ಅಹಮದಾಬಾದ್: ಭಾರತದ ಮಹಿಳಾ ತಂಡವು ಉಗಾಂಡಾ ಮಹಿಳಾ ತಂಡದ ವಿರುದ್ಧ 35-15 ಅಂತರದ ಭರ್ಜರಿ ಗೆಲುವು ಸಾಧಿಸುವ ಮೂಲಕ ಮೊದಲ ಕಾಮನ್ವೆಲ್ತ್ ಕಬಡ್ಡಿ ಚಾಂಪಿಯನ್‌ಶಿಪ್‌ನ ಮೊದಲ ಮಹಿಳಾ ಚಾಂಪಿಯನ್ ಆಗಿ ಹೊರಹೊಮ್ಮಿತು. ಈ ಮೂಲಕ ಭಾರತ ತನ್ನ ಸಂಪೂರ್ಣ ಅಜೇಯ ಅಭಿಯಾನವನ್ನು ಪ್ರಶಸ್ತಿಯೊಂದಿಗೆ ಯಶಸ್ವಿಯಾಗಿ ಮುಕ್ತಾಯಗೊಳಿಸಿತು.
ಸಾಕ್ಷಿ 10 ರೈಡ್‌ಗಳಿಂದ ಎರಡು ಬೋನಸ್ ಅಂಕಗಳನ್ನು ಒಳಗೊಂಡಂತೆ ಒಂಬತ್ತು ರೈಡ್ ಅಂಕಗಳನ್ನು ಗಳಿಸಿ ಭಾರತದ ಪರ ಅಗ್ರ ಸ್ಕೋರರ್ ಆಗಿದ್ದರು. ಅವರ ಒಂಬತ್ತು ಅಂಕಗಳಲ್ಲಿ ಏಳು ಅಂಕಗಳು ಮೊದಲಾರ್ಧದಲ್ಲೇ ಬಂದಿದ್ದು, ಅವರು ನಡೆಸಿದ ಆರು ರೈಡ್‌ಗಳಲ್ಲೂ ಯಶಸ್ಸು ಸಾಧಿಸಿದ್ದರು.
ಅನು ಆರು ರೈಡ್ ಅಂಕಗಳನ್ನು ಗಳಿಸಿದರೆ, ನಾಯಕಿ ನಿಧಿ ಶರ್ಮಾ ಮೂರು ಬೋನಸ್ ಅಂಕಗಳನ್ನು ಒಳಗೊಂಡಂತೆ ಐದು ಅಂಕಗಳನ್ನು ಸೇರಿಸಿದರು. ರಿತು ಮತ್ತು ಸುಮನ್ ತಲಾ ನಾಲ್ಕು ಟ್ಯಾಕಲ್ ಅಂಕಗಳೊಂದಿಗೆ ರಕ್ಷಣಾ ವಿಭಾಗವನ್ನು ಮುನ್ನಡೆಸಿದರು. ಭಾರತ 20 ರೈಡ್ ಅಂಕಗಳು ಮತ್ತು 10 ಟ್ಯಾಕಲ್ ಅಂಕಗಳನ್ನು ದಾಖಲಿಸಿದ್ದು, ಪಂದ್ಯದುದ್ದಕ್ಕೂ ಎರಡು ಆಲ್‌ಔಟ್‌ಗಳನ್ನು ಹೇರಿತು.
ನಕಾಯೊಂಗೊ ಶಿರಾತ್ ಉಗಾಂಡಾದ ದಾಳಿಯ ಪ್ರಮುಖ ಆಟಗಾರ್ತಿಯಾಗಿದ್ದು, ತಂಡದ ಒಟ್ಟು 35 ರೈಡ್‌ಗಳಲ್ಲಿ 24 ರೈಡ್‌ಗಳನ್ನು ನಡೆಸಿದರು ಮತ್ತು ಮೂರು ಬೋನಸ್ ಅಂಕಗಳನ್ನು ಒಳಗೊಂಡಂತೆ ಉಗಾಂಡಾದ 15 ಅಂಕಗಳಲ್ಲಿ 11 ಅಂಕಗಳನ್ನು ಗಳಿಸಿದರು. ಉಗಾಂಡಾದ ಇತರ ರೈಡರ್‌ಗಳು ಒಟ್ಟಾಗಿ ಕೇವಲ ಮೂರು ಅಂಕಗಳನ್ನು ಮಾತ್ರ ಗಳಿಸಿದರು. ಸೆಮಿಫೈನಲ್‌ನಲ್ಲಿ ಮಿಂಚಿದ್ದ ನಲ್ವೋಗಾ ನಾಹಿಯಾ ಅವರನ್ನು ಭಾರತ ಕೇವಲ ಒಂದು ಅಂಕಕ್ಕೆ ಸೀಮಿತಗೊಳಿಸಿತು.
ಝಲ್ವಾಂಗೊ ಜೆಮಿಮಾ ದ್ವಿತೀಯಾರ್ಧದಲ್ಲಿ ದಾಖಲಿಸಿದ ಟ್ಯಾಕಲ್, ಇಡೀ ಪಂದ್ಯದಲ್ಲಿ ಉಗಾಂಡಾ ಭಾರತದ ರೈಡರ್‌ನ್ನು ತಡೆಯಲು ಯಶಸ್ವಿಯಾದ ಏಕೈಕ ಸಂದರ್ಭವಾಗಿತ್ತು. ಉಗಾಂಡಾ 14 ರೈಡ್ ಅಂಕಗಳು ಮತ್ತು ಒಂದು ಟ್ಯಾಕಲ್ ಅಂಕವನ್ನು ದಾಖಲಿಸಿತು.
ಮೊದಲಾರ್ಧದಲ್ಲಿ ಇನ್ನೂ 10 ನಿಮಿಷಗಳು ಬಾಕಿ ಇರುವಾಗ ಭಾರತ 7-3 ಅಂತರದ ಮುನ್ನಡೆ ಹೊಂದಿತ್ತು. ಅಲ್ಲಿಂದ ಭಾರತ ಒಂದು ಆಲ್‌ಔಟ್ ಸೇರಿದಂತೆ 15-4 ಅಂತರದಿಂದ ಮೇಲುಗೈ ಸಾಧಿಸಿ, ವಿರಾಮದ ವೇಳೆಗೆ 22-7 ಅಂತರದ ಭದ್ರ ಮುನ್ನಡೆ ಪಡೆದುಕೊಂಡಿತು. ಮೊದಲಾರ್ಧದಲ್ಲಿ ಭಾರತ ಒಂದೇ ಒಂದು ರೈಡ್‌ನಲ್ಲೂ ಅಂಕ ಕಳೆದುಕೊಳ್ಳಲಿಲ್ಲ. ಮತ್ತೊಂದೆಡೆ, ಉಗಾಂಡಾ ತನ್ನ ಒಂಬತ್ತು ಟ್ಯಾಕಲ್ ಪ್ರಯತ್ನಗಳಲ್ಲೂ ವಿಫಲವಾಯಿತು, ಆದರೆ ಭಾರತದ ರಕ್ಷಣಾ ಆಟಗಾರ್ತಿಯರು ಆರು ಯಶಸ್ವಿ ಟ್ಯಾಕಲ್‌ಗಳನ್ನು ದಾಖಲಿಸಿದರು.
ವಿರಾಮದ ಬಳಿಕ ರೈಡ್ ಅಂಕಗಳಲ್ಲಿ ಉಗಾಂಡಾ ಭಾರತವನ್ನು 7-6 ಅಂತರದಿಂದ ಮೀರಿಸಿತು, ಆದರೆ ಪಂದ್ಯ ಮುಗಿಯಲು 10 ನಿಮಿಷಗಳಿಗಿಂತ ಕಡಿಮೆ ಸಮಯ ಉಳಿದಿದ್ದಾಗ ಭಾರತ ದಾಖಲಿಸಿದ ಎರಡನೇ ಆಲ್‌ಔಟ್ ಪಂದ್ಯ ಫಲಿತಾಂಶದ ಬಗ್ಗೆ ಇದ್ದ ಎಲ್ಲ ಅನುಮಾನಗಳಿಗೆ ತೆರೆ ಎಳೆಯಿತು. ಇಡೀ ಪಂದ್ಯದಲ್ಲಿ ಭಾರತ ಉಗಾಂಡಾದ ರೈಡರ್‌ಗಳನ್ನು 10 ಬಾರಿ ಟ್ಯಾಕಲ್ ಮಾಡಿದ್ದು, ತನ್ನ ನಾಲ್ಕು ಡು-ಅರ್-ಡೈ ರೈಡ್‌ಗಳಲ್ಲಿ ಮೂರನ್ನು ಯಶಸ್ವಿಯಾಗಿ ಪರಿವರ್ತಿಸಿಕೊಂಡಿತು.
ಫೈನಲ್‌ನಲ್ಲಿ ಭಾರತದ ಪರ ಅತ್ಯುತ್ತಮ ಆಟಗಾರ್ತಿಯಾಗಿ ಹೊರಹೊಮ್ಮಿದ ಹಾಗೂ ಆರು ಪಂದ್ಯಗಳಿಂದ ಒಟ್ಟು 52 ಅಂಕಗಳನ್ನು ಗಳಿಸಿ ಚಾಂಪಿಯನ್‌ಶಿಪ್‌ನ್ನು ಮುಗಿಸಿದ ಸಾಕ್ಷಿ ಅವರು, “ನಾನು ಒಂಬತ್ತು ರೈಡ್ ಅಂಕಗಳನ್ನು ಗಳಿಸಿ ತಂಡದ ಗೆಲುವಿಗೆ ನೆರವಾಗಿರುವುದಕ್ಕೆ ತುಂಬಾ ಸಂತೋಷವಾಗುತ್ತಿದೆ. ಚಿನ್ನದ ಪದಕ ಗೆದ್ದ ನಂತರ ತಂಡದಲ್ಲಿ ಸಂಭ್ರಮದ ವಾತಾವರಣವಿದ್ದು, ಎಲ್ಲರೂ ತುಂಬಾ ಖುಷಿಯಾಗಿದ್ದಾರೆ. ಕಬಡ್ಡಿಗೆ ಈ ಟೂರ್ನಿ ಅತ್ಯಂತ ಮಹತ್ವದ್ದಾಗಿತ್ತು, ಏಕೆಂದರೆ ಇಂತಹ ಅಂತಾರಾಷ್ಟ್ರೀಯ ಸ್ಪರ್ಧೆಗಳು ಕ್ರೀಡೆಯ ಬೆಳವಣಿಗೆಗೆ ನೆರವಾಗುತ್ತವೆ ಮತ್ತು ನಮ್ಮ ಯುವ ಆಟಗಾರರಿಗೆ ಈ ಅನುಭವದಿಂದ ಬಹಳಷ್ಟು ಪ್ರಯೋಜನವಾಗಲಿದೆ. ಕಳೆದ ವರ್ಷದೊಂದಿಗೆ ಹೋಲಿಸಿದರೆ ಇತರೆ ತಂಡಗಳಲ್ಲಿ ಸಾಕಷ್ಟು ಸುಧಾರಣೆ ಕಂಡುಬಂದಿದೆ. ಇಂತಹ ಅದ್ಭುತ ಚಾಂಪಿಯನ್‌ಶಿಪ್‌ನ್ನು ಆಯೋಜಿಸಿರುವ AKFIಗೆ ನಾನು ಧನ್ಯವಾದಗಳನ್ನು ಸಲ್ಲಿಸಲು ಬಯಸುತ್ತೇನೆ,” ಎಂದು ಹೇಳಿದರು.
ಭಾರತದ ಮಹಿಳಾ ತಂಡದ ಪ್ರಶಸ್ತಿ ಗೆಲುವಿನೊಂದಿಗೆ ಅಹಮದಾಬಾದ್‌ನಲ್ಲಿ ನಡೆದ ಅಭಿಯಾನ ಪರಿಪೂರ್ಣ ಅಂತ್ಯ ಕಂಡಿತು. ಭಾರತ ಆಡಿದ ಆರು ಪಂದ್ಯಗಳಲ್ಲೂ ಗೆಲುವು ಸಾಧಿಸಿತು. ತಂಡವು ತನ್ನ ಮೊದಲ ಪಂದ್ಯದಲ್ಲಿ ಮಲೇಶಿಯಾವನ್ನು 73-13 ಅಂತರದಿಂದ ಮಣಿಸಿತು. ನಂತರ ಸಿಂಗಾಪುರ್‌ನ್ನು 32-16, ಉಗಾಂಡಾವನ್ನು 41-18 ಹಾಗೂ ನೈಜೀರಿಯಾವನ್ನು 38-10 ಅಂತರಗಳಿಂದ ಸೋಲಿಸಿ ‘ಎ’ ಗುಂಪಿನಲ್ಲಿ ಅಗ್ರಸ್ಥಾನ ಪಡೆದುಕೊಂಡಿತು. ಸೆಮಿಫೈನಲ್‌ನಲ್ಲಿ ಭಾರತ ಶ್ರೀಲಂಕಾವನ್ನು 39-14 ಅಂತರದಿಂದ ಮಣಿಸಿತು. ಅಂತಿಮವಾಗಿ, ಪ್ರಶಸ್ತಿ ಹಣಾಹಣಿಯಲ್ಲಿ ಉಗಾಂಡಾವನ್ನು ಸೋಲಿಸುವ ಮೂಲಕ ಭಾರತ ಚಾಂಪಿಯನ್ ಪಟ್ಟವನ್ನು ತನ್ನದಾಗಿಸಿಕೊಂಡಿತು.
