ಜೋಕೊವಿಕ್‌ಗೆ ಶಾಕ್ ನೀಡಿದ 19 ವರ್ಷದ ಫೋನ್ಸೆಕಾ: ಮುಂದಿನ ವರ್ಷ ಜೋಕೋ ಪ್ಯಾರಿಸ್‌ನಲ್ಲಿ ಆಡುವುದು ಡೌಟ್!

ಹಾಲಿ ಚಾಂಪಿಯನ್ ಕಾರ್ಲೋಸ್ ಅಲ್ಕರಾಜ್ ಗೈರಿನ ಜತೆಗೆ ವಿಶ್ವ ನಂ.1 ಜನ್ನಿಕ್ ಸಿನ್ನರ್ 2ನೇ ಸುತ್ತಿನಲ್ಲಿ ಹೊರಬಿದ್ದ ನಂತರ ದಾಖಲೆಯ 25ನೇ ಗ್ರಾಂಡ್ ಸ್ಲಾಂ ಪ್ರಶಸ್ತಿ ಜಯಿಸುವ ಅವಕಾಶ ವೃದ್ಧಿಸಿಕೊಂಡಿದ್ದ ಸೆರ್ಬಿಯಾ ತಾರೆ ನೊವಾಕ್ ಜೋಕೊವಿಕ್ 3ನೇ ಸುತ್ತಿನಲ್ಲಿ ಮುಗ್ಗರಿಸಿ ನಿರಾಸೆ ಅನುಭವಿಸಿದ್ದಾರೆ.

2023ರ ಯುಎಸ್ ಓಪನ್‌ನಲ್ಲಿ ಕೊನೆಯದಾಗಿ ಚಾಂಪಿಯನ್ ಎನಿಸಿರುವ 39 ವರ್ಷದ ಜೋಕೊವಿಕ್ ಶುಕ್ರವಾರ ರಾತ್ರಿ ನಡೆದ 3ನೇ ಸುತ್ತಿನಲ್ಲಿ 6-4, 6-4, 3-6, 5-7, 5-7 ಸೆಟ್‌ಗಳ ಕಠಿಣ ಹೋರಾಟದಲ್ಲಿ 19 ವರ್ಷದ ಬ್ರೆಜಿಲ್‌ನ ಜೋವೊ ಫೋನ್ಸೆಕಾ ವಿರುದ್ಧ ಪರಾಭವಗೊಂಡರು. 4 ಗಂಟೆ 53 ನಿಮಿಷಗಳ ಸುದೀರ್ಘ ಹೋರಾಟದಲ್ಲಿ ಆರಂಭಿಕ ಎರಡು ಸೆಟ್‌ಗಳ ಮುನ್ನಡೆಯ ನಡುವೆಯೂ ಜೋಕೊವಿಕ್ ಸೋಲು ಕಂಡ 2ನೇ ದೃಷ್ಟಾಂತ ಇದಾಗಿದೆ. ಜೋಕೋ 2023ರ ಯುಎಸ್ ಓಪನ್ ಬಳಿಕ ಒಂದೂ ಗ್ರಾಂಡ್ ಸ್ಲಾಂ ಗೆಲ್ಲದ ಬರ ಮುಂದುವರಿದಿದೆ. 2008ರಲ್ಲಿ ಜೋಕೋ ತನ್ನ ಚೊಚ್ಚಲ ಗ್ರಾಂಡ್ ಸ್ಲಾಂ ಜಯಿಸಿದಾಗ ಫೋನ್ಸೆಕಾ ಕೇವಲ ಒಂದೂವರೆ ವರ್ಷದ ಮಗುವಾಗಿದ್ದರು.