ಐಚಿ-ನಗೋಯಾ: ಮನು ಭಾಕರ್ ಸಾರಥ್ಯದ ಭಾರತ ಮಹಿಳಾ ತಂಡದ ನಿರಾಶಾದಾಯಕ ನಿರ್ವಹಣೆಯ ಬಳಿಕ ಭಾರತದ ಪುರುಷರ ಪಿಸ್ತೂಲ್ ತಂಡವೂ ಪದಕ ಗೆಲ್ಲದೆ ನಿರಾಸೆ ಮೂಡಿಸಿದೆ. ಕಮಲ್ಜೀತ್, ಆಕಾಶ್ ಭಾರದ್ವಾಜ್ ಮತ್ತು ಕನ್ನಡಿಗ ಕೇದಾರಲಿಂಗ ಬಾಲಕೃಷ್ಣ ಉಚಗಾಂವೆ ಒಳಗೊಂಡ ಭಾರತ ತಂಡ ಗುರುವಾರ ನಡೆದ ಪುರುಷರ 10 ಮೀ. ಏರ್ ಪಿಸ್ತೂಲ್ ವಿಭಾಗದಲ್ಲಿ 4ನೇ ಸ್ಥಾನದೊಂದಿಗೆ ಪದಕ ವಂಚಿತವಾಯಿತು.
ಭಾರತ ತಂಡ 1,730 ಅಂಕ ಗಳಿಸಿತು. ಚೀನಾ (1743) ಚಿನ್ನ, ಇಂಡೋನೇಷ್ಯಾ (1743) ಬೆಳ್ಳಿ ಮತ್ತು ಜಪಾನ್ (1730) ಕಂಚಿನ ಪದಕ ಜಯಿಸಿತು. ಭಾರತೀಯ ಶೂಟರ್ಗಳು ವೈಯಕ್ತಿಕ ವಿಭಾಗದಲ್ಲೂ ಫೈನಲ್ಗೇರಲು ವಿಫಲರಾದರು. ಕಮಲ್ಜೀತ್ 9, ಆಕಾಶ್ 11 ಮತ್ತು ಕೇದಾರಲಿಂಗ 35ನೇ ಸ್ಥಾನಕ್ಕೆ ತೃಪ್ತಿಪಟ್ಟರು.
ಟಿಟಿಯಲ್ಲಿ ಭಾರತೀಯರ ಮುನ್ನಡೆ
ಟೇಬಲ್ ಟೆನಿಸ್ ಸ್ಪರ್ಧೆಯಲ್ಲಿ ಭಾರತೀಯರು ಗುರುವಾರ ಗೆಲುವು ದಾಖಲಿಸಿದ್ದಾರೆ. ಮಹಿಳಾ ಡಬಲ್ಸ್ ವಿಭಾಗದಲ್ಲಿ ಶ್ರೀಜಾ ಅಕುಲಾ-ಸಿಂಡ್ರೆಲಾ ದಾಸ್ ಮತ್ತು ಕನ್ನಡತಿ ಯಶಸ್ವಿ ಘೋರ್ಪಡೆ-ದಿವ್ಯಾ ಚಿತಾಲೆ ಜೋಡಿ ಪ್ರಿ ಕ್ವಾರ್ಟರ್ಫೈನಲ್ ಪ್ರವೇಶಿಸಿದೆ. ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಮಾನುಷ್ ಶಾ ಮತ್ತು ಮಾನವ್ ಠಕ್ಕರ್ ಮುನ್ನಡೆದಿದ್ದಾರೆ. ಯಶಸ್ವಿನಿ-ದಿವ್ಯಾ ಜೋಡಿ ಇರಾನ್ನ ಸೆತಯೇಶ್ ಇಲೌಖನಿ-ಮಹ್ಶಿದ್ ಅಸ್ತರಿ ವಿರುದ್ಧ 3-0ಯಿಂದ ಗೆದ್ದರೆ, ಶ್ರೀಜಾ-ಸಿಂಡ್ರೆಲಾ ಜೋಡಿ ಮಂಗೋಲಿಯಾದ ಬುರೆನ್ರ್ಜಗಲ್ ಸಂಜಾ-ಬೊಲೊರ್ ಎರ್ಡೆನ್ ಬಟ್ಮುಖ್ ಜೋಡಿಯನ್ನು 3-0ಯಿಂದ ಮಣಿಸಿತು. ವಿಶ್ವ ನಂ. 43 ಮಾನುಷ್ 32ರ ಘಟ್ಟದಲ್ಲಿ ಮಲೇಷ್ಯಾದ ವೊಂಗ್ ಖಿ ಶೆನ್ ವಿರುದ್ಧ 4-0ಯಿಂದ ಗೆದ್ದರೆ, ವಿಶ್ವ ನಂ. 48 ಮಾನವ್ ಮೊದಲ ಸುತ್ತಿನಲ್ಲಿ ಬೈ ಪಡೆದರು.
