ಐಪಿಎಲ್​ನಲ್ಲಿ ಕ್ರಿಕೆಟಿಗರ ಗರ್ಲ್​ಫ್ರೆಂಡ್ಸ್​​ಗೆ ನಿರ್ಬಂಧ: ಬಿಸಿಸಿಐ ಚಿಂತನೆ

ಐಪಿಎಲ್​ ವೇಳೆ ಕ್ರಿಕೆಟಿಗರೊಂದಿಗೆ ಅವರ ಪತ್ನಿ ಮತ್ತು ಇತರ ಕುಟುಂಬ ಸದಸ್ಯರೂ ಉಳಿದುಕೊಳ್ಳಲು ಮೊದಲಿನಿಂದಲೂ ಅವಕಾಶವಿದೆ. ಇತ್ತೀಚೆಗೆ ಗೆಳತಿಯರೂ ಆಟಗಾರರೊಂದಿಗೆ ಅವರ ಹೋಟೆಲ್​ ಕೋಣೆಯಲ್ಲೇ ಉಳಿದುಕೊಳ್ಳುವ ಅಭ್ಯಾಸ ಹೆಚ್ಚಾಗಿದೆ. ಇದು ಟೂರ್ನಿಗೆ ಅಥವಾ ತಂಡಗಳಿಗೆ ಸಂಬಂಧಿಸಿದ ಆಂತರಿಕ ಮಾಹಿತಿಗಳು ಸೋರಿಕೆಯಾಗುವ ಅಪಾಯವನ್ನು ಹೆಚ್ಚಿಸಿವೆ. ಅಲ್ಲದೆ ಈ ಸಂಬಂಧ ಯಾವುದಾದರೂ ದೊಡ್ಡ ವಿವಾದ ಭುಗಿಲೇಳುವುದಕ್ಕೆ ಮುನ್ನ ಎಚ್ಚೆತ್ತುಕೊಳ್ಳಲು ಬಿಸಿಸಿಐ ಮುಂದಾಗಿದೆ. ಹೀಗಾಗಿ ಗರ್ಲ್​ಫ್ರೆಂಡ್​ಗಳ ಮೇಲೆ ನಿರ್ಬಂಧ ಹೇರುವುದಕ್ಕೆ ಸಂಬಂಧಿಸಿ ಕಟ್ಟುನಿಟ್ಟಿನ ನಿಯಮಾವಳಿಯೊಂದನ್ನು ರೂಪಿಸಲು ಬಿಸಿಸಿಐ ಚಿಂತನೆ ನಡೆಸಿದೆ. ಆದರೆ ಈ ಹೊಸ ನಿಯಮಾವಳಿ ಮುಂದಿನ ಆವೃತ್ತಿಯಿಂದಷ್ಟೇ ಜಾರಿಗೆ ಬರಬಹುದು ಎನ್ನಲಾಗಿದೆ.

ಟೀಮ್​ ಇಂಡಿಯಾ ಕ್ರಿಕೆಟಿಗರಾದ ಹಾರ್ದಿಕ್​ ಪಾಂಡ್ಯ (ಮಹಿಕಾ ಶರ್ಮ), ಅರ್ಷದೀಪ್​ ಸಿಂಗ್​ (ಸಮರೀನ್​ ಕೌರ್​), ಇಶಾನ್​ ಕಿಶನ್​ (ಅದಿತಿ ಹುಂಡಿಯಾ) ಮತ್ತು ಯಶಸ್ವಿ ಜೈಸ್ವಾಲ್​ (ಮ್ಯಾಡಿ ಹ್ಯಾಮಿಲ್ಟನ್​) ಐಪಿಎಲ್​ ವೇಳೆ ಗೆಳತಿಯರೊಂದಿಗೆ ಹೆಚ್ಚಿನ ಸಮಯ ಕಳೆಯುತ್ತಿರುವ ಪ್ರಮುಖರಾಗಿದ್ದಾರೆ. ಅವರು ಡೇಟಿಂಗ್​ ನಡೆಸುವುದಕ್ಕೆ ಬಿಸಿಸಿಐ ಯಾವುದೇ ಆಕ್ಷೇಪ ಹೊಂದಿಲ್ಲ. ಆದರೆ ಅವರು ಆಟಗಾರರೊಂದಿಗೆ ಹೋಟೆಲ್​ ಕೋಣೆಯಲ್ಲೇ ಉಳಿದುಕೊಳ್ಳುವುದಕ್ಕೆ ಮತ್ತು ತಂಡದ ಜತೆಯಲ್ಲೇ ಪ್ರಯಾಣಿಸುವುದಕ್ಕೆ ಬಿಸಿಸಿಐ ಅಸಮಾಧಾನ ಹೊಂದಿದೆ ಎನ್ನಲಾಗಿದೆ.

ಪತ್ನಿ ಮತ್ತು "ಅಧಿಕೃತ ಗೆಳತಿ'ಯರನ್ನು ಬಿಸಿಸಿಐನ ಭ್ರಷ್ಟಾಚಾರ ನಿಗ್ರಹ ಟಕ (ಎಸಿಯು) ಸದ್ಯ ಒಂದೇ ರೀತಿಯಾಗಿ ಪರಿಗಣಿಸಿದೆ. ಹೀಗಾಗಿ ಆಟಗಾರರೊಂದಿಗೆ "ಅಧಿಕೃತ ಗೆಳತಿ'ಗೂ ಹೋಟೆಲ್​ನಲ್ಲಿ ಉಳಿದುಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ ಎನ್ನಲಾಗಿದೆ.

ಕೆಲ ಕ್ರಿಕೆಟಿಗರ ಗೆಳತಿಯರಲ್ಲಿ ಸಾಮಾಜಿಕ ಜಾಲತಾಣ ಇನ್​ಫ್ಲುಯೆನ್ಸರ್​ಗಳು ಹೆಚ್ಚಿದ್ದು, ಅವರು ಈ ಹಿಂದೆ ಬೆಟ್ಟಿಂಗ್​ ಆ್ಯಪ್​ಗಳನ್ನು ಪ್ರಚಾರ ಮಾಡಿದ ಹಿನ್ನೆಲೆಯನ್ನೂ ಹೊಂದಿದ್ದಾರೆ. ಇದು ಬಿಸಿಸಿಐಗೆ ಹೆಚ್ಚಿನ ಕಳವಳ ತಂದಿದೆ ಎನ್ನಲಾಗಿದೆ.

2024-25ರ ಆಸೀಸ್​ ಪ್ರವಾಸ ವೈಲ್ಯದ ಬಳಿಕ ಟೀಮ್​ ಇಂಡಿಯಾದಲ್ಲಿ ಈಗಾಗಲೆ ಕ್ರಿಕೆಟಿಗರ ಕುಟುಂಬದ ಸದಸ್ಯರ ಮೇಲೆ ನಿರ್ಬಂಧಗಳಿವೆ. 45 ದಿನಗಳಿಗಿಂತ ಹೆಚ್ಚಿನ ಅವಧಿಯ ವಿದೇಶಿ ಪ್ರವಾಸದ ವೇಳೆ ಒಂದು ವಾರವಷ್ಟೇ ಕುಟುಂಬ ಸದಸ್ಯರೊಂದಿಗೆ ಇರಲು ಅವಕಾಶವಿದೆ. ಆದರೆ ಐಪಿಎಲ್​ ತಂಡಗಳ ಒಡೆತನ ಖಾಸಗಿಯಾಗಿದ್ದು, ಹೀಗಾಗಿ ಸದ್ಯ ಅವರ ನಿಯಮವೇ ಅನ್ವಯಿಸುತ್ತಿದೆ. ಆದರೆ ಬಿಸಿಸಿಐ ಮುಂದಿನ ಫ್ರಾಂಚೈಸಿ ಸಭೆಯಲ್ಲಿ ಈ ಸಂಬಂಧ ಕಟ್ಟುನಿಟ್ಟಿನ ನಿಯಮ ತರುವ ಬಗ್ಗೆ ಚರ್ಚಿಸಲಿದೆ ಎನ್ನಲಾಗಿದೆ.