ನಮ್ಮ ದೇಶದ ಘನತೆ ಮುಖ್ಯವೇ ಹೊರತು ವಿಶ್ವಕಪ್​ ಅಲ್ಲ: ಐಸಿಸಿ ಮಾತಿಗೂ ಬಗ್ಗದ ಬಾಂಗ್ಲಾದೇಶ!​ Bangladesh

ಢಾಕಾ: ಫೆಬ್ರವರಿ ತಿಂಗಳು ಭಾರತದಲ್ಲಿ ಆರಂಭವಾಗಲಿರುವ ಟಿ-20 ವಿಶ್ವಕಪ್‌ನಲ್ಲಿ ಆಡುವುದಿಲ್ಲ ಎಂದು ಬಾಂಗ್ಲಾದೇಶ ( Bangladesh ) ತನ್ನ ನಿಲುವನ್ನು ಪುನರುಚ್ಚರಿಸಿದೆ. ನಮ್ಮ ಭದ್ರತಾ ದೃಷ್ಟಿಯಿಂದ ಭಾರತದಲ್ಲಿ ಆಡುವುದಿಲ್ಲ ಎಂದು ವಿವರಿಸಿದ್ದರು ಕೂಡ ಭಾರತ ಮಾತ್ರ ನಮ್ಮ ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳುತ್ತಿಲ್ಲ ಎಂದು ಬಾಂಗ್ಲಾದೇಶದ ಕ್ರೀಡಾ ಸಚಿವಾಲಯದ ಸಲಹೆಗಾರ ಆಸಿಫ್ ನಜ್ರುಲ್ ಹೇಳಿದ್ದಾರೆ.

ಬಾಂಗ್ಲಾದೇಶವು ಈ ಪಂದ್ಯಾವಳಿಯಲ್ಲಿ ಆಡಲು ಆಸಕ್ತಿ ಹೊಂದಿದೆ ಆದರೆ, ದೇಶದ ಪ್ರತಿಷ್ಠೆಗೆ ಕಳಂಕ ತರುವುದನ್ನು ನಾವು ಬಯಸುವುದಿಲ್ಲ ಎಂದು ಪತ್ರಕರ್ತರನ್ನು ಉದ್ದೇಶಿಸಿ ಮಾತನಾಡುವಾಗ ಆಸಿಫ್ ಹೇಳಿದ್ದಾರೆ.

ಭಾರತ ಮತ್ತು ಶ್ರೀಲಂಕಾ ಜಂಟಿಯಾಗಿ ಆಯೋಜಿಸಿರುವ ಈ ಟೂರ್ನಿಯಲ್ಲಿ ತನ್ನ ಪಂದ್ಯಗಳನ್ನು ಶ್ರೀಲಂಕಾಕ್ಕೆ ಸ್ಥಳಾಂತರಿಸುವಂತೆ ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (BCB), ಅಂತಾರಾಷ್ಟ್ರೀಯ ಕ್ರಿಕೆಟ್​ ಮಂಡಳಿಯನ್ನು (ICC) ಕೋರಿತ್ತು. ಆದರೆ, ಆ ಮನವಿಯನ್ನು ಐಸಿಸಿ ತಿರಸ್ಕರಿಸಿದೆ. ಟೂರ್ನಿಯಲ್ಲಿ ಭಾಗವಹಿಸುವುದಾದರೆ, ಭಾರತದಲ್ಲಿ ಆಡಲೇಬೇಕಾಗುತ್ತದೆ ಎಂದು ಐಸಿಸಿ ಸ್ಪಷ್ಟಪಡಿಸಿದೆ. ಇದರ ಬೆನ್ನಲ್ಲೇ ಪ್ರತಿಕ್ರಿಯೆ ನೀಡಿರುವ ಬಿಸಿಬಿ, ತನ್ನ ನಿಲುವಿನಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂದಿದೆ.

ಬಾಂಗ್ಲಾದೇಶಿಗರು ಕ್ರಿಕೆಟ್ ಅನ್ನು ತುಂಬಾ ಪ್ರೀತಿಸುತ್ತಾರೆ ಆದರೆ, ನಮ್ಮ ದೇಶದ ಘನತೆಗಿಂತ ವಿಶ್ವಕಪ್ ಮುಖ್ಯವಲ್ಲ ಎಂದು ಬಿಸಿಬಿ ಹೇಳಿದೆ. ನಮ್ಮ ಕ್ರಿಕೆಟಿಗರು ಹಾಗೂ ಪ್ರೇಕ್ಷಕರು ದೇಶದ ಘನತೆಯನ್ನು ಬಲಿಕೊಟ್ಟು ವಿಶ್ವಕಪ್ ಆಡಲು ಬಯಸುವುದಿಲ್ಲ ಎಂದು ಬುಧವಾರ ಸಭೆಯ ನಂತರ ನಜ್ರುಲ್ ಅವರು ಸುದ್ದಿಗಾರರಿಗೆ ತಿಳಿಸಿದರು. ಭಾರತದಲ್ಲಿ ಬಾಂಗ್ಲಾದೇಶ ಕ್ರಿಕೆಟಿಗರು ಎದುರಿಸುತ್ತಿರುವ ಗಂಭೀರ ಭದ್ರತಾ ಪರಿಸ್ಥಿತಿಯನ್ನು ಐಸಿಸಿ ಸಂಪೂರ್ಣವಾಗಿ ಅರ್ಥಮಾಡಿಕೊಂಡಿಲ್ಲ ಎಂದು ಹೇಳಿದರು.

ಬಾಂಗ್ಲಾದೇಶದಲ್ಲಿ ಹಿಂದೂಗಳ ಸರಣಿ ಹತ್ಯೆ ಹಿನ್ನೆಲೆಯಲ್ಲಿ ಬಾಂಗ್ಲಾದೇಶದ ವೇಗಿ ಮುಸ್ತಾಫಿಜುರ್ ರೆಹಮಾನ್ ಅವರನ್ನು ಐಪಿಎಲ್ ತಂಡ ಕೋಲ್ಕತ ನೈಟ್ ರೈಡರ್ಸ್‌ನಿಂದ ಕೈಬಿಡುವಂತೆ ಬಿಸಿಸಿಐ ಕೇಳಿತ್ತು. ರೆಹಮಾನ್​ ಏನಾದರೂ ಭಾರತದಲ್ಲಿ ಆಡಿದರೆ ಕ್ರೀಡಾಂಗಣದ ಮುಂದೆ ಪ್ರತಿಭಟನೆ ನಡೆಸಲಿದ್ದೇವೆ ಎಂದು ಕೆಲವು ಹಿಂದೂ ಸಂಘಟನೆಗಳು ಎಚ್ಚರಿಸಿದ್ದರಿಂದ ಬಿಸಿಸಿಐ ಸೂಚನೆ ನೀಡಿತು. ಅಂತಿಮವಾಗಿ ಕೆಕೆಆರ್ ತಂಡ ಆಟಗಾರನನ್ನು ಬಿಡುಗಡೆ ಮಾಡಿತು.

ಯಾವಾಗ ರೆಹಮಾನ್​ರನ್ನು ಐಪಿಎಲ್​​ನಿಂದ ಹೊರಗೆ ಹಾಕಿದರೋ ಇದು ನಮ್ಮ ದೇಶಕ್ಕೆ ಮಾಡಿದ ಅವಮಾನ ಎಂದು ಬಾಂಗ್ಲಾದೇಶ ಭಾವಿಸಿದೆ. ಹೀಗಾಗಿ, ಟಿ20 ವಿಶ್ವಕಪ್​ ಆಡಲು ಭಾರತಕ್ಕೆ ಬರುವುದಿಲ್ಲ ಎಂಬ ಹಠಕ್ಕೆ ಬಿದ್ದಿದೆ. ಮುಂದೇನಾಗುತ್ತೆ ಅಂತ ಕಾದು ನೋಡಬೇಕಿದೆ, (ಏಜೆನ್ಸೀಸ್​).