ಅಡಿಲೇಡ್: ಗಾಯದ ಸಮಸ್ಯೆಯಿಂದ ಬಳಲುತ್ತಿರುವ ಆತಿಥೇಯ ಆಸ್ಟ್ರೇಲಿಯಾ ಹಾಗೂ ಸರಣಿ ಸಮಬಲದ ನಿರೀಕ್ಷೆಯಲ್ಲಿರುವ ಪ್ರವಾಸಿ ಇಂಗ್ಲೆಂಡ್ ತಂಡಗಳು ಗುರುವಾರ ಆರಂಭವಾಗಲಿರುವ ಆಶಸ್ ಸರಣಿಯ 2ನೇ ಹಾಗೂ ಅಹರ್ನಿಶಿ ಹಣಾಹಣಿಗೆ ಸಜ್ಜಾಗಿವೆ. ಸ್ಟಾರ್ ಬ್ಯಾಟರ್ ಡೇವಿಡ್ ವಾರ್ನರ್ ಫಿಟ್ನೆಸ್ ಗೊಂದಲ ಮುಂದುವರಿದರೆ, ಅಹರ್ನಿಶಿ ಪಂದ್ಯಗಳಲ್ಲಿ ಉತ್ತಮ ನಿರ್ವಹಣೆ ತೋರಿರುವ ಜೋಸ್ ಹ್ಯಾಸಲ್ವುಡ್ ಅಲಭ್ಯತೆಯೂ ಆಸೀಸ್ ತಂಡವನ್ನು ಕಾಡಲಿದೆ. ಮತ್ತೊಂದೆಡೆ, ಮೊದಲ ಪಂದ್ಯದಲ್ಲಿ ಹೀನಾಯವಾಗಿ ಸೋಲು ಕಂಡಿರುವ ಇಂಗ್ಲೆಂಡ್ ತಂಡ ಸರಣಿ ಸಮಬಲದ ತವಕದಲ್ಲಿದೆ. ಹೊನಲು ಬೆಳಕಿನ ಟೆಸ್ಟ್ಗಳಲ್ಲಿ ಇದುವರೆಗೆ ಅಜೇಯ ಸಾಧನೆ ಮಾಡಿರುವ ಆಸೀಸ್ ತಂಡ ಮತ್ತೊಂದು ಗೆಲುವಿನ ನಿರೀಕ್ಷೆಯಲ್ಲಿದೆ.
