IPL 2024: ಹಾಲಿ ಚಾಂಪಿಯನ್​ ಚೆನ್ನೈ ಸೂಪರ್​ಕಿಂಗ್ಸ್​ಗೆ ಸತತ 2ನೇ ಜಯ; ಎಡವಿದ ಗುಜರಾತ್​ ಟೈಟಾನ್ಸ್​​

ಚೆನ್ನೈ: ಶಿವಂ ದುಬೆ (51 ರನ್​, 23 ಎಸೆತ, 2 ಬೌಂಡರಿ, 5 ಸಿಕ್ಸರ್​) ಮತ್ತು ರಚಿನ್​ ರವೀಂದ್ರ (46 ರನ್​, 20 ಎಸೆತ, 6 ಬೌಂಡರಿ, 3 ಸಿಕ್ಸರ್​) ಬಿರುಸಿನ ಬ್ಯಾಟಿಂಗ್​ ಬಲದಿಂದ ರನ್​ಮಳೆ ಹರಿಸಿದ ಹಾಲಿ ಚಾಂಪಿಯನ್​ ಚೆನ್ನೈ ಸೂಪರ್​ಕಿಂಗ್ಸ್​ ತಂಡ ಐಪಿಎಲ್​-17ರ ಪಂದ್ಯದಲ್ಲಿ ಗುಜರಾತ್​ ಟೈಟಾನ್ಸ್​ ಎದುರು 63 ರನ್​ಗಳಿಂದ ಗೆಲುವು ದಾಖಲಿಸಿದೆ. ಸತತ 2ನೇ ಜಯದೊಂದಿಗೆ ಋತುರಾಜ್​ ಗಾಯಕ್ವಾಡ್​ ಬಳಗ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಜತೆಗೆ ಟೂರ್ನಿಯ ಆತಿಥೇಯ ತಂಡವೇ ಗೆಲ್ಲುತ್ತಿರುವ ದೃಷ್ಟಾಂತ ಸತತ 7ನೇ ಪಂದ್ಯಕ್ಕೂ ವಿಸ್ತರಿಸಿದೆ.

ಎಂ. ಚಿದಂಬರಂ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಸಿಎಸ್​ಕೆ ತಂಡ 6 ವಿಕೆಟ್​ಗೆ 206 ರನ್​ ಕಲೆಹಾಕಿತು. ಪ್ರತಿಯಾಗಿ ಗುಜರಾತ್​ ಟೈಟಾನ್ಸ್​ ತಂಡ ಸಿಎಸ್​ಕೆ ವೇಗಿಗಳ ದಾಳಿಗೆ ಕುಸಿದು 8 ವಿಕೆಟ್​ಗೆ 143 ರನ್​ ಕಲೆಹಾಕಲಷ್ಟೇ ಶಕ್ತವಾಯಿತು. ಇದರೊಂದಿಗೆ 2023ರ ಫೈನಲಿಸ್ಟ್​ಗಳ ಮುಖಾಮುಖಿಯಲ್ಲಿ ಫಲಿತಾಂಶವೂ ಪುನರಾವರ್ತನೆಯಾಯಿತು.

ಗುಜರಾತ್​ಗೆ ಬೃಹತ್​ ಮೊತ್ತದ ಚೇಸಿಂಗ್​ಗೆ ಬೇಕಾದ ಬಿರುಸಿನ ಆರಂಭ ಸಿಗಲಿಲ್ಲ. ಆರಂಭಿಕರಾದ ನಾಯಕ ಶುಭಮಾನ್​ ಗಿಲ್​ (8), ವೃದ್ಧಿಮಾನ್​ ಸಾಹ (21) ಬೇಗನೆ ಔಟಾದರು. ನಂತರದಲ್ಲಿ ಸಾಯಿ ಸುದರ್ಶನ್​ (37) ಹೋರಾಟ ತೋರಲು ಯತ್ನಿಸಿದರೂ, ಅವರಿಗೆ ಸಮರ್ಥ ಬೆಂಬಲ ಲಭಿಸಲಿಲ್ಲ. ವಿಜಯ್​ ಶಂಕರ್​ (12), ಡೇವಿಡ್​ ಮಿಲ್ಲರ್​ (21), ಅಜ್ಮತ್​ಉಲ್ಲಾ ಒಮರ್ಜಾಯಿ (11) ನಿರ್ಗಮನದಿಂದ ಗುಜರಾತ್​ ಚೇಸಿಂಗ್​ ಬಲ ಕಳೆದುಕೊಂಡಿತು.

https://www.vijayavani.net/kannadigas-talent-in-ipl-in-which-team-are-karnataka-cricketers