದರಿಂದಾಗಿ, ಸದ್ಯದ ಮಟ್ಟಿಗೆ ಬಿಸಿಸಿಐ ಈ ಯುವ ಆಟಗಾರನ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳುವುದಿಲ್ಲ ಎಂಬುದು ಸ್ಪಷ್ಟವಾಗಿದೆ.

ಮತ್ತೊಂದೆಡೆ, ಕ್ರಿಕೆಟ್ ಮೈದಾನದಲ್ಲಿ ಆಟಗಾರರ ನಡುವೆ ನಡೆಯುವ ಇಂತಹ ದೈಹಿಕ ಮುಖಾಮುಖಿ ಅಥವಾ ತಳ್ಳಾಟದ ಘಟನೆಗಳನ್ನು ಐಸಿಸಿ ಅತ್ಯಂತ ಗಂಭೀರವಾಗಿ ಪರಿಗಣಿಸುತ್ತದೆ. ಐಸಿಸಿ ನೀತಿ ಸಂಹಿತೆಯ ಆರ್ಟಿಕಲ್ 2.12 ರ ಪ್ರಕಾರ, ಅಂತಾರಾಷ್ಟ್ರೀಯ ಪಂದ್ಯದ ಅವಧಿಯಲ್ಲಿ ಯಾವುದೇ ಆಟಗಾರನು ಅಂಪೈರ್‌ಗಳು, ಮ್ಯಾಚ್ ರೆಫರಿ ಅಥವಾ ಪ್ರೇಕ್ಷಕರೊಂದಿಗೆ ಅನುಚಿತವಾಗಿ ವರ್ತಿಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.

ಉದ್ದೇಶಪೂರ್ವಕವಾಗಿ ಅಥವಾ ಬೇಜವಾಬ್ದಾರಿಯಿಂದ ಇತರ ಆಟಗಾರರನ್ನು ಅಥವಾ ಅಂಪೈರ್‌ಗಳನ್ನು ತಟ್ಟುವ ಅಥವಾ ತಳ್ಳುವ ಆಟಗಾರರು ಈ ನಿಯಮದ ವ್ಯಾಪ್ತಿಗೆ ಬರುತ್ತಾರೆ. ಇಂತಹ ಘಟನೆಗಳು ಸಂಭವಿಸಿದಾಗ, ಆ ನಡವಳಿಕೆಯು ಎಷ್ಟು ಗಂಭೀರವಾಗಿತ್ತು ಮತ್ತು ಆ ತಳ್ಳಾಟವು ಉದ್ದೇಶಪೂರ್ವಕವಾಗಿ ನಡೆದಿದ್ದೇ ಅಥವಾ ಅಚಾತುರ್ಯದಿಂದ ಸಂಭವಿಸಿದ್ದೇ ಎಂಬುದನ್ನು ನಿರ್ಣಯಿಸಲು ಐಸಿಸಿ ಕೆಲವು ಪ್ರಮುಖ ಅಂಶಗಳನ್ನು ಸೂಕ್ಷ್ಮವಾಗಿ ಪರಿಶೀಲಿಸುತ್ತದೆ. ತಪ್ಪು ಸಾಬೀತಾದಲ್ಲಿ ಐಸಿಸಿ ಕ್ರಮ ತೆಗೆದುಕೊಳ್ಳುತ್ತದೆ.

ಭಾರತ 'ಎ' ಮತ್ತು ಶ್ರೀಲಂಕಾ 'ಎ' ಪಂದ್ಯದ ಮುಕ್ತಾಯದ ನಂತರ ಅಸಲಿ ಡ್ರಾಮಾ ಆರಂಭವಾಯಿತು. ಶ್ರೀಲಂಕಾ ಆಟಗಾರರು ತಮ್ಮ ಗೆಲುವನ್ನು ಅತಿಯಾದ ಉತ್ಸಾಹ ಮತ್ತು ಜೋರು ಕೂಗಾಟದೊಂದಿಗೆ ಆಚರಿಸುತ್ತಿದ್ದುದನ್ನು ಕಂಡ ವೈಭವ್ ಸೂರ್ಯವಂಶಿ ತೀವ್ರ ಅಸಮಾಧಾನಗೊಂಡರು. ಸೋಲಿನ ನಿರಾಶೆಯಲ್ಲಿ ತಮ್ಮ ಸಹ ಆಟಗಾರ ಸೂರ್ಯಂಶ್ ಶೇಡ್ಗೆ ಅವರೊಂದಿಗೆ ಪೆವಿಲಿಯನ್ ಕಡೆಗೆ ಹೆಜ್ಜೆ ಹಾಕುತ್ತಿದ್ದ ಸೂರ್ಯವಂಶಿ, ಶ್ರೀಲಂಕಾ ಆಟಗಾರರ ಅತಿಯಾದ ವರ್ತನೆಯಿಂದ ಕೋಪಗೊಂಡು ಅವರೊಂದಿಗೆ ವಾಗ್ವಾದಕ್ಕಿಳಿದರಲ್ಲದೆ, ಸಿಟ್ಟಿನಲ್ಲಿ ಲಂಕಾ ಆಟಗಾರನೊಬ್ಬನನ್ನು ದೈಹಿಕವಾಗಿ ಹಿಂದಕ್ಕೆ ತಳ್ಳಿದರು. ಪರಿಸ್ಥಿತಿ ಕೈಮೀರುತ್ತಿದ್ದಂತೆ ಇತರ ಶ್ರೀಲಂಕಾ ಕ್ರಿಕೆಟಿಗರು ತಕ್ಷಣ ಮಧ್ಯಪ್ರವೇಶಿಸಿ ಜಗಳವನ್ನು ತಿಳಿಗೊಳಿಸಿದರು. ಐಪಿಎಲ್ ಫಾರ್ಮ್ ಅನ್ನು ಇಲ್ಲೂ ಮುಂದುವರಿಸುವ ನಿರೀಕ್ಷೆಯಲ್ಲಿದ್ದ ಸೂರ್ಯವಂಶಿ ಸರಣಿಯಲ್ಲಿ ದೊಡ್ಡ ಸ್ಕೋರ್ ಗಳಿಸಲು ವಿಫಲರಾದ ನಿರಾಶೆಯಲ್ಲಿದ್ದಾಗ, ಲಂಕಾ ಆಟಗಾರರ ಸ್ಲೆಡ್ಜಿಂಗ್ ಹಾಗೂ ಮೈದಾನದಲ್ಲಿ ನಡೆದ ಈ ಹೈಡ್ರಾಮಾ ಅವರ ಬೇಸರವನ್ನು ಮತ್ತಷ್ಟು ಹೆಚ್ಚಿಸಿತು, (ಏಜೆನ್ಸೀಸ್​).