ಸೆಮಿಫೈನಲ್​ನಲ್ಲಿ ಸೋತ ಬಿಎಫ್​ಸಿ; ಬೆಂಗಳೂರು ತಂಡಕ್ಕೆ ಆಘಾತ ನೀಡಿದ ಎಟಿಕೆ ಡೇವಿಡ್ ವಿಲಿಯಮ್ಸ್​ ಜೋಡಿ ಗೋಲು

ಕೋಲ್ಕತ: ಆರಂಭಿಕ ಮುನ್ನಡೆ ನಡುವೆಯೂ ಪಂದ್ಯದಲ್ಲಿ ಹಿಡಿತ ಸಾಧಿಸಲು ವಿಫಲವಾದ ಹಾಲಿ ಚಾಂಪಿಯನ್ ಬೆಂಗಳೂರು ಎಫ್​ಸಿ ತಂಡ ಇಂಡಿಯನ್ ಸೂಪರ್ ಲೀಗ್ (ಐಎಸ್​ಎಲ್) ಅಭಿಯಾನವನ್ನು ಸೆಮಿಫೈನಲ್​ನಲ್ಲೇ ಮುಗಿಸಿತು.

ಸುಮಾರು 50 ಸಾವಿರ ಪ್ರೇಕ್ಷಕರ ಸಮ್ಮುಖದಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಬಿಎಫ್​ಸಿ 1-3 ರಿಂದ ಸೋಲನುಭವಿಸಿತು. ತವರು ನೆಲದಲ್ಲಿ ಕಳೆದ ವಾರ ನಡೆದ ಮೊದಲ ಸೆಮಿಫೈನಲ್ ಚರಣದಲ್ಲಿ 1-0 ಯಿಂದ ಜಯ ದಾಖಲಿಸಿದ್ದರೂ ಗೋಲುಗಳ ಸರಾಸರಿಯಲ್ಲಿ 3-2 ರಿಂದ ಹಿಂದೆ ಉಳಿಯಿತು.

ಈ ಸೋಲಿನೊಂದಿಗೆ ಬಿಎಫ್​ಸಿ ಸತತ 3ನೇ ಬಾರಿಗೆ ಫೈನಲ್ ಪ್ರವೇಶಿಸಲು ವಿಫಲವಾಯಿತು. ಎಎಫ್​ಸಿ ಅರ್ಹತಾ ಸುತ್ತಿನಲ್ಲೂ ಎಡವಿದ್ದ ಬಿಎಫ್​ಸಿ ಇದೀಗ ಐಎಸ್​ಎಲ್​ನಲ್ಲೂ ನಿರಾಸೆ ಕಂಡಿತು.

ತೀವ್ರ ಜಿದ್ದಾಜಿದ್ದಿನಿಂದ ಕೂಡಿದ ಪಂದ್ಯದಲ್ಲಿ ಆರಂಭಿಕ ನಿಮಿಷದಲ್ಲೇ ಬಿಎಫ್​ಸಿ ಮೇಲುಗೈ ಸಾಧಿಸಿತು. ತಂಡದ ಮುನ್ಪಡೆ ಆಟಗಾರ ಆಶಿಕ್ ಕುರಿಯನ್ (5ನೇ ನಿಮಿಷ) ಗೋಲು ದಾಖಲಿಸಿ ಮುನ್ನಡೆ ತಂದುಕೊಟ್ಟರು. ಇದರೊಂದಿಗೆ ಆರಂಭದಲ್ಲೇ ಆತಿಥೇಯ ಎಟಿಕೆಗೆ ಆಘಾತ ನೀಡಿದ ಬಿಎಫ್​ಸಿ ಆತ್ಮವಿಶ್ವಾಸದೊಂದಿಗೆ ಮುನ್ನಡೆಯಿತು.

ಬಳಿಕ ಎಟಿಕೆ ತಂಡದ ಮುನ್ಪಡೆ ಆಟಗಾರ ಕೃಷ್ಣ ರಾಯ್ (30ನೇ ನಿಮಿಷ) ಆಕರ್ಷಕ ಗೋಲು ಗಳಿಸುವ ಮೂಲಕ ಬಿಎಫ್​ಸಿಗೆ ತಿರುಗೇಟು ನೀಡಿದರು. ಇದರೊಂದಿಗೆ ಮೊದಲಾರ್ಧದ ವೇಳೆ ಉಭಯ ತಂಡಗಳು ತಲಾ 1-1 ಗೋಲುಗಳಿಂದ ಸಮಬಲ ಸಾಧಿಸಿದವು. ದ್ವಿತೀಯಾರ್ಧದಲ್ಲಿ ಎಟಿಕೆ ಆಕ್ರಮಣಕಾರಿ ನಿರ್ವಹಣೆ ಎದುರು ಬಿಎಫ್​ಸಿ ಸಂಪೂರ್ಣ ಮಂಕಾಯಿತು.

ಅನುಭವಿ ಆಟಗಾರ ಡೇವಿಡ್ ವಿಲಿಯಮ್್ಸ (63, 79ನೇ ನಿಮಿಷ) ಅವಳಿ ಗೋಲು ಸಿಡಿಸಿದರು. 63ನೇ ನಿಮಿಷದಲ್ಲಿ ಪೆನಾಲ್ಟಿ ಮೂಲಕ ದಕ್ಕಿದ ಗೋಲಿನ ಲಾಭ ಪಡೆದರು. 3ನೇ ಬಾರಿಯೂ ಫೈನಲ್​ಗೇರುವ ಉತ್ಸಾಹದಲ್ಲಿದ್ದ ಬಿಎಫ್​ಸಿ ನಿರಾಸೆಯಲ್ಲಿ ಮುಳುಗಿತು.

ಸೌರವ್ ಗಂಗೂಲಿ ವೀಕ್ಷಣೆ

ಎಟಿಕೆ ಸಹ-ಮಾಲೀಕ ಹಾಗೂ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಪಂದ್ಯ ವೀಕ್ಷಿಸಿದರು. ಎಟಿಕೆ ಜಯ ದಾಖಲಿಸಿದ ಬಳಿಕ ಆಟಗಾರರ ಸಂಭ್ರಮದಲ್ಲಿ ಭಾಗಿಯಾದರು.