ಬರ್ತಿದ್ದಾರೆ ವೈಭವ್... ಟೀಮ್​ ಇಂಡಿಯಾದ ಈ ಮೂವರಲ್ಲಿ ಒಬ್ಬರಿಗೆ ಗೇಟ್​ಪಾಸ್​ ಗ್ಯಾರಂಟಿ ಎಂದ ಗವಾಸ್ಕರ್​! Vaibhav Sooryavansh

Vaibhav Sooryavansh : ಪ್ರಸ್ತುತ ನಡೆಯುತ್ತಿರುವ 19ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್​ನ ಭಾಗವಾಗಿ ಈಗಾಗಲೇ ಮೂರು ಪಂದ್ಯಗಳು ಪೂರ್ಣಗೊಂಡಿವೆ. ಈ ಮೂರೂ ಪಂದ್ಯವೂ ಕ್ರೀಡಾಭಿಮಾನಿಗಳಿಗೆ ಭರ್ಜರಿ ಮನರಂಜನೆಯನ್ನು ನೀಡಿವೆ. ಅದರಲ್ಲೂ 15 ವರ್ಷದ ವೈಭವ್​ ಸೂರ್ಯವಂಶಿ ಅವರ ಬ್ಯಾಟಿಂಗ್​ ಕ್ರೀಡಾಭಿಮಾನಿಗಳನ್ನು ಮಂತ್ರಮುಗ್ಧಗೊಳಿಸಿದೆ. 

ಹೌದು, ಸೋಮವಾರ (ಮಾರ್ಚ್​ 30) ರಾತ್ರಿ, ರಾಜಸ್ಥಾನ ರಾಯಲ್ಸ್ ( RR ) ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ( CSK ) ನಡುವೆ ಗುವಾಹಟಿಯ ಬರ್ಸಾಪುರ ಕ್ರಿಕೆಟ್​ ಕ್ರೀಡಾಂಗಣದಲ್ಲಿ ರೋಚಕ ಪಂದ್ಯ ನಡೆಯಿತು. ಇದರಲ್ಲಿ ಅದ್ಭುತ ಪ್ರದರ್ಶನ ನೀಡಿದ ರಾಜಸ್ಥಾನ ರಾಯಲ್ಸ್, ಸಿಎಸ್​ಕೆ ವಿರುದ್ಧ 8 ವಿಕೆಟ್‌ಗಳಿಂದ ಜಯಗಳಿಸಿತು. 

15 ವರ್ಷದ ವೈಭವ್, 19ನೇ ಆವೃತ್ತಿಯ ತನ್ನ ಮೊದಲ ಪಂದ್ಯದಲ್ಲಿ ರಾಜಸ್ಥಾನ ರಾಯಲ್ಸ್ ಪರ ಅದ್ಭುತ ಪ್ರದರ್ಶನ ನೀಡಿದರು. ಸಿಎಸ್​ಕೆ ವಿರುದ್ಧ ಕೇವಲ 15 ಎಸೆತಗಳಲ್ಲಿ ಅರ್ಧಶತಕ ಗಳಿಸಿದರು. ಇದರಲ್ಲಿ ಐದು ಸಿಕ್ಸರ್‌ಗಳು ಮತ್ತು ನಾಲ್ಕು ಬೌಂಡರಿಗಳು ಸೇರಿವೆ. ಒಟ್ಟು 52 ರನ್​ ಗಳಿಸಿದರು. ವೈಭವ್​ ಅವರ ಅಬ್ಬರದ ಬ್ಯಾಟಿಂಗ್​ ನೋಡಿದ ಟೀಮ್​ ಇಂಡಿಯಾದ ಮಾಜಿ ಕ್ರಿಕೆಟಿಗ ಸುನಿಲ್ ಗವಾಸ್ಕರ್, ಅಭಿಶೇಕ್​ ಶರ್ಮಾ, ಶುಭಮಾನ್​ ಗಿಲ್​ ಹಾಗೂ ಸಂಜು ಸ್ಯಾಮ್ಸನ್​ಗೆ ಎಚ್ಚರಿಕೆಯ ಸಂದೇಶವನ್ನು ರವಾನಿಸಿದ್ದಾರೆ. ಅದರಲ್ಲೂ ಅಭಿಷೇಕ್​ ಹೆಸರನ್ನು ಒತ್ತಿ ಹೇಳಿದ್ದಾರೆ.

ಟೀಮ್​ ಇಂಡಿಯಾಗೆ ವೈಭವ್​ ಎಂಟ್ರಿ ಕೊಟ್ಟರೆ ಮೊದಲು ಸಮಸ್ಯೆ ಎದುರಿಸುವ ವ್ಯಕ್ತಿಯೆಂದರೆ ಅದು ಅಭಿಷೇಕ್ ಶರ್ಮಾ ಎಂದು ಗವಾಸ್ಕರ್​ ಹೇಳಿದ್ದಾರೆ. ಶಿಖರ್ ಧವನ್ ಅವರ ವೃತ್ತಿಜೀವನ ನಾಪತ್ತೆಯಾದಂತೆ ಅಭಿಷೇಕ್ ಶರ್ಮಾ ಅವರಿಗೂ ಅದೇ ಪರಿಸ್ಥಿತಿ ಎದುರಾಗುತ್ತದೆ ಎಂದಿದ್ದಾರೆ. ಹೀಗಾಗಿ, ಅಭಿಷೇಕ್ ಅವರು ತಮ್ಮ ಬ್ಯಾಟಿಂಗ್ ಮೇಲೆ ಗಮನಹರಿಸಬೇಕು ಎಂದು ಸಲಹೆ ನೀಡಿದ್ದಾರೆ.

ಟೀಮ್ ಇಂಡಿಯಾದ ಏಕದಿನ ನಾಯಕ ಗಿಲ್ ಮತ್ತು ಸಂಜು ಸ್ಯಾಮ್ಸನ್ ಅವರಂತಹ ಆರಂಭಿಕ ಆಟಗಾರರು ಸಹ ಬಹಳ ಜಾಗರೂಕರಾಗಿರಬೇಕು ಎಂದು ಗವಾಸ್ಕರ್​ ಸೂಚಿಸಿದ್ದಾರೆ. ಏಕೆಂದರೆ, ವೈಭವ್ ಆಗಮನವಾದರೆ ಆರಂಭಿಕ ಸ್ಥಾನ ಆತನಿಗೆ ಭದ್ರವಾಗಲಿದೆ. ಆಗ ಆರಂಭಿಕ ಆಟಗಾರರಾದ ಅಭಿ, ಸಂಜು ಮತ್ತು ಗಿಲ್​ಗೆ ಸಂಕಷ್ಟ ಎದುರಾಗಲಿದೆ ಎಂದಿದ್ದಾರೆ. ಫಾರ್ಮ್​ನಲ್ಲಿ ಸ್ವಲ್ಪ ಎಡವಿದರು ಕೂಡ ಅವಕಾಶಗಳನ್ನು ಕಳೆದುಕೊಳ್ಳಬೇಕಾಗುತ್ತದೆ ಎಂದು ಗವಾಸ್ಕರ್​ ಅವರು ಎಚ್ಚರಿಕೆ ಸಂದೇಶವನ್ನು ರವಾನಿಸಿದ್ದಾರೆ.

ಇನ್ನೂ ವೈಭವ್ ಸೂರ್ಯವಂಶಿ ಆಡುವ ರೀತಿ ನೋಡಿದರೆ, ಅವರು ಭವಿಷ್ಯದಲ್ಲಿ ಕ್ರಿಕೆಟ್ ಅನ್ನು ಆಳುವ ಲಕ್ಷಣಗಳು ಸ್ಪಷ್ಟವಾಗಿ ಗೋಚರಿಸುತ್ತಿವೆ. ವೈಭವ್​ ಅವರು ಭವಿಷ್ಯದ ಸಚಿನ್ ತೆಂಡೂಲ್ಕರ್ ಎಂದು ಗವಾಸ್ಕರ್​ ಹೇಳಿದ್ದಾರೆ. ಅಂದಹಾಗೆ,  ವೈಭವ್ ಸೂರ್ಯವಂಶಿ ಇತ್ತೀಚೆಗೆ ತಮ್ಮ 15 ನೇ ವರ್ಷಕ್ಕೆ ಕಾಲಿಟ್ಟಿದ್ದಾರೆ. ಇದರೊಂದಿಗೆ, ಅವರಿಗೆ ಟೀಮ್ ಇಂಡಿಯಾ ಪರ ಆಡುವ ಅವಕಾಶ ಸಿಕ್ಕಿದೆ. ಮಾರ್ಚ್ 27, 2026 ರಂದು 15 ವರ್ಷ ತುಂಬಿದ ವೈಭವ್​, ಐಸಿಸಿಯ ಕನಿಷ್ಠ ವಯಸ್ಸಿನ ಅವಶ್ಯಕತೆಯನ್ನು ಪೂರೈಸಿದ್ದಾರೆ. ಹಿರಿಯ ರಾಷ್ಟ್ರೀಯ ಆಯ್ಕೆಗೆ ಪ್ರಾಥಮಿಕ ಅಡಚಣೆ ಇದೀಗ ನಿವಾರಣೆ ಆಗಿದೆ. ಮುಂದಿನ ದಿನಗಳಲ್ಲಿ ಟೀಮ್​ ಇಂಡಿಯಾದ ಹಿರಿಯರ ತಂಡಕ್ಕೆ ಎಂಟ್ರಿಯಾಗುವುದು ಖಚಿತವಾಗಿದೆ, (ಏಜೆನ್ಸೀಸ್​).