ಅಂಕಪಟ್ಟಿ ಬಗ್ಗೆ ನಮಗೆ ಚಿಂತೆನೇ ಇಲ್ಲ... ಜಿಟಿ ಎದುರು ಹೀನಾಯ ಸೋಲಿನ ಬೆನ್ನಲ್ಲೇ ಆರ್​ಸಿಬಿ ನಾಯಕನ​​ ಹೇಳಿಕೆ ವೈರಲ್​ | RCB vs GT

RCB vs GT: ನಿನ್ನೆ (ಏ.30) ಅಹಮದಾಬಾದ್​ ಕ್ರೀಡಾಂಗಣದಲ್ಲಿ ನಡೆದ ಗುಜರಾತ್​ ಟೈಟನ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನಡುವಿನ 19ನೇ ಆವೃತ್ತಿಯ ಐಪಿಎಲ್​ ಪಂದ್ಯದಲ್ಲಿ ಶುಭಮನ್ ಗಿಲ್​ ಪಡೆ ಸುಲಭ ಗೆಲುವು ದಾಖಲಿಸಿತು.

ಆರ್​ಸಿಬಿ ನೀಡಿದ್ದ 156 ರನ್​ಗಳ ಸಾಧಾರಣ ಗುರಿಯನ್ನು ಸುಲಭವಾಗಿ ಬೆನ್ನತ್ತಿದ ಗುಜರಾತ್ ಟೈಟನ್ಸ್​, ಇನ್ನೂ 25 ಬಾಲ್​ಗಳು ಉಳಿದಿರುವಂತೆಯೇ ಮತ್ತು ನಾಲ್ಕು ವಿಕೆಟ್‌ಗಳಿಂದ ಪಂದ್ಯವನ್ನು ಗೆದ್ದು ಬೀಗಿತು. ಹೀನಾಯ ಸೋಲಿನ ಬಳಿಕ ಮಾತನಾಡಿದ ರಜತ್ ಪಾಟೀದಾರ್​, ತಂಡದ ಸೋಲಿಗೆ ಏನೆಲ್ಲ ಕಾರಣ ಎಂಬುದನ್ನು ಬೇಸರದಿಂದಲೇ ಹೊರಹಾಕಿದರು.

ವಿಶೇಷವಾಗಿ ಮಿಡಲ್​ ಓವರ್‌ಗಳಲ್ಲಿ ಹೆಚ್ಚು ವಿಕೆಟ್ ನಷ್ಟಗಳು ನಮ್ಮ ಗೆಲುವಿನ ಸಾಧ್ಯತೆಗಳನ್ನು ಛಿದ್ರಗೊಳಿಸಿತು. ತಂಡದ ಸೋಲಿಗೆ ಪ್ರಮುಖ ಕಾರಣವೇ ಬ್ಯಾಟಿಂಗ್ ವೈಫಲ್ಯ. ಶುಭಮನ್ ಗಿಲ್ ಅವರು ಪವರ್ ಪ್ಲೇನಲ್ಲಿ ಆಕ್ರಮಣಕಾರಿಯಾಗಿ ಆಡಿದರು ಮತ್ತು ನಮ್ಮ ಮೇಲೆ ಒತ್ತಡ ಹೇರಿದರು. ಆದರೆ, ತಂಡದ ಬೌಲರ್​ಗಳು ಒಳ್ಳೆಯ ಬೌಲಿಂಗ್‌ನಿಂದ ಸುಧಾರಣೆ ನೀಡಿದರು. ಆದರೂ, ನಾವು ಅಂದುಕೊಂಡ ಗೆಲುವನ್ನು ನಮ್ಮಿಂದ ಸಾಧಿಸಲು ಸಾಧ್ಯವಾಗಲಿಲ್ಲ ಎಂದರು.

ಈ ಪಿಚ್​ನಲ್ಲಿ ನಾವು ಗಳಿಸಿದ ರನ್‌ಗಳು ಸಾಕಾಗಲಿಲ್ಲ. ಆದರೆ, ನಮ್ಮ ಬೌಲರ್‌ಗಳು ಬೌಲಿಂಗ್ ಮಾಡಿದ ರೀತಿ ಮತ್ತು ಪಂದ್ಯವನ್ನು 16ನೇ ಓವರ್‌ವರೆಗೆ ಕೊಂಡೊಯ್ದಿದ್ದು ಸಾರ್ಥಕ. ಈ ಪಿಚ್‌ ಮೊದಲು ಬೌಲಿಂಗ್​ ಮಾಡಿದವರಿಗೆ ವರದಾನವಾಯಿತು. ಮಿಡಲ್​ ಓವರ್​ಗಳಲ್ಲಿ ನಾವು ಹೆಚ್ಚು ರನ್ ಗಳಿಸುವಲ್ಲಿ ವಿಫಲರಾದೆವು. ಮುಂದಿನ ಪಂದ್ಯದಲ್ಲಿ ಇಂತಹ ಮಿಸ್ಟೇಕ್​ಗಳು ರಿಪೀಟ್ ಆಗದಂತೆ ನೋಡಿಕೊಳ್ಳಬೇಕಿದೆ. ಇನ್ನೂ ಹಲವು ಪಂದ್ಯಗಳು ಆಡಲು ಬಾಕಿಯಿವೆ. ನಾವು ಅಂಕಪಟ್ಟಿಯ ಬಗ್ಗೆ ಯೋಚಿಸುತ್ತಿಲ್ಲ. ಉತ್ತಮ ಕ್ರಿಕೆಟ್ ಆಡುವುದಷ್ಟೇ ನಮ್ಮ ಗುರಿ ಎಂದು ರಜತ್ ಪಾಟೀದಾರ್ ಹೇಳಿದರು.

ಮೊದಲು ಬ್ಯಾಟಿಂಗ್ ಮಾಡಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 19.2 ಓವರ್‌ಗಳಲ್ಲಿ 155 ರನ್‌ಗೆ ಆಲೌಟ್ ಆಯಿತು. ಈ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ಗುಜರಾತ್ ಟೈಟನ್ಸ್ ಕೇವಲ 15.5 ಓವರ್‌ಗಳಲ್ಲಿ ಆರು ವಿಕೆಟ್‌ಗಳ ನಷ್ಟಕ್ಕೆ 158 ರನ್ ಗಳಿಸುವ ಮೂಲಕ ಸುಲಭ ಜಯ ಗಳಿಸಿತು. ಈ ಮೂಲಕ ಐಪಿಎಲ್​ ಅಂಕಪಟ್ಟಿಯಲ್ಲಿ 10 ಪಾಯಿಂಟ್​ಗಳ ಮೂಲಕ 5ನೇ ಸ್ಥಾನಕ್ಕೆ ಜಿಗಿದಿದೆ. ಇನ್ನೂ ಆರ್​ಸಿಬಿ ತಮ್ಮ ಉತ್ತಮ ಆಲ್​ರೌಂಡ್​ ಪ್ರದರ್ಶನದಿಂದ ದ್ವಿತೀಯ ಸ್ಥಾನದಲ್ಲಿದೆ,(ಏಜೆನ್ಸೀಸ್).