ಮುಂಬೈಗೆ ಬ್ರೇಕ್​, ವಿದರ್ಭಕ್ಕೆ ಶಾಕ್​! ರಣಜಿ ಫೈನಲ್​ ಪಂದ್ಯದ ಮೊದಲ ದಿನವೇ ಜಿದ್ದಾಜಿದ್ದಿನ ಕಾದಾಟ

ಮುಂಬೈ: ಪ್ರತಿಷ್ಠಿತ ದೇಶೀಯ ಕ್ರಿಕೆಟ್​ ಟೂರ್ನಿ ರಣಜಿ ಟ್ರೋಫಿಯ 89ನೇ ಆವೃತ್ತಿಯ ೈನಲ್​ ಪಂದ್ಯದಲ್ಲಿ ಮೊದಲ ದಿನವೇ ಜಿದ್ದಾಜಿದ್ದಿನ ಕಾದಾಟ ಏರ್ಪಟ್ಟಿದೆ. ವಿದರ್ಭದ ಬಿಗಿ ಬೌಲಿಂಗ್​ ದಾಳಿಯ ನಡುವೆ ಮುಂಬೈ ತಂಡ ಶಾರ್ದೂಲ್​ ಠಾಕೂರ್​ (75 ರನ್​, 69 ಎಸೆತ, 8 ಬೌಂಡರಿ, 3 ಸಿಕ್ಸರ್​) ಬಿರುಸಿನ ಬ್ಯಾಟಿಂಗ್​ ಬಲದಿಂದ ಸಾಧಾರಣ ಮೊತ್ತ ಪೇರಿಸಿತು. ಪ್ರತಿಯಾಗಿ ವಿದರ್ಭ ಆರಂಭಿಕ ಆಘಾತ ಎದುರಿಸಿದ್ದು, ಮೊದಲ ಇನಿಂಗ್ಸ್​ ಮುನ್ನಡೆಗಾಗಿ ನಿಕಟ ಪೈಪೋಟಿ ನಡೆದಿದೆ.

ವಾಂಖೆಡೆ ಕ್ರೀಡಾಂಗಣದಲ್ಲಿ ಭಾನುವಾರ ಆರಂಭಗೊಂಡ ಪ್ರಶಸ್ತಿ ಸುತ್ತಿನ ಹೋರಾಟದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಮುಂಬೈ ತಂಡ, 64.3 ಓವರ್​ಗಳಲ್ಲಿ 224 ರನ್​ಗಳಿಗೆ ಸರ್ವಪತನ ಕಂಡಿತು. ವಿದರ್ಭ ತಂಡ ದಿನದಂತ್ಯಕ್ಕೆ 3 ವಿಕೆಟ್​ಗೆ 31 ರನ್​ ಗಳಿಸಿದ್ದು, ಇನ್ನೂ 193 ರನ್​ ಹಿನ್ನಡೆಯಲ್ಲಿದೆ. ಆರಂಭಿಕ ಅಥರ್ವ ತೈಡೆ (21*) ಜತೆಗೆ ನೈಟ್​ವಾಚ್​ಮನ್​ ಆದಿತ್ಯ ಠಾಕರೆ (0*) ಕ್ರೀಸ್​ನಲ್ಲಿದ್ದಾರೆ.

ವೇಗಿಗಳಾದ ಧವಳ್​ ಕುಲಕರ್ಣಿ (9ಕ್ಕೆ 2) ಮತ್ತು ಶಾರ್ದೂಲ್​ ಠಾಕೂರ್​ (14ಕ್ಕೆ 1) ಬಿಗಿ ದಾಳಿ ಎದುರು ವಿದರ್ಭ 24 ರನ್​ಗಳಿಗೆ 3 ವಿಕೆಟ್​ ಕಳೆದುಕೊಂಡಿತು. ಧ್ರುವ ಶೋರೆ ಮತ್ತು ಕನ್ನಡಿಗ ಕರುಣ್​ ನಾಯರ್​ ಖಾತೆ ತೆರೆಯದೆ ಔಟಾದರೆ, ಅಮನ್​ ಮೋಖಡೆ (8) ನಿರಾಸೆ ಮೂಡಿಸಿದರು.

ರಹಾನೆ, ಶ್ರೇಯಸ್​ ವಿಫಲ

ಮುಂಬೈ ತಂಡಕ್ಕೆ ಪ್ರಮುಖ ಬ್ಯಾಟರ್​ಗಳು ಕೈಕೊಟ್ಟರು. ಪೃಥ್ವಿ ಷಾ (46) ಮತ್ತು ಭೂಪೆನ್​ ಲಾಲ್ವಾನಿ (37) ಮೊದಲ ವಿಕೆಟ್​ಗೆ 81 ರನ್​ ಸೇರಿಸಿ ಉತ್ತಮ ಆರಂಭ ಒದಗಿಸಿದರು. ನಂತರದಲ್ಲಿ ಹರ್ಷ ದುಬೆ (62ಕ್ಕೆ 3), ಯಶ್​ ಠಾಕೂರ್​ (54ಕ್ಕೆ 3) ಮತ್ತು ಉಮೇಶ್​ ಯಾದವ್​ (42ಕ್ಕೆ 2) ದಾಳಿಗೆ ಕುಸಿದ ಮುಂಬೈ 30 ರನ್​ ಅಂತರದಲ್ಲಿ 6 ವಿಕೆಟ್​ ಕಳೆದುಕೊಂಡಿತು. ನಾಯಕ ಅಜಿಂಕ್ಯ ರಹಾನೆ (7), ಶ್ರೇಯಸ್​ ಅಯ್ಯರ್​ (7) ಮತ್ತು ಮುಶೀರ್​ ಖಾನ್​ (6) ವೈಫಲ್ಯ ಕಂಡರು. ನಂತರದಲ್ಲಿ ಶಾರ್ದೂಲ್​ ಬಿರುಸಿನ ಬ್ಯಾಟಿಂಗ್​ ಮೂಲಕ ಏಕಾಂಗಿಯಾಗಿ ತಂಡದ ಮೊತ್ತ ಏರಿಸಿದರು. ಸೆಮಿೈನಲ್​ನಲ್ಲಿ ಶತಕ ಸಿಡಿಸಿ ಮಿಂಚಿದ್ದ ಶಾರ್ದೂಲ್​ ಈ ಬಾರಿ 37 ಎಸೆತಗಳಲ್ಲೇ ಅರ್ಧಶತಕ ಪೂರೈಸಿ ವಿದರ್ಭ ಬೌಲರ್​ಗಳಿಗೆ ಸವಾಲಾದರು.

ಮುಂಬೈ: 64.3 ಓವರ್​ಗಳಲ್ಲಿ 224 (ಪೃಥ್ವಿ ಷಾ 46, ಭೂಪೆನ್​ 37, ಮುಶೀರ 6, ರಹಾನೆ 7, ಶ್ರೇಯಸ್​ 7, ಹಾರ್ದಿಕ್​ ತಮೋರೆ 5, ಶಮ್ಸ್​ 13, ಶಾರ್ದೂಲ್​ 75, ತುಷಾರ್​ 14, ಹರ್ಷ ದುಬೆ 62ಕ್ಕೆ 3, ಯಶ್​ ಠಾಕೂರ್​ 54ಕ್ಕೆ 3, ಉಮೇಶ್​ ಯಾದವ್​ 43ಕ್ಕೆ 2). ವಿದರ್ಭ: 13 ಓವರ್​ಗಳಲ್ಲಿ 3 ವಿಕೆಟ್​ಗೆ 31 (ಅಥರ್ವ 21*, ಕರುಣ್​ 0, ಧವಳ್​ 9ಕ್ಕೆ 2, ಶಾರ್ದೂಲ್​ 14ಕ್ಕೆ 1).

https://www.vijayavani.net/dc-win-humdinger-despite-richa-heroics-go-on-top-of-table