ವಿಶ್ವಕಪ್​ಗೆ ಕಡೆಗಣಿಸಲ್ಪಟ್ಟ ಬೆನ್ನಲ್ಲೇ ಇಂಗ್ಲೆಂಡ್​ನತ್ತ ಮುಖ ಮಾಡಿದ ಚಾಹಲ್​!

ನವದೆಹಲಿ: ಸೀಮಿತ ಓವರ್​ ಕ್ರಿಕೆಟ್​ನಲ್ಲಿ ಹಿಂದೊಮ್ಮೆ ಟೀಮ್​ ಇಂಡಿಯಾದ ಪ್ರಮುಖ ಸ್ಪಿನ್ನರ್​ ಎನಿಸಿದ್ದ ಯಜುವೇಂದ್ರ ಚಾಹಲ್​ ಇತ್ತೀಚೆಗೆ ಕಡೆಗಣಿಸಲ್ಪಟ್ಟಿದ್ದಾರೆ. ಏಷ್ಯಾಕಪ್​&ವಿಶ್ವಕಪ್​ ತಂಡಗಳಲ್ಲಿ ಸ್ಥಾನ ಪಡೆಯದೆ ನಿರಾಸೆ ಅನುಭವಿಸಿರುವ ರಿಸ್ಟ್​ ಸ್ಪಿನ್ನರ್​ ಯಜುವೇಂದ್ರ ಚಾಹಲ್​ ಈಗ ಇಂಗ್ಲೆಂಡ್​ನತ್ತ ಮುಖ ಮಾಡಿದ್ದು, ಕೌಂಟಿ ಚಾಂಪಿಯನ್​ಷಿಪ್​ನಲ್ಲಿ ಕೆಂಟ್​ ತಂಡದ ಪರ ಆಡಲು ಸಿದ್ಧರಾಗಿದ್ದಾರೆ.

"ಇಂಗ್ಲಿಷ್​ ಕೌಂಟಿ ಕ್ರಿಕೆಟ್​ ಆಡುವುದು ನನಗೆ ಅತ್ಯಂತ ಕಾತರದ ಸವಾಲೆನಿಸಿದೆ. ನಾನಿದನ್ನು ಎದುರು ನೋಡುತ್ತಿದ್ದೇನೆ' ಎಂದು 33 ವರ್ಷದ ಚಾಹಲ್​ ಹೇಳಿದ್ದಾರೆ. ಚಾಹಲ್​ ಕೆಂಟ್​ ತಂಡ ಸೇರಿದ 2ನೇ ಭಾರತೀಯರೆನಿಸಿದ್ದಾರೆ. ಎಡಗೈ ವೇಗಿ ಅರ್ಷದೀಪ್​ ಸಿಂಗ್​ ಈಗಾಗಲೆ ಕೆಂಟ್​ ತಂಡದ ಪರ ಆಡುತ್ತಿದ್ದಾರೆ.

ತವರಿನ ವಿಶ್ವಕಪ್​ ತಂಡದಲ್ಲಿ ಸ್ಥಾನ ಪಡೆಯದಿರುವ ನಡುವೆ ಚಾಹಲ್​ ವೈಟ್​ಬಾಲ್​ನಿಂದ ರೆಡ್​ಬಾಲ್​ ಕ್ರಿಕೆಟ್​ನತ್ತ ಗಮನಹರಿಸಿರುವುದು ಅಚ್ಚರಿ ಎನಿಸಿದೆ. ದೇಶೀಯ ಕ್ರಿಕೆಟ್​ನಲ್ಲೂ ಅವರು ಹೆಚ್ಚಿನ ಪ್ರಥಮ ದರ್ಜೆ ಪಂದ್ಯ ಆಡಿದವರಲ್ಲ. ಕಳೆದ ರಣಜಿ ಟ್ರೋಫಿಯಲ್ಲಿ ಹರಿಯಾಣ ಪರ ಕೇವಲ 2 ಪಂದ್ಯ ಆಡಿದ್ದರು. 33 ಪ್ರಥಮ ದರ್ಜೆ ಪಂದ್ಯಗಳಲ್ಲಿ 87 ವಿಕೆಟ್​ಗಳನ್ನಷ್ಟೇ ಗಳಿಸಿದ್ದಾರೆ. ಭಾರತ ಪರ ಎಂದೂ ಟೆಸ್ಟ್​ ಆಡಿದವರಲ್ಲ.

ಸೀಮಿತ ಓವರ್​ ಕ್ರಿಕೆಟ್​ನಲ್ಲಿ ಚಾಹಲ್​ ರಿಸ್ಟ್​ ಸ್ಪಿನ್​ನಿಂದ ಹೆಚ್ಚಿನ ಯಶ ಕಂಡಿದ್ದಾರೆ. 72 ಏಕದಿನ ಪಂದ್ಯಗಳಲ್ಲಿ 121 ವಿಕೆಟ್​ ಮತ್ತು 80 ಟಿ20 ಪಂದ್ಯಗಳಲ್ಲಿ 96 ವಿಕೆಟ್​ ಕಬಳಿಸಿದ್ದಾರೆ. 2019ರ ವಿಶ್ವಕಪ್​ನಲ್ಲಿ ಆಡಿದ್ದ ಚಾಹಲ್​ ನಂತರದಲ್ಲಿ 2021ರ ಟಿ20 ವಿಶ್ವಕಪ್​ಗೆ ಕಡೆಗಣಿಸಲ್ಪಟ್ಟಿದ್ದರು. 2022ರ ಟಿ20 ವಿಶ್ವಕಪ್​ ತಂಡದಲ್ಲಿ ಸ್ಥಾನ ಪಡೆದಿದ್ದರೂ, ಒಂದೂ ಪಂದ್ಯ ಆಡುವ ಅವಕಾಶ ಪಡೆದಿರಲಿಲ್ಲ.

https://www.vijayavani.net/kl-rahul-only-karnataka-player-in-worldcup-squad-but-karnatka-connection-to-4-players