ಕರೊನಾ ಸೋಂಕಿಗೆ 59 ಲಕ್ಷ  ರೂ. ದೇಣಿಗೆ ನೀಡಿದ ಗಾವಸ್ಕರ್: ಕ್ರೀಡಾ ವಲಯದಿಂದ ಮತ್ತಷ್ಟು ನೆರವಿನ ಹಸ್ತ

ನವದೆಹಲಿ: ಮಾರಕ ಕರೊನಾ ಸೋಂಕಿನ ವಿರುದ್ಧದ ಹೋರಾಟಕ್ಕೆ ಕ್ರಿಕೆಟ್ ದಿಗ್ಗಜ ಸುನೀಲ್ ಗಾವಸ್ಕರ್ ಕೂಡ ಕೈಜೋಡಿಸಿದ್ದಾರೆ. ಕೋವಿಡ್-19 ಪರಿಹಾರ ನಿಧಿಗೆ ಗಾವಸ್ಕರ್ ಮಂಗಳವಾರ ಒಟ್ಟು 59 ಲಕ್ಷ ರೂ. ದೇಣಿಗೆ ನೀಡಿದ್ದಾರೆ. ಟೆಸ್ಟ್ ಬ್ಯಾಟ್ಸ್​ಮನ್ ಚೇತೇಶ್ವರ ಪೂಜಾರ ಕೂಡ ಗೌಪ್ಯ ಮೊತ್ತವನ್ನು ದೇಣಿಗೆ ನೀಡಿದ್ದಾರೆ.

ಹಾಲಿ ವೀಕ್ಷಕ ವಿವರಣೆಕಾರರಾಗಿರುವ ಗಾವಸ್ಕರ್ 35 ಲಕ್ಷ ರೂ.ಗಳನ್ನು ಪಿಎಂ-ಕೇರ್ಸ್​ಗೆ ಮತ್ತು 24 ಲಕ್ಷ ರೂ.ಗಳನ್ನು ಮಹಾರಾಷ್ಟ್ರ ಮುಖ್ಯಮಂತ್ರಿಗಳ ಪರಿಹಾರ ನಿಧಿಗೆ ದೇಣಿಗೆ ನೀಡಿದ್ದಾರೆ. ಈ ಬಗ್ಗೆ ಸ್ವತಃ ಗಾವಸ್ಕರ್ ಯಾವುದೇ ಮಾಹಿತಿ ಬಿಟ್ಟುಕೊಡದಿದ್ದರೂ, ಅವರ ಆಪ್ತ ಮೂಲಗಳಿಂದ ಮುಂಬೈ ರಣಜಿ ತಂಡದ ಮಾಜಿ ಆಟಗಾರ ಅಮೊಲ್ ಮುಜುಮ್ದಾರ್ ಟ್ವಿಟರ್​ನಲ್ಲಿ ಈ ಮಾಹಿತಿ ಬಹಿರಂಗಪಡಿಸಿದ್ದಾರೆ. ಅದರ ಬೆನ್ನಲ್ಲೇ ಗಾವಸ್ಕರ್ ಪುತ್ರ ರೋಹನ್ ಗಾವಸ್ಕರ್, ‘ಈ ದೇಣಿಗೆಯನ್ನು ಕಳೆದ ವಾರವೇ ನೀಡಲಾಗಿದೆ. ಗಾವಸ್ಕರ್​ರ ಭಾರತ ಪರ 35 ಶತಕಗಳ ಪ್ರತೀಕವಾಗಿ 35 ಲಕ್ಷ ರೂ. ಮತ್ತು ಮುಂಬೈ ಪರ 24 ಶತಕಗಳ ಪ್ರತೀಕವಾಗಿ 24 ಲಕ್ಷ ರೂ. ನೀಡಲಾಗಿದೆ’ ಎಂದು ತಿಳಿಸಿದ್ದಾರೆ.

ಪೂಜಾರ ಪಿಎಂ-ಕೇರ್ಸ್ ಮತ್ತು ಗುಜರಾತ್ ಮುಖ್ಯಮಂತ್ರಿಗಳ ಪರಿಹಾರ ನಿಧಿಗೆ ದೇಣಿಗೆ ಮೊತ್ತವನ್ನು ಹಂಚಿದ್ದು, ವೈದ್ಯರು, ವೈದ್ಯಕೀಯ ಸಿಬ್ಬಂದಿ, ಪೊಲೀಸರ ಸಹಿತ ಅಗತ್ಯ ಸೇವೆಯಲ್ಲಿರುವವರಿಗೆ ಧನ್ಯವಾದವನ್ನೂ ಅರ್ಪಿಸಿದ್ದಾರೆ.

ಪಿ. ಕಶ್ಯಪ್ 3 ಲಕ್ಷ ರೂ. ದೇಣಿಗೆ: ಬ್ಯಾಡ್ಮಿಂಟನ್ ತಾರೆ ಪಾರುಪಳ್ಳಿ ಕಶ್ಯಪ್ ತೆಲಂಗಾಣ ಮುಖ್ಯಮಂತ್ರಿಗಳ ಪರಿಹಾರ ನಿಧಿಗೆ 3 ಲಕ್ಷ ರೂ. ದೇಣಿಗೆ ನೀಡಿದ್ದಾರೆ.

ಯುವ ಗಾಲ್ಪರ್ ಟ್ರೋಫಿ ಮಾರಿ ದೇಣಿಗೆ: ಭಾರತದ ಯುವ ಗಾಲ್ಪ್ ಆಟಗಾರ ಅರ್ಜುನ್ ಭಾಟಿ ಕರೊನಾ ವಿರುದ್ಧದ ಹೋರಾಟಕ್ಕೆ 4.3 ಲಕ್ಷ ರೂ. ದೇಣಿಗೆ ನೀಡಲು ಮುಂದಾಗಿದ್ದಾರೆ. ಕಳೆದ 8 ವರ್ಷಗಳಲ್ಲಿ ತಾವು ಗೆದ್ದ 102 ಟ್ರೋಫಿಗಳನ್ನು ಮಾರಾಟ ಮಾಡಿರುವ ಅವರು, ಅದರಿಂದ ಬಂದ ಹಣವನ್ನು ಪಿಎಂ-ಕೇರ್ಸ್​ಗೆ ದೇಣಿಗೆ ನೀಡಲು ನಿರ್ಧರಿಸಿದ್ದಾರೆ. ‘ದೇಶ ಈಗ ಕಠಿಣ ಸಮಯ ಎದುರಿಸುತ್ತಿದೆ. ಹೀಗಾಗಿ ಎಲ್ಲರೂ ಈಗ ದೇಶದ ಸೇವೆಗೆ ಮುಂದಾಗಬೇಕಿದೆ. ನನ್ನಂತೆಯೇ ಎಲ್ಲರೂ ತಮ್ಮಿಂದ ಆದ ಕೊಡುಗೆಗಳನ್ನು ನೀಡಿರಿ’ ಎಂದು 15 ವರ್ಷದ ಅರ್ಜುನ್ ಭಾಟಿ ಹೇಳಿದ್ದಾರೆ. -ಏಜೆನ್ಸೀಸ್

https://www.vijayavani.net/lockdown-formercmhdk-mercenaries/