ಈ ಸೋಲಿಗೆ ನಾನೇ ಕಾರಣ ಎಂದು ಕಣ್ಣೀರಿಟ್ಟ ಮಿಲ್ಲರ್​... ಅಕ್ಷರ್​ ಪಟೇಲ್​ ನಡೆದುಕೊಂಡ ರೀತಿಗೆ ಬಹುಪರಾಕ್​! David Miller

David Miller : ಬುಧವಾರ ( ಏಪ್ರಿಲ್​ 08) ದೆಹಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್ ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್ ಕೇವಲ ಒಂದು ರನ್​ನಿಂದ ಸೋಲುಂಡಿತು. ಈ ಪಂದ್ಯದಲ್ಲಿ ಸ್ಟಾರ್​ ಬ್ಯಾಟ್ಸ್​ಮನ್​ ಡೇವಿಡ್ ಮಿಲ್ಲರ್ ತಮ್ಮ ತಂಡವನ್ನು ಗೆಲುವಿನತ್ತ ಕೊಂಡೊಯ್ಯುವಲ್ಲಿ ವಿಫಲರಾದರು. ಕೊನೇ ಹಂತದಲ್ಲಿ 20 ಎಸೆತಗಳಲ್ಲಿ 3 ಬೌಂಡರಿ ಮತ್ತು 3 ಸಿಕ್ಸರ್‌ಗಳ ಸಹಾಯದಿಂದ 41 ರನ್ ಗಳಿಸಿ ಅಜೇಯರಾಗಿ ಉಳಿದರು ಕೂಡ ಪಂದ್ಯವನ್ನು ಗೆಲ್ಲಿಸಿಕೊಡಲು ಸಾಧ್ಯವಾಗಲಿಲ್ಲ.

ಕೊನೆಯ ಓವರ್‌ನಲ್ಲಿ ಗೆಲುವಿಗೆ 13 ರನ್‌ಗಳು ಬೇಕಾಗಿದ್ದಾಗ, ಪ್ರಸಿದ್ಧ ಕ್ರಿಷ್ಣ ಎಸೆದ ಮೊದಲ ಎಸೆತದಲ್ಲಿ ವಿಪ್ರಜ್ ಬೌಂಡರಿ ಬಾರಿಸಿದರು. ಇದಾದ ನಂತರದ ಎಸೆತದಲ್ಲಿ ವಿಪ್ರಜ್​ ಔಟಾದರು. ಈ ವೇಳೆ ಕ್ರೀಸ್‌ಗೆ ಬಂದ ಕುಲದೀಪ್ ಯಾದವ್ ಮೂರನೇ ಎಸೆತದಲ್ಲಿ ಸಿಂಗಲ್ ತೆಗೆದುಕೊಂಡು ಮಿಲ್ಲರ್‌ಗೆ ಸ್ಟ್ರೈಕ್ ನೀಡಿದರು. ಬಳಿಕ ಮಿಲ್ಲರ್​ ನಾಲ್ಕನೇ ಎಸೆತದಲ್ಲಿ ಸಿಕ್ಸರ್ ಬಾರಿಸಿದರು. ಇದರೊಂದಿಗೆ, ಡೆಲ್ಲಿ ತಂಡಕ್ಕೆ ಗೆಲುವಿಗಾಗಿ ಎರಡು ಎಸೆತಗಳಲ್ಲಿ ಎರಡು ರನ್‌ಗಳು ಬೇಕಾಯಿತು. ಈ ವೇಳೆ ಮಿಲ್ಲರ್, ಸ್ಟ್ರೈಕ್‌ನಲ್ಲಿರುವುದನ್ನು ನೋಡಿ, ಡೆಲ್ಲಿ ಗೆದ್ದೇ ಗೆಲ್ಲುತ್ತದೆ ಎಂದು ಎಲ್ಲರೂ ಭಾವಿಸಿದ್ದರು. ಆದರೆ, ನಡೆದಿದ್ದು ಮಾತ್ರ ಬೇರೆ. 

ಐದನೇ ಎಸೆತದಲ್ಲಿ ಮಿಲ್ಲರ್, ಡೀಪ್ ಸ್ಕ್ವೇರ್ ಲೆಗ್ ಕಡೆಗೆ ಶಾಟ್ ಹೊಡೆದರು. ಸುಲಭವಾಗಿ ಸಿಂಗಲ್ ತೆಗೆದುಕೊಳ್ಳುವ ಅವಕಾಶವಿದ್ದರೂ, ಮಿಲ್ಲರ್​ ಅದನ್ನು ನಿರಾಕರಿಸಿದರು. ಮಿಲ್ಲರ್ ಮಾಡಿದ ಈ ತಪ್ಪು ಪಂದ್ಯದ ಸೋಲಿಗೆ ಕಾರಣವಾಯಿತು. ಕೊನೆಯ ಎಸೆತದಲ್ಲಿ ಮಿಲ್ಲರ್ ಚೆಂಡನ್ನು ಮುಟ್ಟಲೇ ಇಲ್ಲ. ಬೈ ರನ್​ ಪಡೆಯಲು ಪ್ರಯತ್ನಿಸುವಾಗ ಕುಲದೀಪ್​ ಯಾದವ್​ ರನೌಟ್ ಆದರು ಮತ್ತು ಡೆಲ್ಲಿ ಒಂದು ರನ್‌ನಿಂದ ಸೋಲುಂಡಿತು. ಮಿಲ್ಲರ್ ಐದನೇ ಎಸೆತದಲ್ಲಿ ಸಿಂಗಲ್ ಪಡೆದಿದ್ದರೆ ಪಂದ್ಯ ಟೈ ಆಗುತ್ತಿತ್ತು. ಕುಲದೀಪ್​ ಯಾದವ್​ ಕೊನೆಯ ಎಸೆತದಲ್ಲಿ ಶಾಟ್ ತೆಗೆದುಕೊಂಡಿದ್ದರೂ ಅಥವಾ ಬೈನಲ್ಲಿ ಸಿಂಗಲ್ ಪಡೆದಿದ್ದರೂ ಡೆಲ್ಲಿ ಗೆಲ್ಲುತ್ತಿತ್ತು. ಒಂದು ವೇಳೆ ಔಟ್ ಆಗಿದ್ದರೂ ಪಂದ್ಯ ಸೂಪರ್ ಓವರ್‌ಗೆ ಹೋಗುತ್ತಿತ್ತು. ಆದರೆ, ಅದು ನಡೆಯಲಿಲ್ಲ.

ತಮ್ಮ ತಂಡವು ಒಂದು ರನ್​ನಿಂದ ಸೋತ ನಂತರ ಮಿಲ್ಲರ್ ಭಾವುಕರಾದರು. ಈ ಸೋಲಿಗೆ ನಾನು ಮಾಡಿದ ತಪ್ಪೇ ಕಾರಣ ಎಂದು ಮಿಲ್ಲರ್​ ಕಣ್ಣೀರು ಹಾಕಿದರು. ಇದನ್ನು ಗಮನಿಸಿದ ದೆಹಲಿ ನಾಯಕ ಅಕ್ಷರ್ ಪಟೇಲ್, ಡೇವಿಡ್ ಮಿಲ್ಲರ್ ಅವರನ್ನು ಸಮಾಧಾನಪಡಿಸಿದರು. ಮಿಲ್ಲರ್ ಜತೆ ಮಾತನಾಡುತ್ತಾ ಪಂದ್ಯದಲ್ಲಿ ಇದೆಲ್ಲ ಸಹಜ ಎಂದು ಹೇಳಿ ಸಾಂತ್ವಾನ ಹೇಳಿದರು. ಪ್ರಸ್ತುತ, ಇದರ ವಿಡಿಯೋ ವೈರಲ್ ಆಗುತ್ತಿದ್ದು, ಅಕ್ಷರ್ ಪಟೇಲ್ ಮೇಲೆ ಪ್ರಶಂಸೆಯ ಮಹಾಪೂರವೇ ಹರಿದು ಬರುತ್ತಿದೆ. ನಾಯಕನ ಗುಣ ಈ ರೀತಿ ಇರಬೇಕು ಎಂದು ಕಾಮೆಂಟ್​ ಮಾಡುತ್ತಿದ್ದಾರೆ, (ಏಜೆನ್ಸೀಸ್​).