ರಾಷ್ಟ್ರೀಯ ಕ್ರೀಡಾಕೂಟದ ಈಜುಕೊಳದಲ್ಲಿ ಕರ್ನಾಟಕ ಭರ್ಜರಿ ಪದಕ ಬೇಟೆ

ಬೆಂಗಳೂರು: ಕರ್ನಾಟಕದ ಈಜುಪಟುಗಳು ಗೋವಾದಲ್ಲಿ ನಡೆಯುತ್ತಿರುವ 37ನೇ ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಶುಕ್ರವಾರ ಮತ್ತೆ 4 ಚಿನ್ನದ ಪದಕ ಬೇಟೆಯಾಡಿದ್ದಾರೆ. ಜತೆಗೆ 1 ಬೆಳ್ಳಿ, 4 ಕಂಚು ಗೆಲುವಿನೊಂದಿಗೆ ಕೂಟದ 6ನೇ ದಿನದ ಕ್ರೀಡಾಸ್ಪರ್ಧೆಯಲ್ಲಿ ಒಟ್ಟು 9 ಪದಕಗಳನ್ನು ಬಾಚಿಕೊಂಡಿದ್ದಾರೆ. ಈ ಮೂಲಕ ಕರ್ನಾಟಕ ಒಟ್ಟು 25 ಚಿನ್ನ, 17 ಬೆಳ್ಳಿ, 21 ಕಂಚಿನ ಸಹಿತ ಒಟ್ಟು 63 ಪದಕಗಳೊಂದಿಗೆ ಪದಕಪಟ್ಟಿಯಲ್ಲಿ 4ನೇ ಸ್ಥಾನ ಕಾಯ್ದುಕೊಂಡಿದೆ.

ರಾಜ್ಯದ ಈಜುಪಟು ಮಾನವಿ ವರ್ಮ ಮಹಿಳೆಯರ 200 ಮೀ. ಮೆಡ್ಲೆ ವಿಭಾಗದಲ್ಲಿ 2 ನಿಮಿಷ, 24.21 ಸೆಕೆಂಡ್​ಗಳಲ್ಲಿ ಸ್ಪರ್ಧೆ ಮುಗಿಸುವ ಮೂಲಕ ನೂತನ ಕೂಟದಾಖಲೆಯೊಂದಿಗೆ ಚಿನ್ನದ ಪದಕಕ್ಕೆ ಕೊರಳೊಡ್ಡಿದರು. ಈ ಸ್ಪರ್ಧೆಯಲ್ಲಿ ರಾಜ್ಯದ ಹಷಿಕಾ ರಾಮಚಂದ್ರ ಕಂಚಿಗೆ ತೃಪ್ತಿಪಟ್ಟರು.

50 ಮೀ. ಬ್ಯಾಕ್​ಸ್ಟ್ರೊಕ್​ ಸ್ಪರ್ಧೆಯ ಪುರುಷರ ವಿಭಾಗದಲ್ಲಿ ಒಲಿಂಪಿಯನ್​ ಶ್ರೀಹರಿ ನಟರಾಜ್​ (25.77 ಸೆ.) ಮತ್ತು ಮಹಿಳೆಯರಲ್ಲಿ ರಿಧಿಮಾ ವೀರೇಂದ್ರ ಕುಮಾರ್​ (30.21ಸೆ.) ಚಿನ್ನದ ಪದಕ ಗೆದ್ದುಕೊಂಡರು. ಮಿಶ್ರ 4/100 ಮೀ. ಫ್ರೀಸ್ಟೆ$ಲ್​ ರಿಲೇ ಸ್ಪರ್ಧೆಯಲ್ಲಿ ರಾಜ್ಯಕ್ಕೆ 4ನೇ ಚಿನ್ನ ಒಲಿಯಿತು. ಅನೀಶ್​ ಎಸ್​. ಗೌಡ, ಶ್ರೀಹರಿ ನಟರಾಜ್​, ಧಿನಿಧಿ ದೇಸಿಂಘು ಮತ್ತು ನೀನಾ ವೆಂಕಟೇಶ್​ (3ನಿ, 38.24ಸೆ) ಒಳಗೊಂಡ ತಂಡ ಈ ಸಾಧನೆ ಮಾಡಿತು.

ಉಳಿದಂತೆ ಶೋನ್​ ಗಂಗೂಲಿ ಮತ್ತು ಶಿವಾ ಎಸ್​. ಪುರುಷರ 200 ಮೀ. ಮೆಡ್ಲೆಯಲ್ಲಿ ಕ್ರಮವಾಗಿ ಬೆಳ್ಳಿ, ಕಂಚು ಗೆದ್ದರೆ, 400 ಮೀ. ಫ್ರೀಸ್ಟೆ$ಲ್​ನಲ್ಲಿ ಅನೀಶ್​ ಎಸ್​. ಗೌಡ, ಶಿರಿನ್​ ಕ್ರಮವಾಗಿ ಪುರುಷ&ಮಹಿಳಾ ವಿಭಾಗದಲ್ಲಿ ಕಂಚು ಜಯಿಸಿದರು.

ಚಿನ್ನದತ್ತ ಆದಿಲ್​-ಪ್ರಜ್ವಲ್​

ಟೆನಿಸ್​ ಸ್ಪರ್ಧೆಯ ಪುರುಷರ ಡಬಲ್ಸ್​ ವಿಭಾಗದಲ್ಲಿ ರಾಜ್ಯದ ಆದಿಲ್​ ಕಲ್ಯಾಣ್​ಪುರ ಮತ್ತು ಎಸ್​ಡಿ ಪ್ರಜ್ವಲ್​ ದೇವ್​ ಜೋಡಿ ಫೈನಲ್​ಗೇರಿದ್ದು, ಚಿನ್ನದ ನಿರೀಕ್ಷೆ ಮೂಡಿಸಿದೆ. ಆದಿಲ್​-ಪ್ರಜ್ವಲ್​ ಜೋಡಿ ಸೆಮಿಫೈನಲ್​ನಲ್ಲಿ ಉತ್ತರ ಪ್ರದೇಶದ ಸಿದ್ಧಾರ್ಥ್​ ರಾವತ್​-ಸಿದ್ಧಾರ್ಥ್​ ವಿಶ್ವಕರ್ಮ ಜೋಡಿಯನ್ನು 6-0, 6-1 ನೇರಸೆಟ್​ಗಳಿಂದ ಮಣಿಸಿತು. ಮಹಿಳಾ ಡಬಲ್ಸ್​ನಲ್ಲಿ ಶರ್ಮದಾ ಬಾಲು-ಸೋಹಾ ಸಾದಿಕ್​ ಜೋಡಿ ಸೆಮೀಸ್​ನಲ್ಲಿ ಸೋಲುಂಡಿತು. ಮಿಶ್ರ ಡಬಲ್ಸ್​ನಲ್ಲಿ ಪ್ರಜ್ವಲ್​-ಶರ್ಮದಾ ಜೋಡಿ ಕೂಡ ಉಪಾಂತ್ಯದಲ್ಲಿ ಎಡವಿತು.

https://www.vijayavani.net/robin-uthappa-a-lot-of-talent-has-been-mismanaged-in-karnataka-cricket