ಇಂದು ಏಷ್ಯಾಕಪ್​ಗೆ ಟೀಮ್​ ಇಂಡಿಯಾ ಆಯ್ಕೆ; ಕೆಎಲ್​ ರಾಹುಲ್​, ಶ್ರೇಯಸ್​ ವಾಪಸ್​ ನಿರೀಕ್ಷೆ

ನವದೆಹಲಿ: ಅಜಿತ್​ ಅಗರ್ಕರ್​ ಸಾರಥ್ಯದ ಆಯ್ಕೆ ಸಮಿತಿ, ಬಹುನಿರೀಕ್ಷಿತ ಏಷ್ಯಾಕಪ್​ ಏಕದಿನ ಕ್ರಿಕೆಟ್​ ಟೂರ್ನಿಗೆ ಸೋಮವಾರ ಭಾರತ ತಂಡವನ್ನು ಆರಿಸಲಿದೆ. 17 ಆಟಗಾರರ ತಂಡವನ್ನು ಆಯ್ಕೆ ಮಾಡುವ ನಿರೀಕ್ಷೆ ಇದ್ದು, ಮುಂಬರುವ ಏಕದಿನ ವಿಶ್ವಕಪ್​ನಲ್ಲಿ ಆಡಬಲ್ಲ 15 ಆಟಗಾರರೂ ಇದರಲ್ಲಿ ಸ್ಥಾನ ಪಡೆಯಲಿದ್ದಾರೆ. ಗಾಯದಿಂದ ಚೇತರಿಸಿಕೊಂಡಿರುವ ಬ್ಯಾಟರ್​ಗಳಾದ ಕನ್ನಡಿಗ ಕೆಎಲ್​ ರಾಹುಲ್​ ಮತ್ತು ಶ್ರೇಯಸ್​ ಅಯ್ಯರ್​ ಕೂಡ ಸ್ಥಾನ ಪಡೆಯುವ ಸಾಧ್ಯತೆಗಳಿವೆ. ಈಗಾಗಲೆ ಐರ್ಲೆಂಡ್​ನಲ್ಲಿ ಟಿ20 ಸರಣಿಯಲ್ಲಿ ಆಡುತ್ತಿರುವ ವೇಗಿ ಜಸ್​ಪ್ರೀತ್​ ಬುಮ್ರಾ ಕೂಡ ದೀರ್ಘಕಾಲದ ಬಳಿಕ ಏಕದಿನ ತಂಡಕ್ಕೆ ಮರಳಲಿದ್ದಾರೆ.

ಪಾಕಿಸ್ತಾನ ಮತ್ತು ಬಾಂಗ್ಲಾದೇಶ ಈಗಾಗಲೆ ಏಷ್ಯಾಕಪ್​ಗೆ 17 ಆಟಗಾರರ ತಂಡಗಳನ್ನು ಪ್ರಕಟಿಸಿವೆ. ಏಷ್ಯನ್​ ಕ್ರಿಕೆಟ್​ ಕೌನ್ಸಿಲ್​ ಈ ಅವಕಾಶವನ್ನೂ ಕಲ್ಪಿಸಿದೆ. ಹೀಗಾಗಿ ಭಾರತ ಕೂಡ 17 ಆಟಗಾರರ ತಂಡವನ್ನೇ ಪ್ರಕಟಿಸಲಿದೆ ಎನ್ನಲಾಗಿದೆ. ಈ ನಡುವೆ, ವಿಶ್ವಕಪ್​ಗೆ ಸೆಪ್ಟೆಂಬರ್​ 5ರೊಳಗಾಗಿ ಸಂಭಾವ್ಯ ತಂಡವನ್ನು ಐಸಿಸಿಗೆ ಸಲ್ಲಿಸಬೇಕಾಗಿದೆ. ನಂತರ ಅದರಲ್ಲಿ ಬದಲಾವಣೆ ಮಾಡಲು ಸೆಪ್ಟೆಂಬರ್​ 27ರವರೆಗೂ ಅವಕಾಶ ಇರುತ್ತದೆ. ಹೀಗಾಗಿ ವಿಶ್ವಕಪ್​ನಲ್ಲಿ ಆಡಬಲ್ಲ ಎಲ್ಲ ಆಟಗಾರರೂ ಏಷ್ಯಾಕಪ್​ ತಂಡದಲ್ಲೂ ಸ್ಥಾನ ಪಡೆಯುವುದು ನಿಶ್ಚಿತ. ವಿಶ್ವಕಪ್​ಗೆ ಸಂಭಾವ್ಯ ತಂಡವನ್ನೂ ಬಿಸಿಸಿಐ, ಸೋಮವಾರವೇ ಪ್ರಕಟಿಸುವುದೇ ಎಂಬುದು ಮಾತ್ರ ಖಚಿತಗೊಂಡಿಲ್ಲ.

ಕೆಎಲ್​ ರಾಹುಲ್​ ಈಗಾಗಲೆ ಬೆಂಗಳೂರಿನ ಎನ್​ಸಿಎಯಲ್ಲಿ ನಡೆದ ಫಿಟ್ನೆಸ್​ ಪರೀೆಯಲ್ಲಿ ಉತ್ತೀರ್ಣರಾಗಿದ್ದರೆ, ಶ್ರೇಯಸ್​ ಅಯ್ಯರ್​ ಎನ್​ಸಿಎಯಲ್ಲಿ ನಡೆದ ಅಭ್ಯಾಸ ಪಂದ್ಯವೊಂದರಲ್ಲಿ 38 ಓವರ್​ ಬ್ಯಾಟಿಂಗ್​ ಮಾಡಿ, 50 ಓವರ್​ ಫೀಲ್ಡಿಂಗ್​ ನಡೆಸಿ ಫಿಟ್ನೆಸ್​ ನಿರೂಪಿಸಿದ್ದಾರೆ ಎನ್ನಲಾಗಿದೆ.

ಆಯ್ಕೆಯಾಗಬಹುದಾದ ಸಂಭಾವ್ಯ ತಂಡ: ರೋಹಿತ್​ ಶರ್ಮ (ನಾಯಕ), ಶುಭಮಾನ್​ ಗಿಲ್​, ವಿರಾಟ್​ ಕೊಹ್ಲಿ, ಕೆಎಲ್​ ರಾಹುಲ್​ (ವಿ.ಕೀ), ಶ್ರೇಯಸ್​ ಅಯ್ಯರ್​ (ಫಿಟ್ನೆಸ್​ ಆಧಾರಿತ), ಹಾರ್ದಿಕ್​ ಪಾಂಡ್ಯ, ರವೀಂದ್ರ ಜಡೇಜಾ, ಜಸ್​ಪ್ರೀತ್​ ಬುಮ್ರಾ, ಮೊಹಮದ್​ ಶಮಿ, ಮೊಹಮದ್​ ಸಿರಾಜ್​, ಕುಲದೀಪ್​ ಯಾದವ್​, ಇಶಾನ್​ ಕಿಶನ್​ (2ನೇ ಕೀಪರ್​), ಅಕ್ಷರ್​ ಪಟೇಲ್​, ಶಾರ್ದೂಲ್​ ಠಾಕೂರ್​/ಪ್ರಸಿದ್ಧ ಕೃಷ್ಣ, ಸೂರ್ಯಕುಮಾರ್​, ತಿಲಕ್​ ವರ್ಮ, ಯಜುವೇಂದ್ರ ಚಾಹಲ್​/ಆರ್​. ಅಶ್ವಿನ್​.

ದ್ರಾವಿಡ್​, ರೋಹಿತ್​ ಭಾಗಿ

ರಾಷ್ಟ್ರ ರಾಜಧಾನಿಯಲ್ಲಿ ನಡೆಯಲಿರುವ ಸಭೆಯಲ್ಲಿ ಮುಖ್ಯ ಕೋಚ್​ ರಾಹುಲ್​ ದ್ರಾವಿಡ್​ ಮತ್ತು ನಾಯಕ ರೋಹಿತ್​ ಶರ್ಮ ಖುದ್ದಾಗಿ ಅಥವಾ ವಿಡಿಯೋ ಕಾನ್ಫರೆನ್ಸ್​ ಮೂಲಕ ಭಾಗವಹಿಸಲಿದ್ದಾರೆ. ಈ ಹಿಂದೆ ಕೋಚ್​ಗಳಾಗಿದ್ದ ಅನಿಲ್​ ಕುಂಬ್ಳೆ ಮತ್ತು ರವಿಶಾಸ್ತ್ರಿಗೆ ಸಿಗದ ಅವಕಾಶ ದ್ರಾವಿಡ್​ಗೆ ಲಭಿಸಿದೆ. ಆದರೆ, ಆಸ್ಟ್ರೆಲಿಯಾದಲ್ಲಿನ ಪದ್ಧತಿಯಂತೆ, ಇಲ್ಲಿ ಕೋಚ್​ಗೆ ಆಯ್ಕೆ ಪ್ರಕ್ರಿಯೆಯಲ್ಲಿ ಮತ ಹಾಕುವ ಅವಕಾಶ ಲಭಿಸುವುದಿಲ್ಲ. ಅವರು ಆಯ್ಕೆಗಾರರಿಗೆ ಸಲಹೆ&ಅಭಿಪ್ರಾಯಗಳನ್ನಷ್ಟೇ ತಿಳಿಸಬಹುದಾಗಿದೆ.

ಮ.1.30ಕ್ಕೆ ಸುದ್ದಿಗೋಷ್ಠಿ

ಸೋಮವಾರ ಮಧ್ಯಾಹ್ನ 1.30ಕ್ಕೆ ತಂಡವನ್ನು ಪ್ರಕಟಿಸಿದ ಬಳಿಕ ನವದೆಹಲಿಯಲ್ಲಿ ಸುದ್ದಿಗೋಷ್ಠಿ ನಡೆಯಲಿದ್ದು, ಇದರಲ್ಲಿ ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್​ ಅಗರ್ಕರ್​ ಮತ್ತು ನಾಯಕ ರೋಹಿತ್​ ಶರ್ಮ ಹಾಜರಿದ್ದು ಮಾತನಾಡಲಿದ್ದಾರೆ ಎನ್ನಲಾಗಿದೆ.

https://www.vijayavani.net/hca-says-back-to-back-games