ಕರ್ನಾಟಕ ಇನಿಂಗ್ಸ್​ ಮುನ್ನಡೆ ಸನಿಹ: ನಾಯಕ ಮಯಾಂಕ್​, ಪಡಿಕ್ಕಲ್​ ಭರ್ಜರಿ ಶತಕ

ಅವಿನಾಶ್​ ಜೈನಹಳ್ಳಿ ಮೈಸೂರು

ನಾಯಕ ಮಯಾಂಕ್​ ಅಗರ್ವಾಲ್​ (114 ರನ್​, 179 ಎಸೆತ, 10 ಬೌಂಡರಿ)ಸತತ ಎರಡನೇ ಶತಕ ಹಾಗೂ ಯುವ ಎಡಗೈ ಬ್ಯಾಟರ್​ ದೇವದತ್​ ಪಡಿಕ್ಕಲ್​ (103 ರನ್​, 143 ಎಸೆತ, 13 ಬೌಂಡರಿ) ಬಾರಿಸಿದ ಭರ್ಜರಿ ಶತಕದ ನೆರವಿನಿಂದ ಆತಿಥೇಯ ಕರ್ನಾಟಕ ತಂಡ ಪ್ರತಿಷ್ಠಿತ ರಣಜಿ ಟ್ರೋಫಿ ದೇಶೀಯ ಟೂರ್ನಿಯಲ್ಲಿ ಪ್ರವಾಸಿ ಗೋವಾ ತಂಡದ ಎದುರು ಮೇಲುಗೈ ಸಾಧಿಸಿದ್ದು, ಇನಿಂಗ್ಸ್​ ಮುನ್ನಡೆಯ ಸನಿಯದಲ್ಲಿದೆ.

ಮಾನಸಗಂಗೋತ್ರಿಯ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್​(ಗ್ಲೇಡ್ಸ್​) ಮೈದಾನದಲ್ಲಿ ನಡೆಯುತ್ತಿರುವ "ಸಿ' ಗುಂಪಿನ ಪಂದ್ಯದ ಎರಡನೇ ದಿನವಾದ ಶನಿವಾರ 8 ವಿಕೆಟ್​ಗೆ 228 ರನ್​ಗಳಿಂದ ದಿನದಾಟ ಆರಂಭಿಸಿದ ಪ್ರವಾಸಿ ಗೋವಾ ತಂಡ 110.1 ಓವರ್​ಗಳಲ್ಲಿ 321ರನ್​ಗಳಿಗೆ ಮೊದಲ ಇನಿಂಗ್ಸ್​ ಮುಗಿಸಿತು.

ಬಳಿಕ ಬ್ಯಾಟಿಂಗ್​ ಆರಂಭಿಸಿದ ಕರ್ನಾಟಕ ತಂಡ ದಿಟ್ಟ ಉತ್ತರ ನೀಡಿದ್ದು, ದಿನದಾಂತ್ಯಕ್ಕೆ 64 ಓವರ್​ಗಳಲ್ಲಿ 4 ವಿಕೆಟ್​ಗೆ 253 ರನ್​ಗಳಿಸಿದೆ. ಇನಿಂಗ್ಸ್​ ಮುನ್ನಡೆ ಸಾಧಿಸಲು ಇನ್ನು 68 ರನ್​ಗಳ ಅವಶ್ಯಕತೆ ಇದ್ದು, ಮೈಸೂರಿನ ಸ್ಥಳಿಯ ಪ್ರತಿಭೆ ನಿಕಿನ್​ ಜೋಸ್​ (3*) ಮತ್ತು ಶರತ್​ ಶ್ರೀನಿವಾಸ್​(0*) ಜೋಡಿ ಮೂರನೇ ದಿನಕ್ಕೆ ಬ್ಯಾಟಿಂಗ್​ ಕಾಯ್ದುಕೊಂಡಿದೆ.

ಗೋವಾ 321. ಕರ್ನಾಟಕ: 64 ಓವರ್​ಗಳಲ್ಲಿ 4 ವಿಕೆಟ್​ಗೆ 253:(ಡಿ.ನಿಶ್ಚಲ್​ 16, ಮಯಾಂಕ್​ 114, ಪಡಿಕಲ್​ 103, ನಿಕಿನ್​ ಜೋಶ್​ 3*, ಎ.ಸಿ. ರೋಹಿತ್​ 2, ಶರತ್​ ಶ್ರೀನಿವಾಸ್​ 0 *, ದರ್ಶನ್​ ಮಿಸಾಲ್​ 68ಕ್ಕೆ 2, ರೋಹಿತ್​ 65ಕ್ಕೆ 2)

ಮಯಾಂಕ್​&ಪಡಿಕ್ಕಲ್​ ಭದ್ರ ಅಡಿಪಾಯ

ಆರಂಭಿಕರಾದ ಡಿ.ನಿಶ್ಚಲ್​(16) ಹಾಗೂ ಮಯಾಂಕ್​ ಅಗರ್ವಾಲ್​ ಜೋಡಿ ಬೇಗನೇ ಬೇರ್ಪಟ್ಟಿತು. ಈ ಜೋಡಿ 33 ಎಸೆತಗಳಲ್ಲಿ 27 ರನ್​ಗಳಿಸಿದ್ದಾಗ ಡಿ.ನಿಶ್ಚಲ್​, ಗೋವಾ ತಂಡದ ನಾಯಕ ದರ್ಶನ್​ ಮಿಸಾಲ್​ ಬೌಲಿಂಗ್​ನಲ್ಲಿ ಎಲ್​ಬಿಗೆ ಬಲಿಯಾದರು. ಪರಿಣಾಮ ಆತಿಥೇಯ ತಂಡ ಭೋಜನ ವಿರಾಮದ ವೇಳೆಗೆ 5.3 ಓವರ್​ಗಳಲ್ಲಿ 27 ರನ್​ಗಳಿಗೆ 1 ವಿಕೆಟ್​ ಕಳೆದುಕೊಂಡು ಆರಂಭಿಕ ಆಘಾತ ಎದುರಿಸಿತು.

ನಿಶ್ಚಲ್​ ಔಟಾದ ಬಳಿಕ ಮಯಾಂಕ್​ ಜತೆಗೂಡಿದ ದೇವದತ್​ ಪಡಿಕ್ಕಲ್​ ಇನಿಂಗ್ಸ್​ ಕಟ್ಟಲು ಮುಂದಾದರು. ಜವಾಬ್ದಾರಿಯುತ ಬ್ಯಾಟಿಂಗ್​ ಪ್ರದರ್ಶಿಸಿ ಪ್ರವಾಸಿ ತಂಡಕ್ಕೆ ದಿಟ್ಟ ಉತ್ತರ ನೀಡಿದ ಈ ಜೋಡಿ 2ನೇ ವಿಕೆಟ್​ಗೆ 298 ಎಸೆತಗಳಲ್ಲಿ 209 ರನ್​ ಪೇರಿಸಿ ಕರ್ನಾಟಕಕ್ಕೆ ಭದ್ರ ಅಡಿಪಾಯ ಒದಗಿಸಿತು. ಗೋವಾ ಬೌಲರ್​ಗಳನ್ನು ದಂಡಿಸಿದ ಇವರಿಬ್ಬರು ಭೋಜನಾ ವಿರಾಮದಿಂದ ಚಹಾ ವಿರಾಮದ ನಡುವಿನ 30 ಓವರ್​ ಸರಾಗವಾಗಿ ಬ್ಯಾಟಿಂಗ್​ ನಡೆಸಿ 122 ರನ್​ ಪೇರಿಸಿದರು. ಅರ್ಜುನ್​ ತೆಂಡುಲ್ಕರ್​ ಎಸೆದ ಇನಿಂಗ್ಸ್​ನ 52ನೇ ಓವರ್​ನಲ್ಲಿ ಪಡಿಕಲ್​ ಬೌಂಡರಿ ಸೇರಿ 6 ರನ್​ ಕಸಿದು ಶತಕ ಪೂರೈಸಿದರೆ, ಮರು ಓವರ್​ನಲ್ಲಿ ನಾಯಕ ಮಯಾಂಕ್​ ಬೌಂಡರಿಯೊಂದಿಗೆ ಶತಕ ಸಿಡಿಸಿದರು. ಶತಕಗಳಿಸಿದ ಬೆನ್ನಲೇ ಪಡಿಕಲ್​&ಮಯಾಂಕ್​ ಜೋಡಿ ಬೇರ್ಪಟ್ಟಿತು.

ಗಮನ ಸೆಳೆದ ಅರ್ಜುನ್​ ತೆಂಡುಲ್ಕರ್​:  ಆತಿಥೇಯ ಕರ್ನಾಟಕ ತಂಡ ಉತ್ತಮ ಬೌಲಿಂಗ್​ ನಿರ್ವಹಣೆಯ ನೆರವಿನಿಂದ ಅಲ್ಪಮೊತ್ತಕ್ಕೆ ಕುಸಿಯುವ ಭೀತಿ ಎದುರಿಸಿದ ಗೋವಾ ತಂಡಕ್ಕೆ ಟೀಮ್​ ಇಂಡಿಯಾ ದಿಗ್ಗಜ ಸಚಿನ್​ ತೆಂಡುಲ್ಕರ್​ ಪುತ್ರ ಅರ್ಜುನ್​ ತೆಂಡುಲ್ಕರ್​(52 ರನ್​,112 ಎಸೆತ, 3 ಬೌಂಡರಿ, 1 ಸಿಕ್ಸರ್​) ಮತ್ತು ಹೆರಾಂಬ್​ ಪರಬ್​(53 ರನ್​, 81 ಎಸೆತ,8 ಬೌಂಡರಿ, 1 ಸಿಕ್ಸರ್​) ಜೋಡಿ ಸಮಯೋಚಿತ ಬ್ಯಾಟಿಂಗ್​ ಮಾಡುವ ಮೂಲಕ ನೆರವಾಯಿತು. ಈ ಜೋಡಿ 9ನೇ ವಿಕೆಟ್​ಗೆ 93 ಪೇರಿಸಿ ತಂಡಕ್ಕೆ ಚೇತರಿಕೆ ನೀಡಿತು. ಸ್ಥಳಿಯ ಪ್ರತಿಭೆ ಎಂ.ವೆಂಕಟೇಶ್​, ಹೆರಾಂಬ್​ ಪರಬ್​ ಹಾಗೂ ಅರ್ಜುನ್​ ತೆಂಡುಲ್ಕರ್​ ವಿಕೆಟ್​ ಪಡೆದು ಮಿಂಚಿದರು.