ದಕ್ಷಿಣ ಆಫ್ರಿಕಾ ಗೆಲ್ಲಿಸಿದ ಬ್ರೆವಿಸ್​ ಶತಕದಬ್ಬರ: ಏಷ್ಯಾಕಪ್​ ಭಾರತ ತಂಡ ಪ್ರಕಟಕ್ಕೆ ದಿನಾಂಕ ನಿಗದಿ!

ಡಾರ್ವಿನ್​: ಯುವ ಬ್ಯಾಟರ್​ ಡಿವಾಲ್ಡ್​ ಬ್ರೆವಿಸ್​ (125*ರನ್​, 56 ಎಸೆತ, 12 ಬೌಂಡರಿ, 8 ಸಿಕ್ಸರ್​) ಚೊಚ್ಚಲ ಶತಕದಬ್ಬರದ ಬಲದಿಂದ ದಕ್ಷಿಣ ಆಫ್ರಿಕಾ ತಂಡ ಆತಿಥೇಯ ಆಸ್ಟ್ರೆಲಿಯಾ ವಿರುದ್ಧದ ಟಿ20 ಸರಣಿಯ 2ನೇ ಪಂದ್ಯದಲ್ಲಿ 53 ರನ್​ಗಳಿಂದ ಭರ್ಜರಿ ಗೆಲುವು ದಾಖಲಿಸಿದೆ. ಈ ಮೂಲಕ ಏಡನ್​ ಮಾರ್ಕ್ರಮ್​ ಬಳಗ 3 ಪಂದ್ಯಗಳ ಸರಣಿಯಲ್ಲಿ 1-1 ಸಮಬಲ ಸಾಧಿಸಿದೆ. ನಿರ್ಣಾಯಕ 3ನೇ ಟಿ20 ಪಂದ್ಯ ಶನಿವಾರ ನಡೆಯಲಿದೆ.

ಮರಾರಾ ಸ್ಟೇಡಿಯಂನಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಆಫ್ರಿಕಾ, ಬ್ರೆವಿಸ್​ ಮತ್ತು ಟ್ರಿಸ್ಟಾನ್​ ಸ್ಟಬ್ಸ್​ (31) 4ನೇ ವಿಕೆಟ್​ಗೆ 57 ಎಸೆತಗಳಲ್ಲೇ 126 ರನ್​ ಸೇರಿಸಿದ ಬಲದಿಂದ 7 ವಿಕೆಟ್​ಗೆ 218 ರನ್​ ಕಲೆಹಾಕಿತು. ಪ್ರತಿಯಾಗಿ ಆಸೀಸ್​, 17.4 ಓವರ್​ಗಳಲ್ಲಿ 165 ರನ್​ಗಳಿಗೆ ಆಲೌಟ್​ ಆಗಿ ಶರಣಾಯಿತು.

ಆಫ್ರಿಕಾ: 7 ವಿಕೆಟ್​ಗೆ 218 (ಬ್ರೆವಿಸ್​ 125*, ಸ್ಟಬ್ಸ್​ 31, ಮ್ಯಾಕ್ಸ್​ವೆಲ್​ 44ಕ್ಕೆ 2, ಡ್ವಾರ್ಶುಯಿಸ್​ 24ಕ್ಕೆ 2), ಆಸ್ಟ್ರೆಲಿಯಾ: 17.4 ಓವರ್​ಗಳಲ್ಲಿ 165 (ಮಾರ್ಷ್​ 22, ಹೆಡ್​ 5, ಟಿಮ್​ ಡೇವಿಡ್​ 50, ಮ್ಯಾಕ್ಸ್​ವೆಲ್​ 16, ಕ್ಯಾರಿ 26, ಮಾಕ 57ಕ್ಕೆ 3, ಬೋಷ್​ 20ಕ್ಕೆ 3), ಪಂದ್ಯಶ್ರೇಷ್ಠ: ಡಿವಾಲ್ಡ್​ ಬ್ರೆವಿಸ್​.

ಏಷ್ಯಾಕಪ್​ ಭಾರತ ತಂಡ ಪ್ರಕಟ

ನವದೆಹಲಿ: ಮುಂಬರುವ ಏಷ್ಯಾಕಪ್​ ಟಿ20 ಟೂರ್ನಿಗೆ ಅಜಿತ್​ ಅಗರ್ಕರ್​ ನೇತೃತ್ವದ ಆಯ್ಕೆ ಸಮಿತಿಯು ಆಗಸ್ಟ್​ 19 ಅಥವಾ 20ರಂದು ಮುಂಬೈನಲ್ಲಿ ಸಭೆ ಸೇರಿ ಭಾರತ ತಂಡವನ್ನು ಆರಿಸಲಿದೆ. ಬೆಂಗಳೂರಿನ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದಲ್ಲಿ (ಸಿಒಇ) ಪ್ರಸಕ್ತ ನಾಯಕ ಸೂರ್ಯಕುಮಾರ್​ ಯಾದವ್​ ಸಹಿತ ಕೆಲ ಆಟಗಾರರ ಫಿಟ್ನೆಸ್​ ಪರೀಕ್ಷೆಗಳು ನಡೆಯುತ್ತಿದೆ. ಸಿಒಇ ವೈದ್ಯಕಿಯ ತಂಡ ಎಲ್ಲ ಆಟಗಾರರ ಫಿಟ್ನೆಸ್​ ವರದಿಯನ್ನು ಸಲ್ಲಿಸಿದ ಬೆನ್ನಲ್ಲೇ ಆಯ್ಕೆ ಸಮಿತಿ ಸಭೆ ಸೇರಲಿದೆ.

ಸಂಜು ಸ್ಯಾಮ್ಸನ್​ ಜತೆಗೆ 2ನೇ ವಿಕೆಟ್​ ಕೀಪರ್​ ಸ್ಥಾನಕ್ಕೆ ಜಿತೇಶ್​ ಶರ್ಮ ಮತ್ತು ಧ್ರುವ ಜುರೆಲ್​ ನಡುವೆ ಸ್ಪರ್ಧೆ ಏರ್ಪಟ್ಟಿದೆ ಎನ್ನಲಾಗಿದೆ. ಇಂಗ್ಲೆಂಡ್​ ಪ್ರವಾಸದ ವೇಳೆ ಗಾಯಗೊಂಡ ನಿತೀಶ್​ ಕುಮಾರ್​ ರೆಡ್ಡಿ ಏಷ್ಯಾಕಪ್​ಗೆ ಫಿಟ್​ ಆಗುವ ಸಾಧ್ಯತೆ ಇಲ್ಲ. ಹೀಗಾಗಿ ವೇಗದ ಬೌಲಿಂಗ್​ ಆಲ್ರೌಂಡರ್​ ಸ್ಥಾನವನ್ನು ಶಿವಂ ದುಬೆ ತುಂಬಲಿದ್ದಾರೆ. ಜಸ್​ಪ್ರೀತ್​ ಬುಮ್ರಾ ಏಷ್ಯಾಕಪ್​ನಲ್ಲಿ ಆಡುವ ಸಾಧ್ಯತೆ ಹೆಚ್ಚಿದ್ದು, ಅರ್ಷದೀಪ್​ ಸಿಂಗ್​ ಜತೆಗೆ 3ನೇ ವೇಗದ ಬೌಲರ್​ ಸ್ಥಾನಕ್ಕೆ ಕನ್ನಡಿಗ ಪ್ರಸಿದ್ಧ ಕೃಷ್ಣ ಮತ್ತು ಹರ್ಷಿತ್​ ರಾಣಾ ನಡುವೆ ಸ್ಪರ್ಧೆ ಇದೆ ಎನ್ನಲಾಗಿದೆ.

ಏಷ್ಯಾಕಪ್​ಗೆ ಸಂಭಾವ್ಯ ಭಾರತ ತಂಡ: ಸೂರ್ಯಕುಮಾರ್​ ಯಾದವ್​ (ನಾಯಕ), ಶುಭಮಾನ್​ ಗಿಲ್​, ಅಭಿಷೇಕ್​ ಶರ್ಮ, ಸಂಜು ಸ್ಯಾಮ್ಸನ್​ (ವಿ.ಕೀ), ತಿಲಕ್​ ವರ್ಮ, ಶಿವಂ ದುಬೆ, ಅಕ್ಷರ್​ ಪಟೇಲ್​, ವಾಷಿಂಗ್ಟನ್​ ಸುಂದರ್​, ವರುಣ್​ ಚಕ್ರವರ್ತಿ, ಕುಲದೀಪ್​ ಯಾದವ್​, ಜಸ್​ಪ್ರೀತ್​ ಬುಮ್ರಾ, ಅರ್ಷದೀಪ್​ ಸಿಂಗ್​, ಹರ್ಷಿತ್​ ರಾಣಾ/ಪ್ರಸಿದ್ಧಕೃಷ್ಣ, ಹಾರ್ದಿಕ್​ ಪಾಂಡ್ಯ, ಜಿತೇಶ್​ ಶರ್ಮ/ಧ್ರುವ ಜುರೆಲ್​.