ಅರ್ಜುನ್​ ನುಡಿದಿದ್ದ ಮಾತು ಕಡೆಗೂ ನಿಜವಾಯ್ತು! ಅಲರ್ಟ್​ ಆಗಿದ್ದಿದ್ರೆ ಖಂಡಿತ ಕೆಕೆಆರ್​ಗೆ ಈ ಪರಿಸ್ಥಿತಿ ಬರ್ತಿರಲಿಲ್ಲ

ಕೋಲ್ಕತ: ನಿನ್ನೆ (ಏ.10) ಈಡನ್​ ಗಾರ್ಡನ್ಸ್​ ಮೈದಾನದಲ್ಲಿ ನಡೆದ ಲಖನೌ ಸೂಪರ್ ಜೈಂಟ್ಸ್ ಮತ್ತು ಕೋಲ್ಕತ ನೈಟ್​ ರೈಡರ್ಸ್​ ನಡುವಿನ ಐಪಿಎಲ್​ 19ನೇ ಆವೃತ್ತಿಯ ಪಂದ್ಯದಲ್ಲಿ ರಿಷಭ್ ಪಂತ್​ ಪಡೆ ರೋಚಕ ಜಯ ಸಾಧಿಸಿತು. ಕೆಕೆಆರ್​ ಗೆಲುವಿನ ಲೆಕ್ಕಾಚಾರವನ್ನು ತಲೆಕೆಳಗಾಗಿಸಿದ ಮುಕುಲ್​ ಚೌಧರಿ ಅವರ ಸ್ಫೋಟಕ ಆಟಕ್ಕೆ ಅನೇಕ ಕ್ರಿಕೆಟ್​ ಪ್ರೇಮಿಗಳು ಫಿದಾ ಆದರು.

ಎಲ್​ಎಸ್​ಜಿ ತಂಡದ ಪರ ವಿಕೆಟ್ ಕೀಪರ್ ಹಾಗೂ ಬ್ಯಾಟರ್​ ಆಗಿ ಕಣಕ್ಕಿಳಿದ ಮುಕುಲ್ ಚೌಧರಿ, ಕೆಕೆಆರ್​ ನೀಡಿದ್ದ 182 ರನ್‌ಗಳ ಗುರಿಯನ್ನು ನಮ್ಮಿಂದ ತಲುಪಲು ಆಗೋದಿಲ್ಲ ಎಂದು ಚಿಂತೆಗೀಡಾಗಿದ್ದ ತಂಡಕ್ಕೆ ಆಸರೆಯ ಭರವಸೆಯನ್ನು ನೀಡಿದ್ದು ಮೈದಾನದಲ್ಲಿದ್ದ ಕ್ರಿಕೆಟ್​ ಪ್ರಿಯರನ್ನು ರೋಮಾಂಚಕಗೊಳಿಸಿತು. ಕೊನೆಯ 4 ಓವರ್​ಗಳಲ್ಲಿ ಎಲ್​ಎಸ್​ಜಿಗೆ 54 ರನ್​ಗಳ ಅಗತ್ಯವಿತ್ತು. ಈ ಸಮಯದಲ್ಲಿ ಕ್ರೀಸ್​ಗೆ ಅಂಟಿ ನಿಂತ ಮುಕಲ್​, ಕೇವಲ 27 ಎಸೆತಗಳಲ್ಲಿ ಅಜೇಯ 54 ರನ್ ಬಾರಿಸುವ ಮೂಲಕ ತಂಡಕ್ಕೆ ರೋಚಕ ಗೆಲುವು ತಂದುಕೊಟ್ಟರು.

ಎಲ್‌ಎಸ್‌ಜಿ ತಂಡದ ಸಹ ಆಟಗಾರ ಅರ್ಜುನ್ ತೆಂಡೂಲ್ಕರ್, ಐಪಿಎಲ್​ ಶುರುವಿಗೂ ಮುನ್ನವೇ ಮುಕುಲ್​ ಸ್ಫೋಟಕ ಆಟದ ಬಗ್ಗೆ ಮಾತನಾಡಿದ್ದರು. ಆತನಿಗೆ ಸಿಕ್ಸರ್, ಪವರ್​ಹಿಟ್ಟಿಂಗ್​ ಸಾಮರ್ಥ್ಯವಿದೆ. ಎದುರಾಳಿ ತಂಡದವರು ಚೌಧರಿ ಕಣಕ್ಕಿಳಿದಾಗ ಎಚ್ಚರಿಕೆಯಿಂದ ಆಡಿಸಿದರೆ ಉತ್ತಮ. ಕಾರಣ, ಪ್ರ್ಯಾಕ್ಟೀಸ್​ ಸಮಯದಲ್ಲಿ ನಾನು ಅವರ 360 ಡಿಗ್ರಿ ಹಿಟ್ಟಿಂಗ್ ಸಾಮರ್ಥ್ಯವನ್ನು ನೋಡಿ ಆಶ್ಚರ್ಯಚಕಿತನಾಗಿದ್ದೆ ಎಂದು ಶುಭಂಕರ್ ಮಿಶ್ರಾ ಅವರೊಂದಿಗಿನ ಪಾಡ್​ಕಾಸ್ಟ್​ ಸಂದರ್ಶನದಲ್ಲಿ ಹೇಳಿದ್ದರು.

ಅರ್ಜುನ್​ ತೆಂಡೂಲ್ಕರ್​ ಆಡಿದ ಮಾತುಗಳು ನಿನ್ನೆಯ ಪಂದ್ಯದಲ್ಲಿ ಕಡೆಗೂ ನಿಜವಾಗಿದ್ದು, ಇದೀಗ ಕ್ರಿಕೆಟ್​ ಪ್ರಿಯರ ಚರ್ಚೆಗೆ ಕಾರಣವಾಗಿದೆ. ನಿಜಕ್ಕೂ ಅರ್ಜುನ್​ ಹೇಳಿದಂತೆ ಕೆಕೆಆರ್​ ವಿರುದ್ಧದ ಮ್ಯಾಚ್​ನಲ್ಲಿ ಅವರು 360 ಡಿಗ್ರಿಯಲ್ಲಿ ಸಿಕ್ಸರ್​ಗಳನ್ನು ಬಾರಿಸಿದರು. ಇದು ಮೈದಾನದಲ್ಲಿ ಕುಳಿತಿದ್ದ ಕ್ರಿಕೆಟ್​ ಅಭಿಮಾನಿಗಳನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿತು,(ಏಜೆನ್ಸೀಸ್).