ಮಹಾಮಾರಿ ಕರೊನಾ ಹಾವಳಿ ಶುರುವಾದ ಬಳಿಕ ಕಳೆದ ಒಂದೂವರೆ ತಿಂಗಳಿನಿಂದ ಬಹುತೇಕ ಕ್ರೀಡಾ ಚಟುವಟಿಕೆಗಳು ಸ್ಥಬ್ತಗೊಂಡಿವೆ. ಇದೀಗ ಕರೊನಾ ಸಂಪೂರ್ಣ ನಿಯಂತ್ರಣಕ್ಕೆ ಬಾರದಿದ್ದರೂ, ಆರ್ಥಿಕ ಹೊಡೆತವನ್ನು ತಪ್ಪಿಸಿಕೊಳ್ಳಲು ಕ್ರೀಡಾ ಚಟುವಟಿಕೆಗಳನ್ನೂ ಪುನರಾರಂಭ ಮಾಡುವುದು ಅನಿವಾರ್ಯವೆನಿಸುತ್ತಿದೆ. ಆದರೆ ದೊಡ್ಡ ಸಂಖ್ಯೆಯಲ್ಲಿ ಜನರನ್ನು ಸೇರಿಸುವುದು ಅತ್ಯಂತ ಅಪಾಯಕಾರಿ ಆಗಿರುವುದರಿಂದ, ಪ್ರೇಕ್ಷಕರಿಲ್ಲದೆ ಖಾಲಿ ಕ್ರೀಡಾಂಗಣದಲ್ಲಾದರೂ ಪಂದ್ಯಗಳನ್ನು ನಡೆಸಬೇಕು ಎಂಬ ಒಲವು ಹೆಚ್ಚಾಗುತ್ತಿದೆ. ಯುರೋಪ್ನಲ್ಲಿ ಪ್ರೇಕ್ಷಕರಿಲ್ಲದೆ ಫುಟ್ಬಾಲ್ ಪಂದ್ಯ ಆಯೋಜಿಸಲು ಸಿದ್ಧತೆ ನಡೆಯುತ್ತಿದ್ದರೆ, ಕರೊನಾದಿಂದ ತತ್ತರಿಸಿರುವ ನಡುವೆಯೂ ಅಮೆರಿಕದಲ್ಲಿ ಪ್ರತಿಷ್ಠಿತ ಕ್ರೀಡಾ ಲೀಗ್ಗಳನ್ನು ಪ್ರೇಕ್ಷಕರಿಲ್ಲದೆ ನಡೆಸುವ ಉತ್ಸಾಹ ಕಾಣಿಸಿದೆ. ಇದರಿಂದಾಗಿ ಟಿಕೆಟ್ ಮಾರಾಟದ ಆದಾಯ ನಷ್ಟವಾಗಬಹುದಾದರೂ, ಟಿವಿ ಮೂಲಕ ಕ್ರೀಡಾಪ್ರೇಮಿಗಳಿಗೆ ಕ್ರೀಡೆಯನ್ನು ತಲುಪಿಸಲಾಗುತ್ತದೆ. ಕ್ರಿಕೆಟ್ನಲ್ಲೂ ಖಾಲಿ ಕ್ರೀಡಾಂಗಣದಲ್ಲಿ ಪಂದ್ಯಗಳನ್ನು ಆಡಲು ಕ್ರಿಕೆಟಿಗರು ಸಿದ್ಧ ಎನ್ನುತ್ತಿದ್ದಾರೆ.
