ಇಂದಿನಿಂದ ಬೆಂಗಳೂರಿನಲ್ಲಿ ಟೆಸ್ಟ್​ ಪಂದ್ಯ; ಭಾರತ-ಕಿವೀಸ್​ ಕಾದಾಟಕ್ಕೆ ಮಳೆ ಕಾರ್ಮೋಡ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಯುವ&ಅನುಭವಿ ಆಟಗಾರರ ಬಲಿಷ್ಠ ನಿರ್ವಹಣೆಯೊಂದಿಗೆ ಉತ್ತಮ ಲಯದಲ್ಲಿರುವ ಭಾರತ ತಂಡ ಪ್ರವಾಸಿ ನ್ಯೂಜಿಲೆಂಡ್​ ವಿರುದ್ಧದ 3 ಪಂದ್ಯಗಳ ಟೆಸ್ಟ್​ ಸರಣಿಯ ಸವಾಲಿಗೆ ಸಜ್ಜಾಗಿದೆ. ಸತತ 3ನೇ ಬಾರಿ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ೈನಲ್​ಗೇರುವ ನಿಟ್ಟಿನಲ್ಲಿ ಭಾರತದ ಪಾಲಿಗೆ ಮಹತ್ವದ್ದಾಗಿರುವ ಸರಣಿಯಲ್ಲಿ, ಉದ್ಯಾನನಗರಿಯ ಚಿನ್ನಸ್ವಾಮಿ ಸ್ಟೇಡಿಯಂ ಬುಧವಾರದಿಂದ ಮೊದಲ ಪಂದ್ಯಕ್ಕೆ ಆತಿಥ್ಯ ವಹಿಸಿಕೊಳ್ಳಲಿದೆ. ಆದರೆ ಆತಿಥೇಯರಿಗೆ ಪ್ರವಾಸಿ ತಂಡಕ್ಕಿಂತ ಮಳೆ ಭೀತಿಯೇ ದೊಡ್ಡ ಚಿಂತೆ ಎನಿಸಿದೆ.

ರೋಹಿತ್​ ಶರ್ಮ ಪಡೆ ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ 2-0ಯಿಂದ ಗೆದ್ದು ತವರಿನಲ್ಲಿ ಉತ್ತಮ ಸಿದ್ಧತೆ ನಡೆಸಿದ್ದರೆ, ನ್ಯೂಜಿಲೆಂಡ್​ ತಂಡ ಶ್ರೀಲಂಕಾದಲ್ಲಿ 0-2ರಿಂದ ಸರಣಿ ಸೋತ ಹಿನ್ನಡೆ ಹೊಂದಿದೆ. ಹೀಗಾಗಿ ಕಳೆದ 12 ವರ್ಷಗಳಿಂದ ತವರಿನಲ್ಲಿ ಒಂದೂ ಸರಣಿ ಸೋಲದಿರುವ ಭಾರತವೇ ಸರಣಿಯಲ್ಲಿ ಫೇವರಿಟ್​ ತಂಡವಾಗಿ ಕಣಕ್ಕಿಳಿಯಲಿದೆ. ಕಿವೀಸ್​ ತಂಡ ಮೊದಲ ಟೆಸ್ಟ್​ನಲ್ಲಿ ಅನುಭವಿ ಬ್ಯಾಟರ್​ ಕೇನ್​ ವಿಲಿಯಮ್ಸನ್​ ಅಲಭ್ಯತೆಯ ಹಿನ್ನಡೆಯನ್ನೂ ಹೊಂದಿದೆ. ಲಂಕಾದಲ್ಲಿ ಸ್ಪಿನ್ನರ್​ಗಳ ಎದುರು ತತ್ತರಿಸಿದ್ದ ಕಿವೀಸ್​ಗೆ ಆರ್​. ಅಶ್ವಿನ್​-ರವೀಂದ್ರ ಜಡೇಜಾ ಜೋಡಿ ಅತಿ ದೊಡ್ಡ ಸವಾಲೆನಿಸಲಿದೆ. ವರ್ಷಾಂತ್ಯದ ಬಾರ್ಡರ್​&ಗಾವಸ್ಕರ್​ ಟ್ರೋಫಿಗೆ ಸಿದ್ಧತೆಯ ದೃಷ್ಟಿಯಿಂದ ಭಾರತಕ್ಕೆ ಇದು ಮಹತ್ವದ ಸರಣಿ ಎನಿಸಿದೆ.

ಲಂಕಾ ಸರಣಿಯ ನಂತರ ಟಿಮ್​ ಸೌಥಿ ನಾಯಕತ್ವ ತ್ಯಜಿಸಿದ್ದರೆ, ಟಾಮ್​ ಲಾಥಮ್​ ಹೊಸ ನಾಯಕರಾಗಿದ್ದಾರೆ. ಈ ಬದಲಾವಣೆಯಿಂದ ಕಿವೀಸ್​, ಉಪಖಂಡದಲ್ಲಿ ತನ್ನ ದಾಖಲೆ ಸುಧಾರಿಸುವ ಕನಸಿನಲ್ಲಿದೆ.

ಟೀಮ್​ ನ್ಯೂಸ್​

ಭಾರತ: ಸೀಮಿತ ಓವರ್​ ತಂಡದ ಉಪನಾಯಕ ಶುಭಮಾನ್​ ಗಿಲ್​ ಕುತ್ತಿಗೆ ನೋವು ಹೊಂದಿದ್ದಾರೆ. ಒಂದು ವೇಳೆ ಅವರು ಫಿಟ್​ ಆಗದಿದ್ದರೆ ಸ್ರಾರ್ಜ್​ ಖಾನ್​ ಅವಕಾಶ ಪಡೆಯಲಿದ್ದಾರೆ. ಆದರೆ ಗಿಲ್​ ಆಡುವ 3ನೇ ಕ್ರಮಾಂಕದಲ್ಲಿ ಆಗ ಕೆಎಲ್​ ರಾಹುಲ್​ ಆಡಬಹುದು. ಇದೇ ವೇಳೆ 3ನೇ ಸ್ಪಿನ್ನರ್​ ಅಥವಾ 3ನೇ ವೇಗಿಯನ್ನು ಆಡಿಸುವುದೇ ಎಂಬ ಗೊಂದಲ ಕಾಡುತ್ತಿದೆ. ಆದರೆ ಮಳೆ&ಮೋಡದ ವಾತಾವರಣದಿಂದಾಗಿ 3ನೇ ವೇಗಿಯನ್ನು ಆಡಿಸುವ ಸಾಧ್ಯತೆಯೇ ಹೆಚ್ಚಿದೆ.

ಸಂಭಾವ್ಯ ತಂಡ: ರೋಹಿತ್​ ಶರ್ಮ (ನಾಯಕ), ಯಶಸ್ವಿ ಜೈಸ್ವಾಲ್​, ಶುಭಮಾನ್​ ಗಿಲ್​/ಸ್ರಾರ್ಜ್​ ಖಾನ್​, ವಿರಾಟ್​ ಕೊಹ್ಲಿ, ರಿಷಭ್​ ಪಂತ್​ (ವಿ.ಕೀ), ಕೆಎಲ್​ ರಾಹುಲ್​, ರವೀಂದ್ರ ಜಡೇಜಾ, ಆರ್​. ಅಶ್ವಿನ್​, ಆಕಾಶ್​ದೀಪ್​/ಕುಲದೀಪ್​, ಜಸ್​ಪ್ರೀತ್​ ಬುಮ್ರಾ (ಉಪನಾಯಕ), ಮೊಹಮದ್​ ಸಿರಾಜ್​.

ನ್ಯೂಜಿಲೆಂಡ್​: ಅನುಭವಿ ಬ್ಯಾಟರ್​ ಕೇನ್​ ವಿಲಿಯಮ್ಸನ್​ ಫಿಟ್ನೆಸ್​ ಸಮಸ್ಯೆಯಿಂದಾಗಿ ಪಂದ್ಯ ತಪ್ಪಿಸಿಕೊಳ್ಳಲಿದ್ದಾರೆ. ಅವರ ಸ್ಥಾನದಲ್ಲಿ ವಿಲ್​ ಯಂಗ್​ ಕಣಕ್ಕಿಳಿಯಲಿದ್ದಾರೆ. ಕಿವೀಸ್​ ಕೂಡ 3ನೇ ಸ್ಪಿನ್ನರ್​ (ಮಿಚೆಲ್​ ಸ್ಯಾಂಟ್ನರ್​) ಮತ್ತು 3ನೇ ವೇಗಿ (ಮ್ಯಾಟ್​ ಹೆನ್ರಿ) ನಡುವೆ ಆಯ್ಕೆ ಗೊಂದಲದಲ್ಲಿದ್ದು, ಬುಧವಾರ ಬೆಳಗ್ಗೆ ಪಿಚ್​ ಪರಿಶೀಲಿಸಿ ತಂಡ ಅಂತಿಮಗೊಳಿಸಬಹುದು. ವೇಗಿ ಬೆನ್​ ಸಿಯರ್ಸ್​ ಮೊಣಕಾಲು ಗಾಯದಿಂದಾಗಿ ಸರಣಿಯಿಂದ ಹೊರಬಿದ್ದಿದ್ದು, ಜೇಕಬ್​ ಡಫಿ ಬದಲಿಗರಾಗಿ ಸೇರ್ಪಡೆಯಾಗಿದ್ದಾರೆ. ಆದರೆ 30 ವರ್ಷ ಡಫಿ ಬುಧವಾರವಷ್ಟೇ ಭಾರತಕ್ಕೆ ಪ್ರಯಾಣ ಬೆಳಸಲಿರುವುದರಿಂದ 2ನೇ ಟೆಸ್ಟ್​ಗಷ್ಟೇ ಲಭ್ಯರಾಗಲಿದ್ದಾರೆ.

ಸಂಭಾವ್ಯ ತಂಡ: ಡೆವೊನ್​ ಕಾನ್​ವೇ, ಟಾಮ್​ ಲಾಥಮ್​ (ನಾಯಕ), ವಿಲ್​ ಯಂಗ್​, ರಚಿನ್​ ರವೀಂದ್ರ, ಡೆರಿಲ್​ ಮಿಚೆಲ್​, ಟಾಮ್​ ಬ್ಲಂಡೆಲ್​ (ವಿ.ಕೀ), ಗ್ಲೆನ್​ ಫಿಲಿಪ್ಸ್​, ಮಿಚೆಲ್​ ಸ್ಯಾಂಟ್ನರ್​/ಮ್ಯಾಟ್​ ಹೆನ್ರಿ, ಟಿಮ್​ ಸೌಥಿ, ಎಜಾಜ್​ ಪಟೇಲ್​, ವಿಲ್​ ಒರೌರ್ಕೆ.

*ಮುಖಾಮುಖಿ: 62

ಭಾರತ: 22

ನ್ಯೂಜಿಲೆಂಡ್​: 13

ಡ್ರಾ: 27

ಕಾಡುತ್ತಿದೆ ಮಳೆ ಭೀತಿ

ಪಂದ್ಯದ ಮೊದಲ 3 ದಿನದಾಟ ಟಿಕೆಟ್​ಗಳು ಬಹುತೇಕ ಮಾರಾಟವಾಗಿರುವ ನಡುವೆ ಮಳೆ ಅಡಚಣೆ ಭೀತಿ ಕಾಡುತ್ತಿದೆ. ಅದರಲ್ಲೂ ಮೊದಲ 2 ದಿನದಾಟ ಮಳೆಯಿಂದಾಗಿ ಹೆಚ್ಚಿನ ತೊಂದರೆ ಅನುಭವಿಸಲಿದೆ. ಚಿನ್ನಸ್ವಾಮಿ ಸ್ಟೇಡಿಯಂ ದೇಶದಲ್ಲೇ ಅತ್ಯುತ್ತಮವಾದ ಒಳಚರಂಡಿ ವ್ಯವಸ್ಥೆ ಅಂದರೆ ಮಳೆನೀರು ಇಂಗಿಸುವ ಸಬ್​-ಏರ್​ ಸಿಸ್ಟಮ್​ ಹೊಂದಿದೆ. ಹೀಗಾಗಿ ಮಳೆ ನಿಂತ ಕೆಲವೇ ನಿಮಿಷಗಳಲ್ಲಿ ಆಟ ಆರಂಭಿಸಲು ಸಾಧ್ಯವಾಗಲಿದೆ. ಆದರೆ ಮಂಗಳವಾರ ನಗರದಲ್ಲಿ ಸುರಿದಂತೆ ನಿರಂತರ ಮಳೆಯಾದರೆ ಆಟ ಸಾಧ್ಯವಾಗದು. ಪಂದ್ಯದ ಆರಂಭಿಕ ದಿನಗಳಲ್ಲಿ ಹೆಚ್ಚಿನ ಓವರ್​ ನಷ್ಟವಾದರೆ ಭಾರತ ತಂಡ ಮತ್ತೊಮ್ಮೆ ಕಾನ್ಪುರ ಟೆಸ್ಟ್​ನಂತೆ ಆಕ್ರಮಣಕಾರಿಯಾಗಿ ಆಡಿ ಸ್ಪಷ್ಟ ಫಲಿತಾಂಶ ಕಂಡುಕೊಳ್ಳಲು ಹೋರಾಡಬಹುದು.

ಅಭ್ಯಾಸಕ್ಕೆ ಮಳೆ ಅಡ್ಡಿ

ಮಂಗಳವಾರವಿಡೀ ಸುರಿದ ಮಳೆಯಿಂದ ಭಾರತ&ನ್ಯೂಜಿಲೆಂಡ್​ ತಂಡಗಳು ಪಂದ್ಯಕ್ಕೆ ಮುನ್ನಾದಿನ ಅಭ್ಯಾಸ ನಡೆಸಲು ಸಾಧ್ಯವಾಗಲಿಲ್ಲ. ಬೆಳಗ್ಗೆ 9.30ರಿಂದ ನೆಟ್ಸ್​ ಅಭ್ಯಾಸ ನಡೆಸಬೇಕಿದ್ದ ಭಾರತ ತಂಡದ ಪ್ರಮುಖ ಆಟಗಾರರು ಹೋಟೆಲ್​ನಿಂದ ಸ್ಟೇಡಿಯಂಗೇ ಬರಲಿಲ್ಲ. ನಾಯಕ ರೋಹಿತ್​ ಶರ್ಮ ಮಾತ್ರ ಸುದ್ದಿಗೋಷ್ಠಿಗೆ ಹಾಜರಾಗಿ ಹೋದರು. ಮಧ್ಯಾಹ್ನದ ನಂತರ ಕಿವೀಸ್​ ಒಳಾಂಗಣ ಅಭ್ಯಾಸ ನಡೆಸಿತು.

ಮಳೆ ಸಾಧ್ಯತೆ

ದಿನ ಮಳೆ ಚಾನ್ಸ್​

1 (ಅ.16) 92%

2 (ಅ.17) 80%

3 (ಅ.18) 60%

4 (ಅ.19) 65%

5 (ಅ.20) 77%

ಟೆಸ್ಟ್​ ಸರಣಿ ವೇಳಾಪಟ್ಟಿ

ಪಂದ್ಯ ದಿನಾಂಕ ಸ್ಥಳ

1. ಅ.16-20 ಬೆಂಗಳೂರು

2. ಅ.24-28 ಪುಣೆ

3. ನ.1-5 ಮುಂಬೈ

ಆರಂಭ: ಬೆಳಗ್ಗೆ 9.30

ನೇರಪ್ರಸಾರ: ಸ್ಪೋರ್ಟ್ಸ್​18, ಜಿಯೋಸಿನಿಮಾ.

*53: ವಿರಾಟ್​ ಕೊಹ್ಲಿ ಇನ್ನು 53 ರನ್​ ಗಳಿಸಿದರೆ ಟೆಸ್ಟ್​ ಕ್ರಿಕೆಟ್​ನಲ್ಲಿ 9 ಸಾವಿರ ರನ್​ ಬಾರಿಸಿದ 4ನೇ ಭಾರತೀಯ ಬ್ಯಾಟರ್​ ಎನಿಸಲಿದ್ದಾರೆ. ಸಚಿನ್​ ತೆಂಡುಲ್ಕರ್​ (15,921), ರಾಹುಲ್​ ದ್ರಾವಿಡ್​ (13,265) ಮತ್ತು ಸುನೀಲ್​ ಗಾವಸ್ಕರ್​ (10,122) ಮೊದಲ ಮೂವರು.

*3: ಭಾರತ (97) ತಂಡ ಇನ್ನು 3 ಸಿಕ್ಸರ್​ ಸಿಡಿಸಿದರೆ, ಟೆಸ್ಟ್​ ಕ್ರಿಕೆಟ್​ನಲ್ಲಿ ವರ್ಷವೊಂದರಲ್ಲಿ 100 ಸಿಕ್ಸರ್​ ಸಿಡಿಸಿದ ಮೊದಲ ತಂಡವೆನಿಸಲಿದೆ. 2022ರಲ್ಲಿ ಇಂಗ್ಲೆಂಡ್​ 89 ಸಿಕ್ಸರ್​ ಸಿಡಿಸಿದ್ದು ಹಿಂದಿನ ಗರಿಷ್ಠ.

36 ವರ್ಷಗಳಿಂದ ಕಿವೀಸ್​ ತಂಡ ಭಾರತದಲ್ಲಿ ಗೆದ್ದಿಲ್ಲ!

ನ್ಯೂಜಿಲೆಂಡ್​ ತಂಡ ಭಾರತದಲ್ಲಿ ಇದುವರೆಗೆ 36 ಟೆಸ್ಟ್​ ಆಡಿದ್ದು, 17ರಲ್ಲಿ ಸೋತು, 2ರಲ್ಲಿ ಮಾತ್ರ ಗೆದ್ದಿದೆ. ಉಳಿದಂತೆ 17 ಟೆಸ್ಟ್​ ಡ್ರಾಗೊಂಡಿವೆ. ಕಿವೀಸ್​ ತಂಡ ಕೊನೆಯದಾಗಿ ಭಾರತದಲ್ಲಿ ಟೆಸ್ಟ್​ ಗೆದ್ದಿರುವುದು 1988ರಲ್ಲಿ ಮುಂಬೈನಲ್ಲಿ. ಅಂದರೆ ಕಳೆದ 36 ವರ್ಷಗಳಿಂದ ಭಾರತದಲ್ಲಿ ಒಂದೂ ಟೆಸ್ಟ್​ ಗೆದ್ದಿಲ್ಲ. ಕೊನೇ 3 ಭಾರತ ಪ್ರವಾಸಗಳಲ್ಲಿ ಆಡಿದ 7 ಟೆಸ್ಟ್​ಗಳಲ್ಲಿ ಕಿವೀಸ್​ 6ರಲ್ಲಿ ಸೋತಿದ್ದು, 1ರಲ್ಲಿ ಡ್ರಾ ಸಾಧಿಸಿದೆ.

*12: ಭಾರತ-ಕಿವೀಸ್​ ನಡುವೆ 1955-56ರಿಂದ ಇದುವರೆಗೆ ಒಟ್ಟು 12 ಟೆಸ್ಟ್​ ಸರಣಿಗಳು ನಡೆದಿವೆ. ಈ ಪೈಕಿ 10ರಲ್ಲಿ ಭಾರತವೇ ಸರಣಿ ಗೆದ್ದಿದ್ದರೆ, ಕಿವೀಸ್​ 2 ಬಾರಿ (1969-70, 2003-04) ಸಮಬಲ ಸಾಧಿಸಿರುವುದೇ ಶ್ರೇಷ್ಠ ಸಾಧನೆ ಎನಿಸಿದೆ.

ಪಿಚ್​ ರಿಪೋರ್ಟ್​

ಉದ್ಯಾನನಗರಿಯಲ್ಲಿ ಮಂಗಳವಾರ ದಿನವಿಡೀ ಸುರಿದ ಮಳೆಯಿಂದಾಗಿ ಚಿನ್ನಸ್ವಾಮಿ ಕ್ರೀಡಾಂಗಣ ಸಂಪೂರ್ಣ ಹೊದಿಕೆಯಿಂದಲೇ ಆವೃತ್ತವಾಗಿತ್ತು. ಹೀಗಾಗಿ ತೇವಾಂಶದಿಂದ ಕೂಡಿರುವ ಪಿಚ್​ ವೇಗಿಗಳಿಗೆ ಹೆಚ್ಚಿನ ನೆರವು ಕಲ್ಪಿಸುವ ನಿರೀೆ ಇದೆ.

ಸರಣಿ ಕ್ಲೀನ್​ಸ್ವೀಪ್​ ಸಾಧಿಸಿದರೆ ಡಬ್ಲ್ಯುಟಿಸಿ ಫೈನಲ್​ ಹಾದಿ ಸುಗಮ

ಭಾರತ ತಂಡ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ನಲ್ಲಿ (ಡಬ್ಲ್ಯುಟಿಸಿ) ಇನ್ನು 8 ಟೆಸ್ಟ್​ ಆಡಲಿದ್ದು, ಈ ಪೈಕಿ ಕೊನೇ 5 ಟೆಸ್ಟ್​ಗಳನ್ನು ಆಸ್ಟ್ರೆಲಿಯಾ ನೆಲದಲ್ಲಿ ಆಡುವ ಸವಾಲು ಹೊಂದಿದೆ. ಹೀಗಾಗಿ ಅದಕ್ಕೆ ಮುನ್ನ ತವರಿನಲ್ಲಿ ಆಡಲಿರುವ ಕಿವೀಸ್​ ವಿರುದ್ಧದ 3 ಟೆಸ್ಟ್​ ಗೆದ್ದರೆ ಡಬ್ಲ್ಯುಟಿಸಿ ಫೈನಲ್​ಗೇರುವ ಭಾರತದ ಹಾದಿ ಸುಗಮವಾಗಲಿದೆ. ಭಾರತ ಸದ್ಯ ಶೇ. 74.24 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದ್ದು, ಅಗ್ರ 2ರಲ್ಲಿ ಸ್ಥಾನ ಉಳಿಸಿಕೊಳ್ಳಲು ಇನ್ನೂ 3 ಜಯ, 1 ಡ್ರಾ ಅಗತ್ಯವಿದೆ. ಕಿವೀಸ್​ ಎದುರು 3-0 ಕ್ಲೀನ್​ಸ್ವೀಪ್​ ಸಾಧಿಸಿದರೆ ಭಾರತ, ಆಸೀಸ್​ನಲ್ಲಿ ಕನಿಷ್ಠ 1 ಡ್ರಾ ಸಾಧಿಸಿದರೂ ಡಬ್ಲ್ಯುಟಿಸಿ ಫೈನಲ್​ ಸ್ಥಾನ ಖಾತ್ರಿಪಡಿಸಿಕೊಳ್ಳಬಹುದು.

*5: ರೋಹಿತ್​ ಶರ್ಮ ಇನ್ನು 5 ಸಿಕ್ಸರ್​ ಸಿಡಿಸಿದರೆ, ವೀರೇಂದ್ರ ಸೆಹ್ವಾಗ್​ರನ್ನು (91) ಹಿಂದಿಕ್ಕಿ ಟೆಸ್ಟ್​ ಕ್ರಿಕೆಟ್​ನಲ್ಲಿ ಗರಿಷ್ಠ ಸಿಕ್ಸರ್​ ಸಿಡಿಸಿದ ಭಾರತೀಯ ಎನಿಸಲಿದ್ದಾರೆ.

*ನಾವು ಬ್ಯಾಟಿಂಗ್​ನಲ್ಲಿ ಈಗಾಗಲೆ ಹಲವಾರು ಆಯ್ಕೆಗಳನ್ನು ಹೊಂದಿದ್ದೇವೆ. ಬೌಲಿಂಗ್​ನಲ್ಲೂ ನಾವು ಅದನ್ನೇ ಬಯಸಿದ್ದೇವೆ. ಯಾರಿಗಾದರೂ ಗಾಯವಾದರೂ, ಚಿಂತೆಯಾಗದಂತೆ ಬೌಲಿಂಗ್​ನಲ್ಲೂ ಬಲಿಷ್ಠ ಮೀಸಲು ಪಡೆ ಕಟ್ಟುವುದು ನಮ್ಮ ಗುರಿ.

| ರೋಹಿತ್​ ಶರ್ಮ, ಟೀಮ್​ ಇಂಡಿಯಾ ನಾಯಕ

https://www.vijayavani.net/border-gavaskar-trophy-shock-for-aussies-this-is-bad-news-for-rcb