ಆಸೀಸ್​ ನೆಲದಲ್ಲಿ ಮೊದಲ ಬಾರಿ ಟೆಸ್ಟ್​ ಗೆದ್ದು ಇತಿಹಾಸ ಬರೆದ ಬಾಂಗ್ಲಾದೇಶ!

ಮರಾರ ಸ್ಟೇಡಿಯಂನಲ್ಲಿ ಭಾನುವಾರ 4 ವಿಕೆಟ್​ಗೆ 161 ರನ್​ಗಳಿಂದ 4ನೇ ದಿನದಾಟ ಆರಂಭಿಸಿದ ಆಸೀಸ್​, ಗ್ರೀನ್​ ಶತಕದ ನಡುವೆಯೂ ಸ್ಪಿನ್ನರ್​ ಮೆಹಿದಿ ಹಸನ್​ ಮಿರಾಜ್​ (66ಕ್ಕೆ 5) ದಾಳಿಗೆ ಕುಸಿದು ಭೋಜನ ವಿರಾಮದ ಬಳಿಕ 95.1 ಓವರ್​ಗಳಲ್ಲಿ 284 ರನ್​ಗಳಿಗೆ ಆಲೌಟ್​ ಆಯಿತು. ಇದರಿಂದ ಗೆಲುವಿಗೆ ಕೇವಲ 57 ರನ್​ ಗುರಿ ಪಡೆದ ಬಾಂಗ್ಲಾ, 14.2 ಓವರ್​ಗಳಲ್ಲಿ 1 ವಿಕೆಟ್​ ನಷ್ಟದಲ್ಲಿ ಗೆಲುವಿನ ದಡ ಸೇರಿತು. ಆರಂಭಿಕ ಶದ್ಮನ್​ ಇಸ್ಲಾಂ (25*) ಮತ್ತು ಮಾಮಿನುಲ್​ ಹಕ್​ (30*) ಮುರಿಯದ 2ನೇ ವಿಕೆಟ್​ಗೆ 53 ರನ್​ ಜತೆಯಾಟವಾಡಿ ಗೆಲುವಿನ ದಡ ಸೇರಿಸಿದರು.

ಆಸೀಸ್​ (ಶೇ.77.78) ಸೋಲಿನ ನಡುವೆಯೂ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ 4ನೇ ಆವೃತ್ತಿಯ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡರೂ, ವಿಶ್ವ ನಂ. 9 ತಂಡದ ವಿರುದ್ಧ ತವರಿನಲ್ಲೇ ಮುಗ್ಗರಿಸಿದ ಮುಖಭಂಗ ಎದುರಿಸಿತು. ಆಸ್ಟ್ರೆಲಿಯಾದ 149 ವರ್ಷಗಳ ಟೆಸ್ಟ್​ ಕ್ರಿಕೆಟ್​ ಇತಿಹಾಸದಲ್ಲಿ ಇದು ಅತ್ಯಂತ ಆಘಾತಕಾರಿ ಸೋಲು ಎನಿಸಿದೆ.

ಎರಡನೇ ಹಾಗೂ ಅಂತಿಮ ಟೆಸ್ಟ್​ ಆ.22ರಿಂದ ಮೆಕಾಯ್​ನಲ್ಲಿ ನಡೆಯಲಿದ್ದು, ಆಸೀಸ್​ಗೆ ಸರಣಿ ಸಮಬಲ ಸಾಧಿಸುವ ಅವಕಾಶವಷ್ಟೇ ಇದೆ.

ಆಸ್ಟ್ರೆಲಿಯಾ: 198 ಮತ್ತು 95.1 ಓವರ್​ಗಳಲ್ಲಿ 284 (ಗ್ರೀನ್​ 104, ಕ್ಯಾರಿ 30, ವೆಬ್​ಸ್ಟರ್​ 5, ಕಮ್ಮಿನ್ಸ್​ 8, ಸ್ಟಾರ್ಕ್​ 18, ಲ್ಯಾನ್​ 15, ಮಹಮೂದ್​ 56ಕ್ಕೆ 3, ಮೆಹಿದಿ ಹಸನ್​ ಮಿರಾಜ್​ 66ಕ್ಕೆ 5, ಟಸ್ಕಿನ್​ 66ಕ್ಕೆ 1, ತೈಜುಲ್​ 51ಕ್ಕೆ 1), ಬಾಂಗ್ಲಾದೇಶ: 426 ಮತ್ತು 1 ವಿಕೆಟ್​ಗೆ 57 (ಶದ್ಮನ್​ 25*, ಮಾಮಿನುಲ್​ 30*, ಹ್ಯಾಸಲ್​ವುಡ್​ 5ಕ್ಕೆ 1). ಪಂದ್ಯಶ್ರೇಷ್ಠ: ಹಸನ್​ ಮಹಮೂದ್​ (111ಕ್ಕೆ 9).

*ಯಾವುದೇ ಕ್ರಿಕೆಟ್​ ಪ್ರಕಾರದಲ್ಲಿ ಬಾಂಗ್ಲಾದೇಶ ಕಂಡ ಅತಿದೊಡ್ಡ ಗೆಲುವು ಇದಾಗಿದೆ. ನಾವು ಭವಿಷ್ಯದಲ್ಲೂ ಇನ್ನಷ್ಟು ವಿಶೇಷ ಸಾಧನೆ ಮಾಡಲಿದ್ದೇವೆ.

*3: ಆಸೀಸ್​ ನೆಲದಲ್ಲಿ ಆಡಿದ 3ನೇ ಟೆಸ್ಟ್​ನಲ್ಲೇ ಮೊದಲ ಗೆಲುವು ಒಲಿಸಿಕೊಂಡ 2ನೇ ತಂಡ ಬಾಂಗ್ಲಾದೇಶ. ದ. ಆಫ್ರಿಕಾ ಕೂಡ 3ನೇ ಟೆಸ್ಟ್​ನಲ್ಲೇ ಗೆದ್ದಿತ್ತು. ಇಂಗ್ಲೆಂಡ್​ 2ನೇ ಟೆಸ್ಟ್​ನಲ್ಲೇ ಗೆದ್ದಿರುವುದು ದಾಖಲೆ. ಭಾರತ ತಂಡ ಆಸೀಸ್​ನಲ್ಲಿ ಮೊದಲ ಟೆಸ್ಟ್​ ಗೆಲುವಿಗಾಗಿ 12ನೇ ಪಂದ್ಯದವರೆಗೆ ಕಾದಿತ್ತು. ಶ್ರೀಲಂಕಾ ತಂಡ ಆಸೀಸ್​ನಲ್ಲಿ ಇದುವರೆಗೆ 15 ಟೆಸ್ಟ್​ ಆಡಿದ್ದರೂ, ಒಮ್ಮೆಯೂ ಗೆದ್ದಿಲ್ಲ.