ವಿಶ್ವ ಬ್ಯಾಡ್ಮಿಂಟನ್​: 16ರ ಘಟ್ಟಕ್ಕೇರಿದ ತ್ರಿಸಾ-ಗಾಯತ್ರಿ; ಲಕ್ಷ್ಯ ಸೇನ್​, ಉನ್ನತಿ ಶುಭಾರಂಭ

ಇಂದಿರಾ ಗಾಂಧಿ ಅರೇನಾದಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಮಂಗಳವಾರ ನಡೆದ 32ರ ಘಟ್ಟದ ಪಂದ್ಯದಲ್ಲಿ ಶ್ರೇಯಾಂಕ ರಹಿತ ಗಾಯತ್ರಿ-ತ್ರಿಸಾ ಜೋಡಿ 16ನೇ ಶ್ರೇಯಾಂಕಿತ ಅಮೆರಿಕದ ಲೌರೆನ್​ ಲಾಮ್​ ಮತ್ತು ಅಲಿಸನ್​ ಕ್ವಿನ್​ ಲೀ ಜೋಡಿಗೆ 21-15, 21-12 ನೇರಗೇಮ್​ಗಳಿಂದ ಆಘಾತಕಾರಿ ಸೋಲುಣಿಸಿತು. ಗಾಯತ್ರಿ-ತ್ರಿಸಾ ಜೋಡಿ 38 ನಿಮಿಷಗಳಲ್ಲೇ ಗೆಲುವು ಒಲಿಸಿಕೊಂಡಿತು.

ಮಹಿಳಾ ಡಬಲ್ಸ್​ ವಿಭಾಗದಲ್ಲಿ ಭಾರತದ ಮತ್ತೊಂದು ಜೋಡಿಯಾದ ಕವಿಪ್ರಿಯ ಸೆಲ್ವಂ ಮತ್ತು ಸಿಮ್ರನ್​ ಸಿಂಘಿ 2ನೇ ಸುತ್ತಿನಲ್ಲಿ ಹೊರಬಿದ್ದರು. ಅವರು 9ನೇ ಶ್ರೇಯಾಂಕಿತ ಬಲ್ಜೇರಿಯಾದ ಗ್ಯಾಬ್ರಿಯೆಲಾ ಸ್ಟೋವಾ ಮತ್ತು ಸ್ಟೀಾನಿ ಸ್ಟೋವಾ ಜೋಡಿಗೆ 32 ನಿಮಿಷಗಳಲ್ಲೇ 7-21, 14-21ರಿಂದ ಶರಣಾದರು.

ಮಿಶ್ರ ಡಬಲ್ಸ್​ ವಿಭಾಗದಲ್ಲಿ ರೋಹನ್​ ಕಪೂರ್​-ರುತ್ವಿಕಾ ಶಿವಾನಿ ಗದ್ದೆ ಮತ್ತು ಅಶಿತ್​ ಸೂರ್ಯ-ಅಮೃತಾ ಪ್ರಮುತೇಶ್​ ಜೋಡಿ ಮೊದಲ ಸುತ್ತಿನಲ್ಲೇ ಹೊರಬಿದ್ದಿತು. ಈ ವಿಭಾಗದಲ್ಲಿರುವ ಭಾರತದ ಮತ್ತೊಂದು ಜೋಡಿಯಾದ 15ನೇ ಶ್ರೇಯಾಂಕಿತ ಧ್ರುವ ಕಪಿಲ ಮತ್ತು ತನಿಷಾ ಕ್ರಾಸ್ಟೋಗೆ ಮೊದಲ ಸುತ್ತಿನಲ್ಲಿ ಬೈ ಲಭಿಸಿದೆ.

ಪುರುಷರ ಸಿಂಗಲ್ಸ್​ನಲ್ಲಿ 14ನೇ ಶ್ರೇಯಾಂಕಿತ ಲಕ್ಷ್ಯ ಸೇನ್​ ಮೊದಲ ಸುತ್ತಿನ ಪಂದ್ಯದಲ್ಲಿ ಆಸ್ಟ್ರಿಯಾದ ಕಾಲಿನ್ಸ್​ ವ್ಯಾಲೆಂಟೈನ್​ ಫಿಲಿಮೊನ್​ ವಿರುದ್ಧ 16-21, 21-8, 21-4ರಿಂದ ಹೋರಾಟಯುತ ಗೆಲುವು ಸಾಧಿಸಿದರು. ಮೊದಲ ಗೇಮ್​ ಸೋತು ಆರಂಭಿಕ ಹಿನ್ನಡೆ ಅನುಭವಿಸಿದ ಲಕ್ಷ್ಯ ಸೇನ್​ ಗೆಲುವಿಗೆ 45 ನಿಮಿಷಗಳ ಕಾಲ ಪರಿಶ್ರಮ ಪಟ್ಟರು. ನಿಧಾನಗತಿಯ ಆರಂಭದ ಬಳಿಕ ಅವರು ಕೊನೇ 2 ಗೇಮ್​ಗಳಲ್ಲಿ ಸಂಪೂರ್ಣ ಪ್ರಾಬಲ್ಯ ಸಾಧಿಸಿದರು. 25 ವರ್ಷದ ಲಕ್ಷ್ಯ ಸೇನ್​ 2ನೇ ಸುತ್ತಿನಲ್ಲಿ ಅಮೆರಿಕದ ಗರೆಟ್​ ಟಾನ್​ ವಿರುದ್ಧ ಸೆಣಸಲಿದ್ದಾರೆ.

ಮಹಿಳಾ ಸಿಂಗಲ್ಸ್​ ವಿಭಾಗದಲ್ಲಿ ಪಿವಿ ಸಿಂಧು ಬಳಿಕ ಭಾರತದ ಯುವ ಆಟಗಾರ್ತಿ ಉನ್ನತಿ ಹೂಡಾ ಕೂಡ 2ನೇ ಸುತ್ತಿಗೇರಿದ್ದಾರೆ. 18 ವರ್ಷದ ಉನ್ನತಿ ಮೊದಲ ಸುತ್ತಿನ ಪಂದ್ಯದಲ್ಲಿ ಮಯಾನ್ಮಾರ್​ನ ಥೆಟ್​ ಟಾರ್​ ಥುಜರ್​ ವಿರುದ್ಧ 22-20, 21-16ರಿಂದ 40 ನಿಮಿಷಗಳ ಕಾದಾಟದಲ್ಲಿ ಗೆಲುವು ಸಾಧಿಸಿದರು. ತಂದೆ ಉಪಕಾರ್​ ಹೂಡಾ ಅವರಿಂದಲೇ ತರಬೇತಿ ಪಡೆಯುತ್ತಿರುವ ಉನ್ನತಿ 32ರ ಘಟ್ಟದಲ್ಲಿ 13ನೇ ಶ್ರೇಯಾಂಕಿತೆ ಕೆನಡಾದ ಮಿಚೆಲ್​ ಲೀ ಸವಾಲು ಎದುರಿಸಲಿದ್ದಾರೆ.