ಬೃಹತ್ ಮೊತ್ತದತ್ತ ಸೌರಾಷ್ಟ್ರ, ಕಾಡಿದ ಪೂಜಾರ; ಸುಚಿತ್​ಗೆ ಎರಡು ವಿಕೆಟ್​

ರಾಜ್​ಕೋಟ್: ದಿನದ ಆರಂಭದಲ್ಲೇ ಎಡಗೈ ಸ್ಪಿನ್ನರ್ ಜೆ.ಸುಚಿತ್ (85ಕ್ಕೆ 2) ಪ್ರವಾಸಿ ಕರ್ನಾಟಕ ತಂಡಕ್ಕೆ ಮೇಲುಗೈ ತಂದುಕೊಟ್ಟರೂ ರಾಷ್ಟ್ರೀಯ ಟೆಸ್ಟ್ ತಂಡದ ಸದಸ್ಯ ಚೇತೇಶ್ವರ ಪೂಜಾರ (162ರನ್, 238 ಎಸೆತ, 17 ಬೌಂಡರಿ, 1 ಸಿಕ್ಸರ್) ಹಾಗೂ ಶೆಲ್ಡನ್ ಜಾಕ್ಸನ್ (99* ರನ್, 191 ಎಸೆತ, 4 ಬೌಂಡರಿ, 2 ಸಿಕ್ಸರ್) ದಿನವಿಡಿ ಬ್ಯಾಡಿಂಗ್ ಕಾಯ್ದುಕೊಳ್ಳುವ ಮೂಲಕ ಆಘಾತ ನೀಡಿದರು. ಆರಂಭಿಕ ವೈಫಲ್ಯದ ನಡುವೆಯೂ ಆತಿಥೇಯ ಸೌರಾಷ್ಟ್ರ ತಂಡ ರಣಜಿ ಟ್ರೋಫಿಯ 5ನೇ ಸುತ್ತಿನ ಪಂದ್ಯದಲ್ಲಿ ಕರ್ನಾಟಕ ವಿರುದ್ಧ ಬೃಹತ್ ಮೊತ್ತದತ್ತ ಮುಖಮಾಡಿದೆ.

ಮಾಧವ್​ರಾವ್ ಸಿಂಧಿಯಾ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಶನಿವಾರ ಆರಂಭಗೊಂಡ ಬಿ ಗುಂಪಿನ ಪಂದ್ಯದಲ್ಲಿ ಸ್ಪಿನ್ನರ್ ಜೆ.ಸುಚಿತ್ ಮಾರಕ ದಾಳಿ ನಡುವೆಯೂ ಪೂಜಾರ-ಶೆಲ್ಡನ್ ಜಾಕ್ಸನ್ ಜೋಡಿ ಮುರಿಯದ 3ನೇ ವಿಕೆಟ್​ಗೆ ಪೇರಿಸಿದ 263 ರನ್ ಫಲವಾಗಿ ಮೊದಲ ದಿನದಾಟದ ಅಂತ್ಯಕ್ಕೆ 2 ವಿಕೆಟ್​ಗೆ 296 ರನ್ ಗಳಿಸಿದೆ.

ಟಾಸ್ ಜಯಿಸಿ ಮೊದಲು ಬ್ಯಾಟಿಂಗ್ ಮಾಡಿದ ಸೌರಾಷ್ಟ್ರ ತಂಡಕ್ಕೆ ಎಡಗೈ ಸ್ಪಿನ್ನರ್ ಜೆ.ಸುಚಿತ್ ಮಾರಕ ದಾಳಿಯಿಂದ ಆಘಾತ ನೀಡಿದರು. ಇದರೊಂದಿಗೆ ಆರಂಭದಲ್ಲೇ ಸ್ಪಿನ್ನರ್​ಗಳಿಗೆ ನೆರವೀಯುವ ಪಿಚ್​ನ ಲಾಭ ಗಿಟ್ಟಿಸಿಕೊಳ್ಳಲು ಸುಚಿತ್ ಯಶಸ್ವಿಯಾದರು. ಸೌರಾಷ್ಟ್ರ ತಂಡದ ಆರಂಭಿಕರಾದ ಹಾರ್ವಿಕ್ ದೇಸಾಯಿ (13) ಹಾಗೂ ಸ್ನೆಲ್ ಪಟೇಲ್ (16) ಜೋಡಿ ಮಂದಗತಿ ಆರಂಭ ನೀಡಿತು. ಇನಿಂಗ್ಸ್ 17ನೇ ಓವರ್​ನಲ್ಲಿ ವಿಕೆಟ್ ಕೀಪರ್- ಬ್ಯಾಟ್ಸ್​ಮನ್ ಸ್ನೆಲ್ ಪಟೇಲ್ ಸುಚಿತ್ ಎಸೆತದಲ್ಲಿ ಅವರಿಗೆ ಕ್ಯಾಚ್ ನೀಡಿದರು. ಇದರೊಂದಿಗೆ 28 ರನ್ ಪೇರಿಸುವಷ್ಟರಲ್ಲಿ ಸೌರಾಷ್ಟ್ರ ಮೊದಲ ವಿಕೆಟ್ ಕಳೆದುಕೊಂಡಿತು. ಇದಾದ ಕೆಲಹೊತ್ತಿನಲ್ಲೇ ಹಾರ್ವಿಕ್ ದೇಸಾಯಿ ಕೂಡ ಸುಚಿತ್ ಎಸೆತದಲ್ಲಿ ಸಿದ್ದಾರ್ಥ್​ಗೆ ಕ್ಯಾಚ್ ನೀಡಿದರು. 33 ರನ್​ಗಳಿಗೆ 2 ವಿಕೆಟ್ ಕಳೆದುಕೊಂಡಿದ್ದ ಸೌರಾಷ್ಟ್ರದ ಮೇಲೆ ಕರ್ನಾಟಕ ಮೇಲುಗೈ ಕಂಡಿತ್ತು.

ಪೂಜಾರ 50ನೇ ಶತಕ ದಾಖಲೆ

ತಜ್ಞ ಟೆಸ್ಟ್ ಬ್ಯಾಟ್ಸ್​ಮನ್ ಚೇತೇಶ್ವರ ಪೂಜಾರ ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 50ನೇ ಶತಕ ದಾಖಲಿಸಿದರು. ಇದರೊಂದಿಗೆ ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ 50 ಶತಕ ಪೂರೈಸಿದ ಭಾರತದ 9ನೇ ಬ್ಯಾಟ್ಸ್​ಮನ್ ಎನಿಸಿಕೊಂಡರು. ಸುನೀಲ್ ಗಾವಸ್ಕರ್ (81), ಸಚಿನ್ ತೆಂಡುಲ್ಕರ್ (81), ರಾಹುಲ್ ದ್ರಾವಿಡ್ (68), ವಿಜಯ್ ಹಜಾರೆ (60), ದೀಲಿಪ್ ವೆಂಗ್ಸರ್ಕಾರ್ (55), ವಿವಿಎಸ್ ಲಕ್ಷ್ಮಣ್ (55), ಮೊಹಮದ್ ಅಜರುದ್ದೀನ್ (54) ಹಾಗೂ ವಾಸೀಂ ಜಾಫರ್ (57) ಈ ಸಾಧನೆ ಮಾಡಿದ್ದಾರೆ.

ತಡೆಗೋಡೆಯಾದ ಪೂಜಾರ-ಜಾಕ್ಸನ್

ರಾಷ್ಟ್ರೀಯ ಟೆಸ್ಟ್ ತಂಡದ ಆಟಗಾರ ಚೇತೇಶ್ವರ ಪೂಜಾರ ಹಾಗೂ ಶೆಲ್ಡನ್ ಜಾಕ್ಸನ್ ಜೋಡಿ ಕರ್ನಾಟಕ ದಾಳಿಗೆ ಪ್ರತಿರೋಧ ನೀಡಿತು. ಅಲ್ಪಮೊತ್ತಕ್ಕೆ ಕಡಿವಾಣ ಹಾಕುವ ಯೋಜನೆಯಲ್ಲಿದ್ದ ಕರ್ನಾಟಕ ತಂಡಕ್ಕೆ ದಿನವಿಡಿ ಬ್ಯಾಟಿಂಗ್ ಕಾಯ್ದುಕೊಳ್ಳುವ ಮೂಲಕ ಈ ಜೋಡಿ ಆಘಾತ ನೀಡಿತು. ಬೆಂಗಳೂರಿನಲ್ಲಿ ನಡೆದ ಕಳೆದ ಆವೃತ್ತಿಯ ಸೆಮಿಫೈನಲ್​ನಲ್ಲಿ ಹೋರಾಟದಲ್ಲಿ ಕರ್ನಾಟಕ ತಂಡದಿಂದ ಗೆಲುವು ಕಸಿದಿದ್ದ ಈ ಜೋಡಿಯೇ ಮತ್ತೊಮ್ಮೆ ಶ್ರೇಯಸ್ ಗೋಪಾಲ್ ಪಡೆಯನ್ನು ಕಾಡಿತು. ಸುಮಾರು ಎರಡೂವರೆ ಅವಧಿ ಬ್ಯಾಟಿಂಗ್ ಕಾಯ್ದುಕೊಂಡ ಈ ಜೋಡಿ ದಿನವಿಡಿ ಪ್ರಭುತ್ವ ಸಾಧಿಸಿತು. ಈ ಜೋಡಿ ಬೇರ್ಪಡಿಸಲು ನಾಯಕ ಶ್ರೇಯಸ್ ಗೋಪಾಲ್ ನಡೆಸಿದ ಪ್ರಯೋಗ, ಜತೆಗೆ ಪದೆ ಪದೇ ಬೌಲರ್ ಬದಲಿಸಿದರೂ ಪ್ರಯೋಜನವಾಗಲಿಲ್ಲ. ಜತೆಗೆ ಶತಕದಂಚಿನಲ್ಲಿರುವ ಶೆಲ್ಡನ್ ದಿನದಾಟದ ಕೊನೇ ಹಂತದಲ್ಲಿ ವಿಕೆಟ್ ಕೀಪರ್ ಶರತ್ ಅವರಿಂದ ಜೀವದಾನ ಪಡೆದರು.

ಸೌರಾಷ್ಟ್ರ ಪ್ರಥಮ ಇನಿಂಗ್ಸ್:

90 ಓವರ್​ಗಳಲ್ಲಿ 2 ವಿಕೆಟ್​ಗೆ 296

ಹಾರ್ವಿಕ್ ದೇಸಾಯಿ ಸಿ ಸಿದ್ಧಾರ್ಥ್ ಬಿ ಸುಚಿತ್ 13

ಸ್ನೆಲ್ ಪಟೇಲ್ ಸಿ ಮತ್ತು ಬಿ ಸುಚಿತ್ 16

ಚೇತೇಶ್ವರ ಪೂಜಾರ ಬ್ಯಾಟಿಂಗ್ 162

ಶೆಲ್ಡನ್ ಜಾಕ್ಸನ್ ಬ್ಯಾಟಿಂಗ್ 99

ಇತರ: 6. ವಿಕೆಟ್ ಪತನ: 1-28, 2-33. ಬೌಲಿಂಗ್: ರೋನಿತ್ 18-3-47-0, ಪ್ರತೀಕ್ ಜೈನ್ 15-9-22-0, ಸುಚಿತ್ 23-3-85-2, ಶ್ರೇಯಸ್ ಗೋಪಾಲ್ 12-0-63-0, ಪವನ್ ದೇಶಪಾಂಡೆ 12-0-33-0, ಪ್ರವೀಣ್ ದುಬೆ 10-0-41-0.

297: ಪ್ರವೀಣ್ ದುಬೆ, ರಣಜಿ ಟ್ರೋಫಿಯಲ್ಲಿ ಕರ್ನಾಟಕ ಪರ ಆಡಿದ 297ನೇ ಆಟಗಾರ ಎನಿಸಿಕೊಂಡರು. ಜತೆಗೆ ಪ್ರಸಕ್ತ ವರ್ಷ ರಣಜಿ ಟ್ರೋಫಿಗೆ ಪದಾರ್ಪಣೆ ಮಾಡಿದ 3ನೇ ಆಟಗಾರ. ಇದಕ್ಕೂ ಮೊದಲು ವಿ.ಕೌಶಿಕ್, ರೋಹನ್ ಕದಂ ಪದಾರ್ಪಣೆ ಮಾಡಿದ್ದರು.

21: ಚೇತೇಶ್ವರ ಪೂಜಾರ, 66ನೇ ರಣಜಿ ಟ್ರೋಫಿ ಪಂದ್ಯದಲ್ಲಿ 21ನೇ ಶತಕ ಸಿಡಿಸಿದರು. ಸೌರಾಷ್ಟ್ರ ಪರ ಅತಿ ಹೆಚ್ಚು ಶತಕ ಸಿಡಿಸಿದ ಬ್ಯಾಟ್ಸ್​ಮನ್ ಎನಿಸಿಕೊಂಡರು.

04: ಚೇತೇಶ್ವರ ಪೂಜಾರ, ರಣಜಿ ಟ್ರೋಫಿಯಲ್ಲಿ ಕರ್ನಾಟಕ ವಿರುದ್ಧ 4ನೇ ಶತಕ ಸಿಡಿಸಿದರು. ಇದಕ್ಕೂ ಮೊದಲು 2018-19ರಲ್ಲಿ (131*), 2012-13 (352), ಹಾಗೂ 2008-09 (112*) ಶತಕ ಬಾರಿಸಿದ್ದರು. 

ಗೋವಾ ನಾಯಕ ಅಮಿತ್ ವರ್ಮ ಶತಕ

ಕರ್ನಾಟಕ ತಂಡದ ಮಾಜಿ ಆಟಗಾರ, ಗೋವಾ ತಂಡ ಮುನ್ನಡೆಸುತ್ತಿರುವ ಅಮಿತ್ ವರ್ಮ (113*ರನ್, 192 ಎಸೆತ, 15 ಬೌಂಡರಿ) ಪುದುಚೇರಿ ಎದುರು ಶತಕ ಸಿಡಿಸಿ ಸಂಭ್ರಮಿಸಿದರು. ಮೊದಲ ದಿನದಾಟದಲ್ಲಿ ಬಿಹಾರ್ ತಂಡದ ಇಂದ್ರಜಿತ್ ಕುಮಾರ್ (134), ಛತ್ತೀಸ್​ಗಢ ತಂಡದ ಅಮಾನ್​ದೀಪ್ ಖರೆ (105), ನಾಗಾಲ್ಯಾಂಡ್ ತಂಡದ ಶ್ರೀಕಾಂತ್ ಮುಂಡೆ (166), ಜಮ್ಮು ಕಾಶ್ಮೀರ ತಂಡದ ಪರ್ವೆಜ್ ರಸೂಲ್ (171*) ಶತಕ ದಾಖಲಿಸಿದರೆ, ಆಂಧ್ರದ ಕೆವಿ ಶಶಿಕಾಂತ್ (60ಕ್ಕೆ 5), ರೈಲ್ವೇಸ್ ತಂಡದ ಹಿಮಾಂಶು ಸಂಗ್ವಾನ್ (33ಕ್ಕೆ 6), ವಿದರ್ಭ ತಂಡದ ಅಕ್ಷಯ್ ವಾಖರೆ (56ಕ್ಕೆ 5), ಒಡಿಶಾದ ಸೂರ್ಯಕಾಂತ್ ಪ್ರಧಾನ್ (36ಕ್ಕೆ 6) 5 ವಿಕೆಟ್ ಗೊಂಚಲು ಪಡೆದರು. ಅಗರ್ತಲಾದಲ್ಲಿ ನಿಗದಿಯಾಗಿರುವ ತ್ರಿಪುರ ಹಾಗೂ ಉತ್ತರಾಖಂಡ ನಡುವಿನ ಎಲೈಟ್ ಸಿ ಗುಂಪಿನ ಪಂದ್ಯದ ಮೊದಲ ದಿನದಾಟ ಮಂದ ಬೆಳಕಿನಿಂದಾಗಿ ರದ್ದುಗೊಂಡಿತು.