29ರಂದು ಬಿಸಿಸಿಐ ಮಹತ್ವದ ಸಭೆ

ನವದೆಹಲಿ: ಅಕ್ಟೋಬರ್​-ನವೆಂಬರ್​ನಲ್ಲಿ ಭಾರತದಲ್ಲಿ ಟಿ20 ವಿಶ್ವಕಪ್​ ಕ್ರಿಕೆಟ್​ ಟೂನಿರ್ ಆಯೋಜನೆ ಸೇರಿದಂತೆ ಮುಂಬರುವ ಕ್ರಿಕೆಟ್​ ಸರಣಿಗಳ ಬಗ್ಗೆ ಚರ್ಚೆ ನಡೆಸುವ ಸಲುವಾಗಿ ಮೇ 29ರಂದು ಬಿಸಿಸಿಐನ ವಿಶೇಷ ಮಹಾಸಭೆ (ಎಸ್​ಜಿಎಂ) ನಿಗದಿಯಾಗಿದೆ. ಈ ಕುರಿತು ಬಿಸಿಸಿಐ ಕಾರ್ಯದಶಿರ್ ಜಯ್ ಷಾ, ರಾಜ್ಯ ಸಂಸ್ಥೆಗಳಿಗೆ ನೋಟಿಸ್​ ಜಾರಿ ಮಾಡಿದ್ದಾರೆ. ಕೋವಿಡ್​-19 ಹಾವಳಿ ನಡುವೆ ಮುಂಬರುವ ದೇಶೀಯ ಕ್ರಿಕೆಟ್​ ಋತುವಿನಲ್ಲಿ ಯಾವೆಲ್ಲ ಟೂರ್ನಿಗಳನ್ನು ಆಯೋಜಿಸಬಹುದು ಎಂಬ ಕುರಿತು ಕೂಡ ಪ್ರಮುಖವಾಗಿ ಚರ್ಚೆ ನಡೆಯಲಿದೆ. ಭಾರತದಲ್ಲಿ ಕರೊನಾ 2ನೇ ಅಲೆ ಅಬ್ಬರಿಸುತ್ತಿರುವ ಹಿನ್ನೆಲೆಯಲ್ಲಿ ಟಿ20 ವಿಶ್ವಕಪ್​ ಆಯೋಜನೆಯೇ ಬಿಸಿಸಿಐಗೆ ದೊಡ್ಡ ಸವಾಲಾಗಿದೆ. 

ಟಿ20 ವಿಶ್ವಕಪ್​ ಭವಿಷ್ಯ ನಿರ್ಧರಿಸುವ ಕುರಿತು ಜೂನ್​ 1ರಂದು ಐಸಿಸಿ ವಿಶೇಷ ಸಭೆ ನಿಗದಿಯಾಗಿರುವ ಹಿನ್ನೆಲೆಯಲ್ಲಿ ಬಿಸಿಸಿಐ ಎಸ್​ಜಿಎಂ ಮಹತ್ವ ಪಡೆದಿದೆ. ಟಿ20 ವಿಶ್ವಕಪ್​ಗೆ ಯುಎಇಯನ್ನು ಮೀಸಲು ತಾಣವಾಗಿ ಐಸಿಸಿ ಈಗಾಗಲೆ ಗುರುತಿಸಿದ್ದು, ಭಾರತದಲ್ಲಿ ನಡೆದ ಐಪಿಎಲ್​ 14ನೇ ಆವೃತ್ತಿ ಮೊಟಕುಗೊಂಡ ಬಳಿಕ ಸ್ಥಳಾಂತರದ ಸಾಧ್ಯತೆ ಹೆಚ್ಚಾಗಿತ್ತು. ಆದರೆ, ಭಾರತದಲ್ಲೇ ಟೂರ್ನಿ ಆಯೋಜಿಸುವ ಕುರಿತು ಬಿಸಿಸಿಐ ಈಗಲೂ ಒಲವು ಹೊಂದಿದೆ ಎನ್ನಲಾಗಿದೆ. ಕಳೆದ ಬಿಸಿಸಿಐ ಅಪೆಕ್ಸ್​ ಕೌನ್ಸಿಲ್​ ಸಭೆಯಲ್ಲಿ ಅಹಮದಾಬಾದ್​, ಬೆಂಗಳೂರು, ಚೆನ್ನೈ, ದೆಹಲಿ, ಧರ್ಮಶಾಲಾ. ಹೈದರಾಬಾದ್​, ಕೋಲ್ಕತ, ಲಖನೌ ಹಾಗೂ ಮುಂಬೈ ನಗರಗಳಲ್ಲಿ ವಿಶ್ವಕಪ್​ ಪಂದ್ಯಗಳನ್ನು ಆಯೋಜಿಸಲು ತೀರ್ಮಾನಿಸಲಾಗಿತ್ತು. ಆದರೆ ಇದೀಗ ದೇಶದ 2-3 ತಾಣಗಳಲ್ಲೇ ಪಂದ್ಯ ನಡೆಸಿ, ಆತಿಥ್ಯವನ್ನು ಉಳಿಸಿಕೊಳ್ಳಲು ಬಿಸಿಸಿಐ ಆದ್ಯತೆ ನೀಡಿದೆ.