ಆರ್ಚರಿ ವಿಶ್ವಕಪ್​ನಲ್ಲಿ ಐತಿಹಾಸಿಕ ಪದಕ ಸಾಧನೆ ಮೆರೆದ ಭಾರತದ ಬಿಲ್ಗಾರರು

ಶಾಂಘೈ: ಧೀರಜ್​ ಬೊಮ್ಮದೇವರ, ತರುಣ್​ದೀಪ್​ ರೈ ಮತ್ತು ಪ್ರವಿಣ್​ ಜಾಧವ್​ ಒಳಗೊಂಡ ಭಾರತದ ಪುರುಷರ ರಿಕರ್ವ್​ ತಂಡ ಹಾಲಿ ಒಲಿಂಪಿಕ್ಸ್​ ಚಾಂಪಿಯನ್​ ದ. ಕೊರಿಯಾ ತಂಡಕ್ಕೆ ಆಘಾತ ನೀಡುವ ಮೂಲಕ ಆರ್ಚರಿ ವಿಶ್ವಕಪ್​ನಲ್ಲಿ 14 ವರ್ಷಗಳ ಬಳಿಕ ಐತಿಹಾಸಿಕ ಸ್ವರ್ಣ ಪದಕ ಗೆದ್ದ ಸಾಧನೆ ಮಾಡಿದೆ. ಮಹಿಳೆಯರ ವೈಯಕ್ತಿಕ ವಿಭಾಗದಲ್ಲಿ ಅನುಭವಿ ಬಿಲ್ಗಾರ್ತಿ ದೀಪಿಕಾ ಕುಮಾರಿ ರಜತ ಪದಕ ಗೆದ್ದುಕೊಂಡರು. ಇದರೊಂದಿಗೆ ಭಾರತ ಕೂಟದಲ್ಲಿ ಒಟ್ಟು 5 ಚಿನ್ನ, 2 ಬೆಳ್ಳಿ ಮತ್ತು 1 ಕಂಚಿನ ಪದಕ ಗೆಲುವಿನೊಂದಿಗೆ ಅಭಿಯಾನ ಮುಗಿಸಿದೆ. ಇದು ಆರ್ಚರಿ ವಿಶ್ವಕಪ್​ ಆವೃತ್ತಿಯೊಂದರಲ್ಲಿ ಭಾರತ ಇದುವರೆಗೆ ಗೆದ್ದ ಗರಿಷ್ಠ ಪದಕ ಸಾಧನೆಯಾಗಿದೆ.

40 ವರ್ಷದ ಯೋಧ ತರುಣ್​ದೀಪ್​ ರೈ ಒಳಗೊಂಡ ಭಾರತ ತಂಡ ಈ ಮುನ್ನ 2010ರಲ್ಲಿ ಕೊನೆಯದಾಗಿ ರಿಕರ್ವ್​ ತಂಡ ವಿಭಾಗದಲ್ಲಿ ಚಿನ್ನ ಗೆದ್ದಿತ್ತು. ಫೈನಲ್​ ಪಂದ್ಯದಲ್ಲಿ ಭಾರತ ತಂಡ 5-1ರಿಂದ ಕೊರಿಯಾ ತಂಡವನ್ನು ಮಣಿಸಿತು. ಮಿಶ್ರ ತಂಡ ವಿಭಾಗದಲ್ಲಿ ಅಂಕಿತಾ ಭಕತ್​ ಮತ್ತು ಧೀರಜ್​ ಜೋಡಿ ಕಂಚಿನ ಪದಕ ಜಯಿಸಿತು. ತಾಯ್ತನದ ಬಿಡುವಿನ ಬಳಿಕ ಮರಳಿರುವ ದೀಪಿಕಾ ಕುಮಾರಿ ಫೈನಲ್​ನಲ್ಲಿ ಕೊರಿಯಾದ ಲಿಮ್​ ಸಿಹ್ಯೋನ್​ ವಿರುದ್ಧ 0-6ರಿಂದ ಪರಾಭವಗೊಂಡರು.

https://www.vijayavani.net/bronze-medal-for-neol-the-states-uplift-in-asian-junior-athletics