'ರೋಕೊ' ಜೋಡಿಗೆ ಹಿಂಬಡ್ತಿ​! ಬಿಸಿಸಿಐ ಕೇಂದ್ರ ಒಪ್ಪಂದದಲ್ಲಿ ಮಹತ್ವದ ಬದಲಾವಣೆ; ಏನಿದು ಎ,ಬಿ,ಸಿ ಗ್ರೇಡ್​? | RoKo

ನವದೆಹಲಿ: ಬಿಸಿಸಿಐ ಪ್ರತಿ ವರ್ಷ ಟೀಮ್ ಇಂಡಿಯಾ ಆಟಗಾರರಿಗೆ ಕೇಂದ್ರ ಒಪ್ಪಂದಗಳನ್ನು ನೀಡುತ್ತದೆ. ಅಂತೆಯೇ, ಈ ವರ್ಷವು ಕೊಡುವ ಕುರಿತು ಅದಾಗಲೇ ಚರ್ಚೆಯಾಗಿತ್ತು. ಕೆಲವು ದಿನಗಳ ಹಿಂದೆಯಷ್ಟೇ, ಮೊದಲಿನಿಂದಲೂ ಇದ್ದ ಎ ಪ್ಲಸ್​ ಗ್ರೇಡ್​ ರದ್ದುಗೊಳಿಸಲು ನಿರ್ಧರಿಸಿದ ಭಾರತೀಯ ಕ್ರಿಕೆಟ್ ಮಂಡಳಿ, ಇದೀಗ ಕಡೆಗೂ ಹೊಸ ಕೇಂದ್ರ ಒಪ್ಪಂದದಲ್ಲಿ ಟೀಮ್ ಇಂಡಿಯಾ ದಿಗ್ಗಜ ಕ್ರಿಕೆಟಿಗರಾದ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಗೆ (RoKo) ಹಿಂಬಡ್ತಿ ನೀಡಿದೆ ಎಂದು ಎನ್​ಡಿಟಿವಿ ವರದಿ ಉಲ್ಲೇಖಿಸಿದೆ.

ಈ ಮೊದಲು ಏಕದಿನ, ಟಿ20 ಮತ್ತು ಟೆಸ್ಟ್​ ಸೇರಿದಂತೆ ಒಟ್ಟು ಮೂರು ಫಾರ್ಮೆಟ್​ಗಳಲ್ಲಿ ಆಡುವ ಸ್ಟಾರ್ ಕ್ರಿಕೆಟಿಗರನ್ನು ಎ+ ವರ್ಗದಲ್ಲಿ ಇರಿಸಿ, ಅದರ ಮೇಲೆ ಅವರಿಗೆ ಸಂಭಾವನೆಯನ್ನು ನೀಡಲಾಗುತ್ತೆ. ಆದರೀಗ, ಅದನ್ನು ತೆಗೆದುಹಾಕಿರುವ ಬಿಸಿಸಿಐ, ಆ ಗ್ರೂಪ್​ನಲ್ಲಿರುವ ಆಟಗಾರರನ್ನು ಅವರ ಲಭ್ಯತೆ ಮತ್ತು ಪ್ರದರ್ಶನದ ಮೇರೆಗೆ ಬಡ್ತಿ ಮತ್ತು ಹಿಂಬಡ್ತಿ ನೀಡುವ ಬಗ್ಗೆ ಚರ್ಚಿಸಿದೆ. ಅದರಂತೆಯೇ, ಹೊಸ ಕೇಂದ್ರ ಒಪ್ಪಂದದಲ್ಲಿ, ವಿರಾಟ್​ ಮತ್ತು ರೋಹಿತ್​ರನ್ನು ಇದೀಗ 'ಎ' ಗ್ರೂಪ್​ನಿಂದ ಬಿ ವರ್ಗಕ್ಕೆ ಇಳಿಸಲಾಗಿದೆ.

ಇದಕ್ಕೆ ಕಾರಣ, ರೋಕೊ ಜೋಡಿ ಪ್ರದರ್ಶನ ಮತ್ತು ಲಭ್ಯತೆ. ಪ್ರಸ್ತುತ, ಟಿ20 ಮತ್ತು ಟೆಸ್ಟ್​ ಕ್ರಿಕೆಟ್​ಗೆ ವಿದಾಯ ಹೇಳಿರುವ ದಿಗ್ಗಜರು, ಕೇವಲ ಏಕದಿನ ಪಂದ್ಯಗಳಲ್ಲಿ ಮಾತ್ರ ಭಾರತ ಪರ ಆಡುತ್ತಿದ್ದಾರೆ. ಆಯಾ ಸರಣಿಯ ಪ್ರತಿ ಪಂದ್ಯದಲ್ಲೂ ಅವರ ಪ್ರದರ್ಶನ ಹೇಗಿದೆ? ಎಂಬುದು ಬಡ್ತಿ ಅಥವಾ ಹಿಂಬಡ್ತಿ ನೀಡಲು ಬಹುಮುಖ್ಯ ಅಂಶಗಳಾಗಿವೆ. ಇದೆಲ್ಲವನ್ನೂ ಪರಿಗಣಿಸಿಯೇ ಈಗ ಬಿಸಿಸಿಐ, ರೋಹಿತ್ ಮತ್ತು ವಿರಾಟ್​ರನ್ನು 'ಬಿ' ಗ್ರೂಪ್​ಗೆ ಇಳಿಸಿದೆ ಎಂದು ವರದಿಯಾಗಿದೆ. ಸದ್ಯ ಈ ವಿಷಯ ಕ್ರಿಕೆಟ್​ ಪ್ರಿಯರಿಗೆ ಮಾತ್ರವಲ್ಲದೇ, ಸ್ಟಾರ್ ಕ್ರಿಕೆಟಿಗರ ಅಭಿಮಾನಿಗಳ ಬೇಸರಕ್ಕೂ ಕಾರಣವಾಗಿದೆ.

ಆಟಗಾರರ ಪ್ರದರ್ಶನ, ಅನುಭವ ಮತ್ತು ಆಡುವ ಫಾರ್ಮೆಟ್​ಗಳ ಸಂಖ್ಯೆಯನ್ನು ಆಧರಿಸಿ ಬಿಸಿಸಿಐ ಒಪ್ಪಂದ ಶ್ರೇಣಿಗಳನ್ನು ನಿರ್ಧರಿಸುತ್ತದೆ. ಪ್ರಸ್ತುತ, ಇಲ್ಲಿ ಎ+, ಎ, ಬಿ ಮತ್ತು ಸಿ ಎಂಬ ನಾಲ್ಕು ಶ್ರೇಣಿಗಳಿವೆ. ಈ ಪೈಕಿ ಎ+ ಗ್ರೇಡ್​ ತೆಗೆದುಹಾಕಲು ಮುಖ್ಯ ಆಯ್ಕೆಗಾರ ಅಜಿತ್ ಅಗರ್ಕರ್ ನೇತೃತ್ವದ ಆಯ್ಕೆ ಸಮಿತಿ ನಿರ್ಧರಿಸಿತು.

ಈಗಿರುವ ಎ+ ಶ್ರೇಣಿಯನ್ನು ಸಂಪೂರ್ಣವಾಗಿ ತೆಗೆದುಹಾಕುವಂತೆ ಬಿಸಿಸಿಐಗೆ ಅಜಿತ್ ಅಗರ್ಕರ್​ ಮನವಿ ಸಲ್ಲಿಸಿದ್ದರು. ಈ ವಿಷಯವನ್ನು ಅಪೆಕ್ಸ್ ಕೌನ್ಸಿಲ್‌ನಲ್ಲಿಯೂ ಚರ್ಚಿಸಲಾಯಿತು. ಅಂತೆಯೇ, ಇದನ್ನು ಅನುಮೋದಿಸಿದ ಬಿಸಿಸಿಐ, ಎ, ಬಿ ಮತ್ತು ಸಿ ವಿಭಾಗಗಳು ಮಾತ್ರ ಈಗ ಉಳಿಸಿಕೊಂಡಿದೆ. ಪ್ರಸ್ತುತ, ಈ ಗ್ರೂಪ್​ನಲ್ಲಿ ಜಸ್ಪ್ರಿತ್ ಬುಮ್ರಾ, ಶುಭಮನ್ ಗಿಲ್​ ಮತ್ತು ರವೀಂದ್ರ ಜಡೇಜಾ ಮಾತ್ರ ಇದ್ದಾರೆ.

ಗ್ರೇಡ್​​ ಎ: ಶುಭಮನ್ ಗಿಲ್, ಜಸ್ಪ್ರೀತ್ ಬುಮ್ರಾ, ರವೀಂದ್ರ ಜಡೇಜಾ.

ಗ್ರೇಡ್​​ ಬಿ: ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಸೂರ್ಯಕುಮಾರ್ ಯಾದವ್, ವಾಷಿಂಗ್ಟನ್ ಸುಂದರ್, ಕೆ.ಎಲ್. ರಾಹುಲ್, ಹಾರ್ದಿಕ್ ಪಾಂಡ್ಯ, ಮೊಹಮ್ಮದ್ ಸಿರಾಜ್, ರಿಷಭ್ ಪಂತ್, ಕುಲದೀಪ್ ಯಾದವ್, ಯಶಸ್ವಿ ಜೈಸ್ವಾಲ್, ಶ್ರೇಯಸ್ ಅಯ್ಯರ್.

ಗ್ರೇಡ್​ ಸಿ: ಅಕ್ಷರ್ ಪಟೇಲ್, ತಿಲಕ್ ವರ್ಮಾ, ರಿಂಕು ಸಿಂಗ್, ಶಿವಂ ದುಬೆ, ಸಂಜು ಸ್ಯಾಮ್ಸನ್, ಅರ್ಷದೀಪ್ ಸಿಂಗ್, ಪ್ರಸಿದ್ಧ್ ಕೃಷ್ಣ, ಆಕಾಶ್ ದೀಪ್, ಧ್ರುವ್ ಜುರೆಲ್, ಹರ್ಷಿತ್ ರಾಣಾ, ವರುಣ್ ಚಕ್ರವರ್ತಿ, ನಿತೀಶ್ ಕುಮಾರ್ ರೆಡ್ಡಿ, ಅಭಿಷೇಕ್ ಶರ್ಮಾ, ಸಾಯಿ ಸುದರ್ಶನ್, ರವಿ ಬಿಷ್ಣೋಯ್, ರುತುರಾಜ್ ಗಾಯಕ್ವಾಡ್,(ಏಜೆನ್ಸೀಸ್).