ಇಂದು ಕಿಂಗ್ಸ್ ಇಲೆವೆನ್ ಪಂಜಾಬ್-ಸನ್‌ರೈಸರ್ಸ್‌ ಹೈದರಾಬಾದ್ ಹಣಾಹಣಿ

ದುಬೈ: ಹ್ಯಾಟ್ರಿಕ್ ಗೆಲುವಿನೊಂದಿಗೆ ಪ್ಲೇಆಫ್​ ರೇಸ್‌ಗೆ ಮರಳಿರುವ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಐಪಿಎಲ್-13ರಲ್ಲಿ ನಡೆಯಲಿರುವ ಶನಿವಾರದ 2ನೇ ಪಂದ್ಯದಲ್ಲಿ ತನ್ನದೇ ಸ್ಥಿತಿಯಲ್ಲಿರುವ ಸನ್‌ರೈಸರ್ಸ್‌ ಹೈದರಾಬಾದ್ ತಂಡವನ್ನು ಎದುರಿಸಲಿದೆ. ಉಭಯ ತಂಡಗಳು ಇದುವರೆಗೆ ಆಡಿರುವ 10 ಪಂದ್ಯಗಳಲ್ಲಿ ತಲಾ 4 ಗೆಲುವು ಮತ್ತು 6 ಸೋಲು ಕಂಡಿವೆ. ಹೀಗಾಗಿ ಈ ಪಂದ್ಯದಲ್ಲಿ ಗೆಲ್ಲುವ ತಂಡಕ್ಕೆ ಅವಕಾಶ ವೃದ್ಧಿಸಲಿದ್ದರೆ, ಸೋತ ತಂಡಕ್ಕೆ ಹೊರಬೀಳುವ ಅಪಾಯ ಹೆಚ್ಚಲಿದೆ. ದುಬೈನಲ್ಲೇ ನಡೆದಿದ್ದ ಉಭಯ ತಂಡಗಳ ಕಳೆದ ಮುಖಾಮುಖಿಯಲ್ಲಿ ಸನ್‌ರೈಸರ್ಸ್‌ ತಂಡ 69 ರನ್‌ಗಳಿಂದ ಭರ್ಜರಿ ಗೆಲುವು ಕಂಡಿತ್ತು.

ಉಭಯ ತಂಡಗಳಿಗೂ ಪ್ಲೇಆಫ್​ ಅವಕಾಶ ಒಲಿಸಿಕೊಳ್ಳಲು ಉಳಿದ ನಾಲ್ಕೂ ಪಂದ್ಯಗಳಲ್ಲೂ ಗೆಲುವು ಅಗತ್ಯವಾಗಿದೆ. ಸತತ 5 ಸೋಲಿನಿಂದ ಕಂಗೆಟ್ಟಿದ್ದ ಕೆಎಲ್ ರಾಹುಲ್ ಬಳಗ ಇದೀಗ ಸತತ 3 ಜಯದೊಂದಿಗೆ ಭರ್ಜರಿ ಲಯ ಕಂಡುಕೊಂಡಿದೆ. ವಿಂಡೀಸ್ ಸ್ಫೋಟಕ ಬ್ಯಾಟ್ಸ್‌ಮನ್ ಕ್ರಿಸ್ ಗೇಲ್ ತಂಡಕ್ಕೆ ಲಕ್ಕಿ ಚಾರ್ಮ್ ಆಗಿದ್ದು, ಅವರು ಕಣಕ್ಕಿಳಿದ ಬಳಿಕ ಪಂಜಾಬ್ ತಂಡ ಎಲ್ಲ ಪಂದ್ಯವನ್ನೂ ಜಯಿಸಿದೆ. ಅಂಕಪಟ್ಟಿಯಲ್ಲಿ ಅಗ್ರ 3 ಸ್ಥಾನದಲ್ಲಿರುವ ಡೆಲ್ಲಿ, ಮುಂಬೈ ಮತ್ತು ಆರ್‌ಸಿಬಿ ವಿರುದ್ಧ ಪಂಜಾಬ್ ತಂಡದ ಕೊನೇ 3 ಗೆಲುವುಗಳು ಬಂದಿರುವುದು ತಂಡದ ಆತ್ಮವಿಶ್ವಾಸವನ್ನು ಇನ್ನಷ್ಟು ಹೆಚ್ಚಿಸುವ ಅಂಶವಾಗಿದೆ.

ಸತತ 3 ಸೋಲಿನ ಬಳಿಕ ರಾಜಸ್ಥಾನ ರಾಯಲ್ಸ್ ವಿರುದ್ಧದ ಕಳೆದ ಪಂದ್ಯದಲ್ಲಿ ಗೆಲುವಿನ ಲಯ ಕಂಡುಕೊಂಡಿರುವ ಸನ್‌ರೈಸರ್ಸ್‌ ತಂಡವೂ ಮಾಡು ಇಲ್ಲವೆ ಮಡಿ ಒತ್ತಡದಲ್ಲಿದೆ. ರಾಯಲ್ಸ್ ವಿರುದ್ಧ ಕಂಡ ಗೆಲುವಿಗಿಂತ ಮುಖ್ಯವಾಗಿ ತಂಡದ ಮಧ್ಯಮ ಕ್ರಮಾಂಕದ ದೌರ್ಬಲ್ಯವನ್ನು ಮನೀಷ್ ಪಾಂಡೆ-ವಿಜಯ್ ಶಂಕರ್ ಜೋಡಿ ನೀಗಿಸಿರುವುದು ನಾಯಕ ಡೇವಿಡ್ ವಾರ್ನರ್‌ಗೆ ಹೆಚ್ಚು ಸಮಾಧಾನ ತಂದಿದೆ.

ಟೀಮ್ ನ್ಯೂಸ್:

ಸನ್‌ರೈಸರ್ಸ್‌ ಹೈದರಾಬಾದ್: ಜೇಸನ್ ಹೋಲ್ಡರ್ ಸೇರ್ಪಡೆ ತಂಡದ ಬೌಲಿಂಗ್ ವಿಭಾಗಕ್ಕೆ ಹೆಚ್ಚಿನ ಬಲ ತಂದಿದೆ. ಹೀಗಾಗಿ ಇದೇ ಕಾಂಬಿನೇಷನ್ ಮುಂದುವರಿಯುವ ಸಾಧ್ಯತೆ ಇದ್ದು, ಕೇನ್ ವಿಲಿಯಮ್ಸನ್ ಮತ್ತೆ ಹೊರಗುಳಿಯಬೇಕಾಗಬಹುದು.

ಕಳೆದ ಪಂದ್ಯ: ರಾಜಸ್ಥಾನ ರಾಯಲ್ಸ್ ವಿರುದ್ಧ 8 ವಿಕೆಟ್ ಜಯ.

ಕಿಂಗ್ಸ್ ಇಲೆವೆನ್ ಪಂಜಾಬ್: ಕಳೆದ ಪಂದ್ಯದಲ್ಲಿ ಜಿಮ್ಮಿ ನೀಶಾಮ್‌ಗೆ ಅಚ್ಚರಿಯ ಅವಕಾಶ ಕಲ್ಪಿಸಿದ್ದ ತಂಡ ಈ ಬಾರಿ ಗೆಲುವಿನ ಕಾಂಬಿನೇಷನ್ ಬದಲಾಯಿಸುವ ಸಾಧ್ಯತೆ ಕಡಿಮೆ. ಗ್ಲೆನ್ ಮ್ಯಾಕ್ಸ್‌ವೆಲ್ ಲಯ ಕಂಡುಕೊಂಡಿರುವುದು ಕೂಡ ತಂಡದ ತಲೆನೋವು ತಗ್ಗಿಸಿದೆ.

ಕಳೆದ ಪಂದ್ಯ: ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ 5 ವಿಕೆಟ್ ಜಯ.

ಪಂದ್ಯ ಆರಂಭ: ರಾತ್ರಿ 7.30

ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್ ನೆಟ್‌ವರ್ಕ್.

ಮುಖಾಮುಖಿ: 15

ಸನ್‌ರೈಸರ್ಸ್‌: 11

ಪಂಜಾಬ್: 4

https://www.vijayavani.net/international-betting-racket-used-religious-chants-as-codes-busted/