ಐಪಿಎಲ್​ ಹರಾಜಿನಲ್ಲಿ ಅನ್​ಸೋಲ್ಡ್​ ಆದ ಬೆನ್ನಲ್ಲೇ ಟಿ20ಯಲ್ಲಿ ಅತಿವೇಗದ ಶತಕ ಸಿಡಿಸಿದ ಊರ್ವಿಲ್​ ಪಟೇಲ್​!

ಬೆಂಗಳೂರು: ಐಪಿಎಲ್​ ಮೆಗಾ ಹರಾಜಿನಲ್ಲಿ ಯಾವುದೇ ತಂಡಕ್ಕೆ ಬಿಕರಿಯಾಗದೆ ನಿರಾಸೆ ಅನುಭವಿಸಿದ್ದ ಗುಜರಾತ್​ನ ವಿಕೆಟ್​ ಕೀಪರ್​-ಬ್ಯಾಟರ್​ ಊರ್ವಿಲ್​ ಪಟೇಲ್​, ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿಯಲ್ಲಿ ತ್ರಿಪುರ ವಿರುದ್ಧ 28 ಎಸೆತಗಳಲ್ಲೇ ಮೂರಂಕಿ ತಲುಪುವ ಮೂಲಕ ಟಿ20 ಕ್ರಿಕೆಟ್​ನಲ್ಲಿ ಭಾರತದ ಅತಿವೇಗದ ಶತಕ ಸಾಧಕ ಎನಿಸಿದ್ದಾರೆ.

26 ವರ್ಷದ ಊರ್ವಿಲ್​, ರಿಷಭ್​ ಪಂತ್​ 2018ರಲ್ಲಿ ದೆಹಲಿ ಪರ 32 ಎಸೆತಗಳಲ್ಲಿ ಶತಕ ಸಿಡಿಸಿದ್ದ ಭಾರತೀಯ ದಾಖಲೆಯನ್ನು ಮುರಿದರು. ಊರ್ವಿಲ್​ ಟಿ20 ಕ್ರಿಕೆಟ್​ನ ಅತಿವೇಗದ ಶತಕ ಸಾಧನೆಯ ವಿಶ್ವದಾಖಲೆಯನ್ನು ಕೇವಲ ಒಂದು ಎಸೆತದಿಂದ ತಪ್ಪಿಸಿಕೊಂಡರು. ಈಸ್ಟೋನಿಯಾದ ಸಾಹಿಲ್​ ಚೌಹಾಣ್​ ಹಾಲಿ ವರ್ಷ ಸೈಪ್ರಸ್​ ವಿರುದ್ಧ 27 ಎಸೆತಗಳಲ್ಲೇ ಶತಕ ಸಿಡಿಸಿರುವುದು ಟಿ20ಯಲ್ಲಿ ವಿಶ್ವದಾಖಲೆಯಾಗಿದೆ.

ಕಳೆದ ವರ್ಷದ ಐಪಿಎಲ್​ನಲ್ಲಿ ಗುಜರಾತ್​ ಟೈಟಾನ್ಸ್​ ತಂಡದ ಭಾಗವಾಗಿದ್ದ ಊರ್ವಿಲ್​, ಪಂದ್ಯ ಆಡುವ ಅವಕಾಶ ಪಡೆಯದೆ ಈ ವರ್ಷ ರಿಲೀಸ್​ ಆಗಿದ್ದರು ಮತ್ತು ಇತ್ತೀಚೆಗೆ ನಡೆದ ಹರಾಜಿನಲ್ಲೂ ಅವರಿಗೆ ಯಾರೂ ಬಿಡ್​ ಮಾಡಿರಲಿಲ್ಲ.

ಊರ್ವಿಲ್​ ಕಳೆದ ವರ್ಷ ಇದೇ ದಿನದಂದು (ನ.27) ವಿಜಯ್​ ಹಜಾರೆ ಟ್ರೋಫಿ ಏಕದಿನ ಟೂರ್ನಿಯಲ್ಲಿ ಅರುಣಾಚಲ ಪ್ರದೇಶ ವಿರುದ್ಧ 41 ಎಸೆತಗಳಲ್ಲೇ ಶತಕ ಸಿಡಿಸಿದ್ದರು. ಇದು ಲಿಸ್ಟ್​ ಎ ಏಕದಿನ ಕ್ರಿಕೆಟ್​ನಲ್ಲಿ ಭಾರತೀಯರ 2ನೇ ಅತಿವೇಗದ ಶತಕವೆನಿಸಿದೆ.

ಅರುಣಾಚಲ 32 ರನ್​ಗೆ ಆಲೌಟ್​!

ಜಮ್ಮು&ಕಾಶ್ಮೀರ ವಿರುದ್ಧದ ಪಂದ್ಯದಲ್ಲಿ ಅರುಣಾಚಲ ಪ್ರದೇಶ 9.1 ಓವರ್​ಗಳಲ್ಲೇ 32 ರನ್​ಗಳಿಗೆ ಆಲೌಟ್​ ಆಯಿತು. ಇದು ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿಯಲ್ಲಿ ತಂಡವೊಂದರ 2ನೇ ಕನಿಷ್ಠ ಮೊತ್ತವಾಗಿದೆ. 2009ರಲ್ಲಿ ಜಾರ್ಖಂಡ್​ ವಿರುದ್ಧ ತ್ರಿಪುರ 30 ರನ್​ಗಳಿಗೆ ಆಲೌಟ್​ ಆಗಿದ್ದು ಕನಿಷ್ಠವಾಗಿದೆ. ಜಮ್ಮು&ಕಾಶ್ಮೀರ 3 ಓವರ್​ಗಳಲ್ಲೇ ವಿಕೆಟ್​ ನಷ್ಟವಿಲ್ಲದೆ 34 ರನ್​ ಗಳಿಸಿ ಜಯಿಸಿತು.

ಅರುಣಾಚಲ ಪರ ಯಾವ ಬ್ಯಾಟರ್​ ಕೂಡ ಎರಡಂಕಿ ತಲುಪಲಿಲ್ಲ. 8 ಇತರ ರನ್​ಗಳೇ ತಂಡಕ್ಕೆ ಗರಿಷ್ಠ ಕೊಡುಗೆ. ಐಪಿಎಲ್​ ಮೆಗಾ ಹರಾಜಿನಲ್ಲಿ 6 ಕೋಟಿ ರೂ.ಗೆ ಆರ್​ಸಿಬಿ ಸೇರಿದ ಜಮ್ಮು&ಕಾಶ್ಮೀರದ ವೇಗಿ ರಸಿಕ್​ ದಾರ್​ 2 ಓವರ್​ಗಳಲ್ಲಿ 6 ರನ್​ಗೆ 1 ವಿಕೆಟ್​ ಕಬಳಿಸಿದರೆ, 35 ಲಕ್ಷ ರೂ.ಗೆ ರಾಜಸ್ಥಾನ ಸೇರಿದ ಯಧ್ವೀರ್​ ಸಿಂಗ್​ ಚರಕ್​ 2 ವಿಕೆಟ್​ ಗಳಿಸಿದರು. ಅಕಿಬ್​ ನಬಿ 3 ಮತ್ತು ಅಬಿದ್​ ಮುಷ್ತಾಕ್​ 4 ವಿಕೆಟ್​ ಗಳಿಸಿದರು.

https://www.vijayavani.net/new-stars-who-came-to-ipl-6-young-talents-get-an-opportunity-worth-crores