ಭಾರತೀಯ ರಾಷ್ಟ್ರೀಯ ಕಾರ್ಟಿಂಗ್ ಚಾಂಪಿಯನ್‍ಷಿಪ್: 4 ಮತ್ತು 5ನೇ ಸುತ್ತುಗಳಲ್ಲಿ ಗೆದ್ದು ಬೀಗಿದ ಆರ್ಷಿ ಗುಪ್ತಾ

ಒಂದೇ ವಾರಾಂತ್ಯದಲ್ಲಿ ನಡೆದ ಎರಡೂ ಚಾಂಪಿಯನ್‍ಷಿಪ್ ಸುತ್ತುಗಳಲ್ಲಿ ಆರ್ಷಿ ಸ್ಥಿರ ಹಾಗೂ ವೇಗದ ಚಾಲನಾ ಕೌಶಲ ಪ್ರದರ್ಶಿಸಿದರು. ಈ ಮೂಲಕ ಬ್ಯಾಕ್-ಟು-ಬ್ಯಾಕ್ ಜಯ ಸಾಧಿಸಿ, ದೇಶದ ಉನ್ನತ ಯುವ ಕಾರ್ಟಿಂಗ್ ರೇಸರ್‌ಗಳಲ್ಲಿ ಒಬ್ಬರಾಗಿ ತಮ್ಮ ಸ್ಥಾನವನ್ನು ಮತ್ತಷ್ಟು ಭದ್ರಪಡಿಸಿಕೊಂಡಿದ್ದಾರೆ. 4ನೇ ಸುತ್ತಿನಲ್ಲಿ ಆರ್ಷಿ ಕ್ವಾಲಿಫೈಯಿಂಗ್, ಹೀಟ್ 1, ಹೀಟ್ 2, ಪ್ರಿ-ಫೈನಲ್ ಮತ್ತು ಫೈನಲ್ ಸೇರಿದಂತೆ ಪ್ರತಿಯೊಂದು ಸೆಷನ್‌ನಲ್ಲೂ ಮೊದಲ ಸ್ಥಾನ (P1) ಪಡೆದರು. ಅದೇ ಜಾಗರೂಕತೆ ಮತ್ತು ವೇಗವನ್ನು 5ನೇ ಸುತ್ತಿಗೂ ವಿಸ್ತರಿಸಿದ ಅವರು, ಸತತ ಎಂಟು ವೇಗದ ಲ್ಯಾಪ್‌ಗಳು (Fastest Laps) ಸೇರಿದಂತೆ ಮತ್ತೊಂದು ಭರ್ಜರಿ ಜಯ ಹಾಗೂ ಅತ್ಯಂತ ವೇಗದ ಲ್ಯಾಪ್ ದಾಖಲಿಸಿದರು.

5ನೇ ಸುತ್ತಿನಲ್ಲಿ ಆರ್ಷಿ ಪ್ರಥಮ ಸ್ಥಾನ ಗಳಿಸಿದರೆ, ಆರ್‌. ಕುಮಾರ್ (R. Kumarr) ದ್ವಿತೀಯ ಮತ್ತು ಎಸ್‌. ನೀಲ್ (S. Neel) ತೃತೀಯ ಸ್ಥಾನ ಪಡೆದುಕೊಂಡರು. ಈ ಡಬಲ್ ಗೆಲುವಿನ ಕುರಿತು ಮಾತನಾಡಿದ ಆರ್ಷಿ ಅವರ ತಾಯಿ ಡಾ. ದೀಪ್ತಿ ಗುಪ್ತಾ, "ಒಂದೇ ವಾರಾಂತ್ಯದಲ್ಲಿ 4 ಮತ್ತು 5ನೇ ಎರಡೂ ಸುತ್ತುಗಳನ್ನು ಗೆದ್ದಿರುವುದು ನಮಗೆ ಅತ್ಯಂತ ವಿಶೇಷ ಕ್ಷಣ. 4ನೇ ಸುತ್ತಿನ ಕ್ವಾಲಿಫೈಯಿಂಗ್‌ನಿಂದ ಹಿಡಿದು ಪ್ರತಿಯೊಂದು ಸೆಷನ್‌ನಲ್ಲೂ ಹಾಗೂ 5ನೇ ಸುತ್ತಿನಲ್ಲಿಯೂ ಆರ್ಷಿ ಕಾಯ್ದುಕೊಂಡ ಸ್ಥಿರತೆ ನಮಗೆ ಹೆಮ್ಮೆ ತಂದಿದೆ.

ಈ ವಯಸ್ಸಿನಲ್ಲಿ ಪ್ರತಿ ರೇಸ್‌ ಕೂಡ ಕಲಿಯುವ ಅವಕಾಶವಾಗಿದೆ. ಆಕೆ ಪ್ರತಿಯೊಂದು ಸವಾಲನ್ನು ಧೈರ್ಯ ಮತ್ತು ಸಂಯಮದಿಂದ ಎದುರಿಸುತ್ತಿರುವುದು ನಮಗೆ ಅತ್ಯಂತ ಸಂತಸ ತಂದಿದೆ" ಎಂದರು.ಆರ್‍ಷಿ ಅವರು ಎಫ್‌1 ಅಕಾಡೆಮಿಗೆ (F1 Academy) ಆಯ್ಕೆಯಾದ ಅತ್ಯಂತ ಕಿರಿಯ ರೇಸರ್ ಹಾಗೂ ಏಷ್ಯಾದ ಏಕೈಕ ರಾಷ್ಟ್ರೀಯ ಮಹಿಳಾ ಚಾಂಪಿಯನ್ ಆಗಿದ್ದಾರೆ. ರಾಷ್ಟ್ರೀಯ ಮಟ್ಟದಲ್ಲಿ ಸ್ಪರ್ಧಿಸುತ್ತಿರುವ ಅವರ ಕಾರ್ಟಿಂಗ್ ವೃತ್ತಿಜೀವನಕ್ಕೆ ಈ ಸತತ ಗೆಲುವುಗಳು ಮತ್ತೊಂದು ಮೈಲಿಗಲ್ಲಾಗಿವೆ.

ಈ ಚಾಂಪಿಯನ್‍ಷಿಪ್‌ನ ಆರನೇ ಹಾಗೂ ಅಂತಿಮ ಸುತ್ತು ಅಕ್ಟೋಬರ್ 17 ಮತ್ತು 18, 2026 ರಂದು ನಡೆಯಲಿದೆ.