2 ದಿನಕ್ಕೆ ಅಂತ್ಯ, 60 ಕೋಟಿ ರೂ.ಗೂ ಅಧಿಕ! ಭಾರೀ ನಷ್ಟ ಅನುಭವಿಸಿದ ಆಸ್ಟ್ರೇಲಿಯಾ ಕ್ರಿಕೆಟ್​ | ASHES TEST

ಆಸ್ಟ್ರೇಲಿಯಾ: ಆ್ಯಶಸ್ ಸರಣಿಯ ಭಾಗವಾಗಿ ಮೆಲ್ಬೋರ್ನ್‌ನಲ್ಲಿ ನಡೆದ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ನಡುವಿನ ನಾಲ್ಕನೇ ಟೆಸ್ಟ್ ಪಂದ್ಯ ಕೇವಲ ಎರಡು ದಿನಗಳಲ್ಲಿ ಮುಗಿದಿದ್ದು, ಇದೀಗ ಆಸ್ಟ್ರೇಲಿಯಾ ಕ್ರಿಕೆಟ್​ ಮಂಡಳಿಗೆ ಭಾರೀ ನಷ್ಟವನ್ನು ತಂದೊಡ್ಡಿದೆ.

ಮೊದಲ ದಿನದಂದು 20 ವಿಕೆಟ್‌ ಮತ್ತು ಎರಡನೇ ದಿನದಂದು 16 ವಿಕೆಟ್‌ಗಳು ಉರುಳಿದವು. ಪಂದ್ಯವು ಕೇವಲ ಎರಡೇ ದಿನಗಳಲ್ಲಿ ಮುಗಿದ ಕಾರಣ ಮೆಲ್ಬೋರ್ನ್ ಪಿಚ್ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಟೀಕೆಗಳು ವ್ಯಕ್ತವಾಗಿವೆ. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಆಸೀಸ್, ಮೊದಲ ಇನ್ನಿಂಗ್ಸ್‌ನಲ್ಲಿ 152 ರನ್‌ ಗಳಿಸಿದರೆ, ಇಂಗ್ಲೆಂಡ್ 110 ರನ್‌ಗೆ ಆಲೌಟ್ ಆಯಿತು. ಇದು ಆಸ್ಟ್ರೇಲಿಯಾಕ್ಕೆ 42 ರನ್‌ಗಳ ಮುನ್ನಡೆಯನ್ನು ನೀಡಿತು. ಆದಾಗ್ಯೂ, ಎರಡನೇ ಇನ್ನಿಂಗ್ಸ್‌ನಲ್ಲಿ ಆಸೀಸ್ 132 ರನ್‌ಗೆ ಪತನಗೊಂಡಿತು.

ಮೊದಲ ಇನ್ನಿಂಗ್ಸ್​ನಲ್ಲಿ ಮುನ್ನಡೆ ಸಾಧಿಸಿದ ನಂತರ ಆಸೀಸ್ ಇಂಗ್ಲೆಂಡ್‌ಗೆ 175 ರನ್‌ಗಳ ಗುರಿಯನ್ನು ನೀಡಿತು. ಇಂಗ್ಲೆಂಡ್​ 6 ವಿಕೆಟ್‌ ನಷ್ಟಕ್ಕೆ ಟಾರ್ಗೆಟ್​ ಅನ್ನು ಸುಲಭವಾಗಿ ತಲುಪಿತು. ಒಂದೆಡೆ ಪಿಚ್​ ಕುರಿತು ಟೀಕೆಗಳ ದಾಳಿ ಮುಂದುವರಿದಿದ್ದರೆ, ಮತ್ತೊಂದೆಡೆ ಕ್ರಿಕೆಟ್ ಆಸ್ಟ್ರೇಲಿಯಾ ಭಾರೀ ಹೊಡೆತ ಅನುಭವಿಸಿದೆ. ಐದು ದಿನಗಳ ಕಾಲ ನಡೆಯಬೇಕಿದ್ದ ಪಂದ್ಯ ಎರಡು ದಿನಗಳಲ್ಲಿ ಮುಕ್ತಾಯಗೊಂಡಿದ್ದು, ಸುಮಾರು 60 ಕೋಟಿ ರೂ. ನಷ್ಟಕ್ಕೆ ಕಾರಣವಾಗಿದೆ ಎಂದು ವರದಿಗಳು ಉಲ್ಲೇಖಿಸಿವೆ.

ಟಿಕೆಟ್ ಮಾರಾಟ, ಪ್ರಸಾರ ಮತ್ತು ಜಾಹೀರಾತಿನಿಂದ ಕ್ರಿಕೆಟ್ ಆಸ್ಟ್ರೇಲಿಯಾ ನಿರೀಕ್ಷಿಸಿದ ಆದಾಯವನ್ನು ಕಳೆದುಕೊಂಡಿದೆ. ಬಾಕ್ಸಿಂಗ್ ಡೇ ಟೆಸ್ಟ್‌ನಲ್ಲಿ ಆಸೀಸ್​ ವಿರುದ್ಧದ ಗೆದ್ದ ಇಂಗ್ಲೆಂಡ್, 14 ವರ್ಷಗಳ ಸೋಲಿನ ಸರಣಿಗೆ ಗುಡ್​ಬೈ ಹೇಳಿತು. ಇಂಗ್ಲೆಂಡ್ ಕೊನೆಯ ಬಾರಿಗೆ 2011ರಲ್ಲಿ ಆಸ್ಟ್ರೇಲಿಯಾವನ್ನು ತವರಿನಲ್ಲಿ ಸೋಲಿಸಿತು. 14 ವರ್ಷಗಳಲ್ಲಿ ನಡೆದ 18 ಪಂದ್ಯಗಳಲ್ಲಿ ಒಂದೇ ಒಂದು ಪಂದ್ಯವನ್ನು ಗೆದ್ದಿರಲಿಲ್ಲ. ಅದಾದ ಬಳಿಕ ಬಾಕ್ಸಿಂಗ್ ಡೇ ಟೆಸ್ಟ್‌ನಲ್ಲಿ ಆಸ್ಟ್ರೇಲಿಯಾವನ್ನು ಸೋಲಿಸಿದ್ದು ಇದೇ ಮೊದಲು,(ಏಜೆನ್ಸೀಸ್).