ಪೇಸ್-ಎಡ್ಬನ್ ಜೋಡಿ ಶುಭಾರಂಭ; ಮೂವರು ಶ್ರೇಯಾಂಕಿತರ ಪತನ

ಹಾಲಿ ಚಾಂಪಿಯನ್ ಹಾಗೂ ಪ್ರಶಸ್ತಿ ಉಳಿಸಿಕೊಳ್ಳುವ ಫೇವರಿಟ್ ಆಗಿರುವ ಪ್ರಜ್ಞೇಶ್ ಗುಣೇಶ್ವರನ್ ಮೂರು ಸೆಟ್​ಗಳ ಹೋರಾಟದ ಪಂದ್ಯದಲ್ಲಿ ಗೆಲುವು ಸಾಧಿಸುವ ಮೂಲಕ ಬೆಂಗಳೂರು ಓಪನ್ ಎಟಿಪಿ ಚಾಲೆಂಜರ್ ಟೂರ್ನಿಯಲ್ಲಿ 16ರ ಘಟ್ಟಕ್ಕೇರಿದ್ದಾರೆ. ಅವರೊಂದಿಗೆ ರಾಮ್​ಕುಮಾರ್​ ರಾಮನಾಥನ್ ದೇಶಬಾಂಧವ ಆಟಗಾರನನ್ನು ಸೋಲಿಸುವ ಮೂಲಕ ಮುನ್ನಡೆ ಪಡೆದುಕೊಂಡರು.

ಕೆಎಸ್​ಎಲ್​ಟಿಎ ಕೋರ್ಟ್ ನಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಕಣದಲ್ಲಿದ್ದ ಭಾರತದ ಪ್ರಮುಖ ಸ್ಪರ್ಧಿಗಳು ಗೆಲುವು ಸಾಧಿಸಿದರು. ದಿನದ ಕೊನೆಯಲ್ಲಿ ನಡೆದ ಪುರುಷರ ಡಬಲ್ಸ್ ಪಂದ್ಯದಲ್ಲಿ ದೇಶದ ದಿಗ್ಗಜ ಆಟಗಾರ ಲಿಯಾಂಡರ್ ಪೇಸ್, ನೆರೆದಿದ್ದ ಸಾಕಷ್ಟು ಅಭಿಮಾನಿಗಳನ್ನು ರಂಜಿಸುವ ಮೂಲಕ ಸುಲಭ ಜಯದೊಂದಿಗೆ ಕ್ವಾರ್ಟರ್​ಫೈನಲ್ ಪ್ರವೇಶ ಪಡೆದರು.

ಭಾರತದಲ್ಲಿ ವೃತ್ತಿಜೀವನದ ಕೊನೇ ಟೂರ್ನಿಯನ್ನು ಆಡುತ್ತಿರುವ ಲಿಯಾಂಡರ್ ಪೇಸ್, ಬಹುತೇಕ ಭರ್ತಿಯಾಗಿದ್ದ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಆಸ್ಟ್ರೇಲಿಯಾದ ಮ್ಯಾಥ್ಯೂ ಎಡ್ಬನ್ ಜತೆಗೂಡಿ 1 ಗಂಟೆ 21 ನಿಮಿಷದ ಮುಖಾಮುಖಿಯನ್ನು ಜಯಿಸಿದರು. 18 ಗ್ರಾಂಡ್ ಸ್ಲಾಂ ಡಬಲ್ಸ್ ಪ್ರಶಸ್ತಿ ಹಾಗೂ ಒಲಿಂಪಿಕ್ ಪದಕ ವಿಜೇತ ಪೇಸ್ ಹಾಗೂ ಎಡ್ಬನ್ ಜೋಡಿ 7-6 (2), 6-4 ರಿಂದ ಸ್ಲೋವೇನಿಯಾದ ಬ್ಲಾಜ್ ರೋಲಾ ಹಾಗೂ ಚೀನಾದ ಜಿಂಜಾನ್ ಜಾಂಗ್ ಜೋಡಿಯನ್ನು ಸೋಲಿಸಿ ಟೂರ್ನಿಯಲ್ಲಿ ಶುಭಾರಂಭ ಕಂಡಿತು. ಸೆಮಿಫೈನಲ್​ಗೇರಲು ಇಂಡೋ-ಆಸೀಸ್ ಜೋಡಿ ಸ್ವೀಡನ್​ನ ಆಂಡ್ರೆ ಗೊರಾನ್​ಸನ್ ಹಾಗೂ ಇಂಡೋನೇಷ್ಯಾದ ಕ್ರಿಸ್ಟೋಫರ್ ರುಂಗ್​ಕಾಟ್ ಜೋಡಿಯನ್ನು ಎದುರಿಸಲಿದೆ. ಗೊರಾನ್​ಸನ್ ಹಾಗೂ ರುಂಗ್​ಕಾಟ್ ಜೋಡಿ ಮೊದಲ ಸುತ್ತಿನಲ್ಲಿ ಪ್ರಜ್ಞೇಶ್ ಗುಣೇಶ್ವರನ್ ಹಾಗೂ ಸುಮಿತ್ ನಗಾಲ್ ಜೋಡಿಯನ್ನು ಸೋಲಿಸಿತು.

ದಿನದ ಆರಂಭದಲ್ಲಿ ನಡೆದ ಸಿಂಗಲ್ಸ್ ಪಂದ್ಯದಲ್ಲಿ ಮ್ಯಾಥ್ಯೂ ಎಡ್ಬನ್ ಅಂದಾಜು 3 ಗಂಟೆಗಳ ಕಾಲ ನಡೆದ ಹೋರಾಟದಲ್ಲಿ ಈಜಿಪ್ಟ್​ನ ಮೊಹಮದ್ ಸಾಫ್​ವಟ್ ವಿರುದ್ಧ ಸೋಲು ಕಂಡಿದ್ದರು. ಇದರ ಆಯಾಸವನ್ನು ಡಬಲ್ಸ್ ಪಂದ್ಯದಲ್ಲಿ ಒಂಚೂರು ತೋರಿಸಿಕೊಳ್ಳದ ಎಡ್ಬನ್, ಪೇಸ್​ರ ಅನುಭವಿ ಆಟಕ್ಕೆ ಅಗತ್ಯ ಸಾಥ್ ನೀಡುವ ಮೂಲಕ ಗೆಲುವಿನಲ್ಲಿ ಪ್ರಮುಖ ಪಾತ್ರ ನಿಭಾಯಿಸಿದರು.

ಪ್ರಜ್ಞೇಶ್, ರಾಮ್ ಮುನ್ನಡೆ: ಭಾರತದ ಅಗ್ರ ರ್ಯಾಂಕಿಂಗ್​ನ ಸಿಂಗಲ್ಸ್ ಆಟಗಾರ, 7ನೇ ಶ್ರೇಯಾಂಕದ ಪ್ರಜ್ಞೇಶ್ ಗುಣೇಶ್ವರನ್ ದಿನದ ಮೊದಲ ಪಂದ್ಯದಲ್ಲಿ ಜರ್ಮನಿಯ ಸೆಬಾಸ್ಟಿಯನ್ ಫ್ಯಾನ್​ಸೀಲೋವರನ್ನು 6-2, 4-6, 6-4 ರಿಂದ ಸೋಲಿಸಿದರು. 16ರ ಘಟ್ಟದ ಪಂದ್ಯದಲ್ಲಿ ಪ್ರಜ್ಞೇಶ್, ಫ್ರಾನ್ಸ್​ನ ಬೆಂಜಮಿನ್ ಬೊಂಜಿ ಸವಾಲನ್ನು ಎದುರಿಸಲಿದ್ದಾರೆ. 17ನೇ ಶ್ರೇಯಾಂಕದ ಆಟಗಾರ ರಾಮ್ುಮಾರ್ 6-1, 6-3ರಿಂದ ಅರ್ಹತಾ ಸುತ್ತಿನಿಂದ ಬಂದ ಆಟಗಾರ ಅಭಿನವ್ ಷಣ್ಮುಗಂರನ್ನು ಸೋಲಿಸಿದರೆ, ಸಿದ್ಧಾರ್ಥ್ ರಾವತ್, ಲಕ್ಕಿ ಲೂಸರ್ ರಿಷಿ ರೆಡ್ಡಿಯನ್ನು 6-2, 6-2ರಿಂದ ಸೋಲಿಸಿ ಮುನ್ನಡೆದರು.

ಶ್ರೇಯಾಂಕಿತರ ನಿರ್ಗಮನ

10ನೇ ಶ್ರೇಯಾಂಕದ ಆಟಗಾರ ಚೀನಾದ ಜಿಂಜಾನ್ ಜಾಂಗ್, ಇಟಲಿಯ ಜೂಲಿಯನ್ ಒಕ್ಲೆಪ್ಪೋ ಎದುರು ಆಘಾತ ಕಂಡರು. 55 ನಿಮಿಷದ ಆಟದಲ್ಲಿ ಒಕ್ಲೆಪ್ಪೋ 6-1, 6-3 ರಿಂದ ಗೆಲುವು ಸಾಧಿಸಿದರು. ಬೆಂಜಮಿಂನ್ ಬೊಂಜಿ 6-4, 6-1 ರಿಂದ 12ನೇ ಶ್ರೇಯಾಂಕದ ಆಟಗಾರ ಸೆರ್ಬಿಯಾದ ನಿಕೋಲಾ ಮಿಲೋಜೆವಿಕ್​ರನ್ನು ಸೋಲಿಸಿ ಮುನ್ನಡೆದರು. ದಿನದ ಕೊನೆಯಲ್ಲಿ 15ನೇ ಶ್ರೇಯಾಂಕದ ಆಟಗಾರ ಬೆಲ್ಜಿಯಂನ ಕ್ರಿಮ್ಮೆರ್ ಕೊಪೆಜಾನ್ಸ್ ಕೂಡ ಆಘಾತಕಾರಿ ನಿರ್ಗಮನ ಕಂಡರು. 2 ಗಂಟೆ 20 ನಿಮಿಷದ ಹೋರಾಟದಲ್ಲಿ ಪೋರ್ಚುಗಲ್​ನ ಆಟಗಾರ ಫೆಡ್ರಿಸಿಯೋ ಫೆರಿರಾ ಸಿಲ್ವಾ 3-6, 6-3, 5-7 ರಿಂದ ಕೊಪೆಜಾನ್ಸ್​ರನ್ನು ಟೂರ್ನಿಯಿಂದ ಹೊರಹಾಕಿದರು.

| ಸಂತೋಷ್ ನಾಯ್ಕ್​, ಬೆಂಗಳೂರು