ಒಲಿಂಪಿಕ್ಸ್​ಗೆ ಅಮಿತ್, ಮೇರಿ ಭಾರತದ 8 ಬಾಕ್ಸರ್​ಗಳಿಗೆ ಟೋಕಿಯೊ ಟಿಕೆಟ್ ಖಾತ್ರಿ

ಅಮ್ಮಾನ್(ಜೋರ್ಡಾನ್): ಆರು ಬಾರಿಯ ವಿಶ್ವ ಚಾಂಪಿಯನ್ ಎಂಸಿ ಮೇರಿ ಕೋಮ್ ವಿಶ್ವ ನಂ. 1 ಬಾಕ್ಸರ್ ಅಮಿತ್ ಪಾಂಗಲ್ ಮತ್ತು ಸಿಮ್ರನ್​ಜಿತ್ ಕೌರ್ ಟೋಕಿಯೊ ಒಲಿಂಪಿಕ್ಸ್ ಅರ್ಹತೆ ಸಂಪಾದಿಸಿದ್ದಾರೆ.

ಏಷ್ಯಾ-ಓಶಿಯಾನಿಯಾ ಬಾಕ್ಸಿಂಗ್ ಅರ್ಹತಾ ಕೂಟದಲ್ಲಿ ಸೆಮಿಫೈನಲ್​ಗೇರುವ ಮೂಲಕ ಇವರೆಲ್ಲರೂ ಈ ಸಾಧನೆ ಮಾಡಿದ್ದು, ಒಲಿಂಪಿಕ್ಸ್ ಟಿಕೆಟ್ ಖಾತ್ರಿ ಪಡಿಸಿಕೊಂಡ ಭಾರತೀಯ ಬಾಕ್ಸರ್​ಗಳ ಸಂಖ್ಯೆ 8ಕ್ಕೇರಿದೆ. 63 ಕೆಜಿ ವಿಭಾಗದಲ್ಲಿ ಮನೀಷ್ ಕೌಶಿಕ್ ಕ್ವಾರ್ಟರ್​ಫೈನಲ್​ನಲ್ಲಿ ಸೋಲು ಕಂಡರೂ, ಒಲಿಂಪಿಕ್ಸ್ ಅರ್ಹತೆಯ ರೇಸ್​ನಲ್ಲಿ ಉಳಿದುಕೊಂಡಿದ್ದರೆ, ಮಹಿಳೆಯರ ವಿಭಾಗದಲ್ಲಿ ಸಾಕ್ಷಿ ಚೌಧರಿ 8ರ ಘಟ್ಟದಲ್ಲಿ ಸೋತು ಒಲಿಂಪಿಕ್ಸ್ ಅರ್ಹತೆಯಿಂದ ವಂಚಿತರಾಗಿದ್ದಾರೆ.

37 ವರ್ಷದ ಮೇರಿ ಕೋಮ್ ಮಹಿಳೆಯರ 51 ಕೆಜಿ ವಿಭಾಗದ ಕ್ವಾರ್ಟರ್​ಫೈನಲ್​ನಲ್ಲಿ ಫಿಲಿಪ್ಪಿನ್ಸ್​ನ ಐರಿಸ್ ಮ್ಯಾಂಗೋಗೆ 5-0ಯಿಂದ ಸೋಲುಣಿಸಿದರು. ವಿಶ್ವ ಬಾಕ್ಸಿಂಗ್ ರಜತ ವಿಜೇತ ಅಮಿತ್ ಪಾಂಗಲ್ 52 ಕೆಜಿ ವಿಭಾಗದ ಕ್ವಾರ್ಟರ್​ಫೈನಲ್​ನಲ್ಲಿ ಫಿಲಿಪ್ಪಿನ್ಸ್​ನ ಕಾಲೋ ಪಾಲಂ ವಿರುದ್ಧ 4-1ರಿಂದ ಸುಲಭ ಗೆಲುವು ದಾಖಲಿಸಿದರು. ಸಿಮ್ರಾನ್​ಜಿತ್ ಕೌರ್ ಮಹಿಳೆಯರ 60 ಕೆಜಿ ವಿಭಾಗದಲ್ಲಿ ಸೆಮಿಫೈನಲ್​ಗೇರಿ ಒಲಿಂಪಿಕ್ಸ್ ಟಿಕೆಟ್ ಸಂಪಾದಿಸಿದರು.

ಮನೀಷ್ ಕೌಶಿಕ್ 2-3ರಿಂದ ಮಂಗೋಲಿ ಯಾದ ಬಾಟರ್ಸಖ್ ವಿರುದ್ಧ ಸೋಲು ಕಂಡರು. ಇನ್ನು ಕ್ವಾರ್ಟರ್​ಫೈನಲ್​ನಲ್ಲಿ ಸೋತವರ ನಡುವೆ ನಡೆಯಲಿರುವ ಬಾಕ್ಸ್ -ಆಫ್​ನಲ್ಲಿ ಗೆದ್ದರೆ ಕೌಶಿಕ್​ಗೆ ಒಲಿಂಪಿಕ್ಸ್ ಅರ್ಹತೆ ಗಳಿಸುವ ಅವಕಾಶವಿದೆ. ಮಾಜಿ ಜೂನಿಯರ್ ವಿಶ್ವ ಚಾಂಪಿಯನ್ ಸಾಕ್ಷಿ ಚೌಧರಿ ಮಹಿಳೆಯರ 57 ಕೆಜಿ ವಿಭಾಗದ ಕ್ವಾರ್ಟರ್​ಫೈನಲ್​ನಲ್ಲಿ ಸೋತರು. ಭಾನುವಾರ ಭಾರತದ ಐವರಿಗೆ ಒಲಿಂಪಿಕ್ಸ್ ಟಿಕೆಟ್ ಖಾತ್ರಿಯಾಗಿತ್ತು.

https://www.vijayavani.net/country-comes-first-sourav-ganguly-says-no-to-ravindra-jadeja-playing-ranji-trophy-final/