ವೈಭವ್​ ವಿಷಯದಲ್ಲಿ ಈ ಮಿಸ್ಟೇಕ್ ಮಾಡಬಾರದಿತ್ತು! ಟೀಮ್​ ಇಂಡಿಯಾಗೆ ಮಿ.360 ಎಬಿ ಡಿವಿಲಿಯರ್ಸ್ ಎಚ್ಚರಿಕೆ

Vaibhav Sooryavanshi: ಟೀಮ್ ಇಂಡಿಯಾದ ಯುವ ಬ್ಯಾಟಿಂಗ್ ಸೆನ್ಸೇಷನ್​, 15 ವರ್ಷದ ವೈಭವ್ ಸೂರ್ಯವಂಶಿಯನ್ನು ಐರ್ಲೆಂಡ್​ ಮತ್ತು ಇಂಗ್ಲೆಂಡ್​ ಪ್ರವಾಸಕ್ಕೆ ಕರೆದುಕೊಂಡರೂ ತಂಡದಲ್ಲಿ ಆಡಿಸದೆ ಕೇವಲ ಬೆಂಚ್​ನಲ್ಲಿ ಕೂರಿಸಿರುವುದು ಸದ್ಯ ಕ್ರಿಕೆಟ್​ ಪ್ರೇಮಿಗಳು ಮತ್ತು ಮಾಜಿ ಕ್ರಿಕೆಟಿಗರ ಅಸಮಾಧಾನವನ್ನು ಸ್ಫೋಟಿಸಿದೆ.

ವಿಶ್ವ ಕ್ರಿಕೆಟ್​ನಲ್ಲಿ ವೈಭವ್​ ಹೆಸರು ಭಾರಿ ಸದ್ದು ಮಾಡುತ್ತಿದ್ದು, ಐರ್ಲೆಂಡ್​ ವಿರುದ್ಧದ 2 ಪಂದ್ಯಗಳ ಟಿ20 ಸರಣಿಯಲ್ಲಿ ಕ್ಲೀನ್​ಸ್ವೀಪ್​ ಆದ ಟೀಮ್ ಇಂಡಿಯಾ ಪರ ಸೂರ್ಯವಂಶಿ ಆಡಲಿಲ್ಲ. ಕಾರಣ, ಮ್ಯಾನೇಜ್​ಮೆಂಟ್​ ಅವರಿಗೆ ಕೊಡದ ಅವಕಾಶ. ಹೀನಾಯ ಸೋಲು, ಭಾರಿ ಮುಖಭಂಗದ ಬಳಿಕವಾದರೂ ಇಂಗ್ಲೆಂಡ್​ ವಿರುದ್ಧದ ಐದು ಪಂದ್ಯಗಳ ಟಿ20 ಸರಣಿಗೆ ತಂಡಕ್ಕೆ ವೈಭವ್​ರನ್ನು ಸೇರಿಸಿಕೊಳ್ಳುತ್ತಾರೆ ಎಂದೇ ಎಲ್ಲರೂ ನಿರೀಕ್ಷಿಸಿದ್ದರು. ಆದರೆ, ಅದಕ್ಕೂ ತಣ್ಣೀರೆರಚಲಾಯಿತು.  

ಕೇವಲ ಭಾರತೀಯರು ಮಾತ್ರವಲ್ಲ, ಐರ್ಲೆಂಡ್​ ಮತ್ತು ಇಂಗ್ಲೆಂಡ್ ಕ್ರಿಕೆಟ್​ ಅಭಿಮಾನಿಗಳು ಸಹ ವೈಭವ್​ರನ್ನು ಮೈದಾನದಲ್ಲಿ ನೋಡಲು ಹೆಚ್ಚಿನ ಸಂಖ್ಯೆಯಲ್ಲಿ ಟಿಕೆಟ್​ ಖರೀದಿಸಿ ಬರುತ್ತಿದ್ದಾರೆ. ಆದರೆ, ಬೆಂಚ್​ಗೆಷ್ಟೇ ಸೀಮಿತವಾಗಿರುವ ಯುವ ಬ್ಯಾಟರ್​ನನ್ನು ನೋಡಿ ಬೇಸರಗೊಂಡಿದ್ದಾರೆ. ಅತ್ತ ಇಂಗ್ಲೆಂಡ್​ ಎದುರು ಮೊದಲ ಪಂದ್ಯವು ವೈಟ್​ ವಾಶ್ ಆದರೂ ಟೀಮ್ ಇಂಡಿಯಾ ಬ್ಯಾಟಿಂಗ್ ಎಂದಿನಂತೆ ಕಳಪೆಯಾಗಿತ್ತು. ಸತತ ಮೂರು ಟಿ20 ಪಂದ್ಯಗಳಲ್ಲಿ ಕಳಪೆ ಪ್ರದರ್ಶನ ತೋರಿರುವ ಸಂಜು ಸ್ಯಾಮ್ಸನ್​, ಪರೋಕ್ಷವಾಗಿ ವೈಭವ್​ ಆಟಕ್ಕೆ ದಾರಿ ಮಾಡಿಕೊಟ್ಟಿದ್ದಾರೆ. ಇಷ್ಟಾದರೂ ಗಂಭೀರ್ ಪಡೆ ಅವರಿಗೆ ಅವಕಾಶ ಕೊಡಲು ಹಿಂದೇಟು ಹಾಕುತ್ತಿರುವುದು ದಕ್ಷಿಣ ಆಫ್ರಿಕಾದ ಮಾಜಿ ಕ್ಯಾಪ್ಟನ್​, ಆರ್​ಸಿಬಿ ಆಟಗಾರ ಎಬಿ ಡಿವಿಲಿಯರ್ಸ್​ರನ್ನು ಕೆರಳಿಸಿದೆ.  

ಸಂಜು ಸ್ಯಾಮ್ಸನ್​ ಕಳಪೆ ಫಾರ್ಮ್​ ಬೆನ್ನಲ್ಲೇ ವೈಭವ್​ರನ್ನು ಆಡಿಸಬೇಕು ಎಂದು ಫ್ಯಾನ್ಸ್ ಒತ್ತಾಯಗಳ ಬೆನ್ನಲ್ಲೇ ಡಿವಿಲಿಯರ್ಸ್​ ಟೀಮ್ ಇಂಡಿಯಾಗೆ ಕಣ್ತೆರೆಯುವಂತೆ ಹೇಳಿದ್ದಾರೆ. ವೈಭವ್ ಅವರನ್ನು ಇನ್ನೂ ಅಂತಿಮ ತಂಡದಲ್ಲಿ ಸೇರಿಸದಿರುವುದು ದುರದೃಷ್ಟಕರ. ಐರ್ಲೆಂಡ್ ಸರಣಿಯಲ್ಲಿ ಅವರಿಗೆ ಉತ್ತಮ ಅವಕಾಶವಿತ್ತು. ಆದರೆ, ಇನ್ನೂ ಅವರನ್ನು ಆಡಿಸಿಲ್ಲ. ಈಗ ಅಲ್ಲವೆಂದರೆ ಅವರನ್ನು ಇನ್ಯಾವಾಗ ಆಡಿಸುತ್ತೀರಿ? ಐಪಿಎಲ್‌ನಲ್ಲಿ ಅಬ್ಬರದ ಪ್ರದರ್ಶನ ತೋರಿದಾಗಲೇ ಐರ್ಲೆಂಡ್​ನಂತ ಕ್ರಿಕೆಟ್​ ಶಿಶು ಎದುರು ಆಡಲು ಬಿಡಬೇಕಿತ್ತು ಎಂದರು.  

"ಇಂಗ್ಲೆಂಡ್ ವಿರುದ್ಧದ ಮೊದಲ ಟಿ20 ರದ್ದಾಯಿತು. ಈಗ ಭಾರತೀಯ ತಂಡವು ಬಲಿಷ್ಠವಾಗಿ ವಾಪಾಸ್​ ಆಗಬೇಕಿದೆ. ಯುಕೆಯಲ್ಲಿನ ಪರಿಸ್ಥಿತಿಗಳು ಉಳಿದ ಮೈದಾನಗಳಿಗಿಂತ ಭಿನ್ನ. ಐಪಿಎಲ್​ನಂತೆ ನೀವು 250, 260 ರನ್​ ಗಳಿಸಲು ಸಾಧ್ಯವಿಲ್ಲ. ಕೆಲವೊಮ್ಮೆ ಅಲ್ಲಿನ ಪಿಚ್​ಗಳಲ್ಲಿ 140 ಅಥವಾ 160 ಉತ್ತಮ ಸ್ಕೋರ್ ಆಗಿರುತ್ತದೆ" ಎಂದು ಡಿವಿಲಿಯರ್ಸ್ ಹೇಳಿದ್ದಾರೆ,(ಏಜೆನ್ಸೀಸ್).