ಆಕ್ಲೆಂಡ್: ನ್ಯೂಜಿಲೆಂಡ್ ಪ್ರವಾಸದ ಟಿ20 ಸರಣಿಯಲ್ಲಿ ಭಾರತದ ಯುವ ಆಟಗಾರರು ಭರ್ಜರಿ ನಿರ್ವಹಣೆ ತೋರಿ ಸರಣಿ ವಶಪಡಿಸಿಕೊಂಡಿದ್ದರೆ, ಏಕದಿನ ಸರಣಿಯಲ್ಲಿ ಟೀಮ್ ಇಂಡಿಯಾ ಅನುಭವಿಗಳ ಬಲದೊಂದಿಗೆ ಅಂಥದ್ದೇ ನಿರ್ವಹಣೆ ಪುನರಾವರ್ತಿಸುವ ನಿರೀಕ್ಷೆ ಇದೆ. ಮುಂದಿನ ವರ್ಷದ ವಿಶ್ವಕಪ್ ಸಿದ್ಧತೆಗೂ ನೆರವಾಗಲಿರುವ 5 ಪಂದ್ಯಗಳ ಏಕದಿನ ಸರಣಿಗೆ ವೇದಿಕೆ ಸಜ್ಜಾಗಿದ್ದು, ಅನುಭವಿ ಬ್ಯಾಟರ್ಗಳಾದ ರೋಹಿತ್ ಶರ್ಮ=ವಿರಾಟ್ ಕೊಹ್ಲಿ ಕಣಕ್ಕಿಳಿಯಲಿರುವುದರಿಂದ ಈ ಸರಣಿ ಹೆಚ್ಚಿನ ಆಕರ್ಷಣೆ ಪಡೆದುಕೊಂಡಿದೆ. ಬುಧವಾರ ಆಕ್ಲೆಂಡ್ನ ಈಡನ್ ಪಾರ್ಕ್ನಲ್ಲಿ ಸರಣಿಯ ಮೊದಲ ಪಂದ್ಯ ನಡೆಯಲಿದ್ದು, ಶುಭಮಾನ್ ಗಿಲ್ ಪಡೆ ಶುಭಾರಂಭ ಕಾಣುವ ವಿಶ್ವಾಸದಲ್ಲಿದೆ.
ಏಕದಿನ-ಟೆಸ್ಟ್ ಸರಣಿಯ ನಡುವೆ ಕೇವಲ 3 ದಿನಗಳ ಅಂತರ ಇರುವುದರಿಂದ ಉಭಯ ತಂಡಗಳು ಸರಣಿಯ ಮೊದಲ 3 ಪಂದ್ಯಗಳಲ್ಲಿ ಮಾತ್ರ ಪೂರ್ಣ ಸಾಮರ್ಥ್ಯದ ತಂಡವನ್ನು ಕಣಕ್ಕಿಳಿಸಲಿವೆ. ಕೊನೇ 2 ಪಂದ್ಯಗಳಿಗೆ ನಾಯಕ ಗಿಲ್, ಕೆಎಲ್ ರಾಹುಲ್ ಮತ್ತಿತರ ಟೆಸ್ಟ್ ಆಟಗಾರರು ಗೈರಾಗಲಿದ್ದು, ಶ್ರೇಯಸ್ ಅಯ್ಯರ್ ಭಾರತ ತಂಡವನ್ನು ಮುನ್ನಡೆಸಲಿದ್ದಾರೆ. ಅದಕ್ಕೆ ಮುನ್ನ ಗಿಲ್ 2027ರ ವಿಶ್ವಕಪ್ಗೆ ತಂಡ ಸಂಯೋಜನೆ ಬಲಪಡಿಸುವ ಪ್ರಯತ್ನ ನಡೆಸಲಿದ್ದಾರೆ. ಆತಿಥೇಯ ಕಿವೀಸ್ ಟಿ20ಯಂತೆ ಏಕದಿನದಲ್ಲೂ ಗಾಯದ ಸಮಸ್ಯೆಗಳ ನಡುವೆ ಕಣಕ್ಕಿಳಿಯುತ್ತಿದೆ.
ಆಧುನಿಕ ಕ್ರಿಕೆಟ್ ಬ್ಯಾಟಿಂಗ್ ದಿಗ್ಗಜರಾದ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮ ಅವರಿಗೆ ವೃತ್ತೀಜಿವನದ ಕೊನೇ ನ್ಯೂಜಿಲೆಂಡ್ ಪ್ರವಾಸದಲ್ಲಿ ಗೆಲುವಿನ ಕಾಣಿಕೆ ನೀಡಬೇಕಾದ ಸವಾಲು ಕೂಡ ಭಾರತ ತಂಡಕ್ಕಿದೆ.
ಬೌಲಿಂಗ್ ವಿಭಾಗದ ಕಳವಳ
ಭಾರತಕ್ಕೆ ವಿಶ್ವಕಪ್ ಸಿದ್ಧತೆಯಲ್ಲಿ ಬ್ಯಾಟಿಂಗ್ ಕ್ರಮಾಂಕದ ಬಗ್ಗೆ ಹೆಚ್ಚಿನ ಚಿಂತೆ ಇಲ್ಲ. ಆದರೆ ಬೌಲಿಂಗ್ ವಿಭಾಗವನ್ನು ಸಜ್ಜುಗೊಳಿಸಬೇಕಾದ ಅಗತ್ಯವಿದೆ. ಬುಮ್ರಾ, ಹಾರ್ದಿಕ್ ಜತೆಗೆ ಪ್ರಸಿದ್ಧಕೃಷ್ಣ ಮತ್ತು ಹರ್ಷಿತ್ ರಾಣಾ ಕೂಡ ಏಕದಿನ ಸರಣಿಯಲ್ಲಿ ಆಡುತ್ತಿಲ್ಲ. ಇದರಿಂದ ಮೊಹಮದ್ ಸಿರಾಜ್ ವೇಗದ ಬೌಲಿಂಗ್ ವಿಭಾಗದ ಜವಾಬ್ದಾರಿ ಹೊತ್ತುಕೊಳ್ಳಬೇಕಾಗಿದೆ. ತಂಡದಲ್ಲಿರುವ ಇತರ ನಾಲ್ವರು ವೇಗಿಗಳಾದ ಅರ್ಷದೀಪ್ ಸಿಂಗ್, ಗುರುನೂರ್ ಬ್ರಾರ್, ಅಂಶುಲ್ ಕಂಬೋಜ್ ಮತ್ತು ಅಕಿಬ್ ನಬಿ ಒಟ್ಟಾರೆ 29 ಏಕದಿನ ಪಂದ್ಯಗಳ ಅನುಭವವನ್ನಷ್ಟೇ ಹೊಂದಿದ್ದಾರೆ. ಇನ್ನು ಸ್ಪಿನ್ ವಿಭಾಗದಲ್ಲಿ ಕುಲದೀಪ್ ಯಾದವ್ ತಂಡದ ಹಾಲಿ ಬೌಲರ್ಗಳಲ್ಲಿ ಅತ್ಯಧಿಕ ವಿಕೆಟ್ (201) ಕಬಳಿಸಿದ ಅನುಭವಿಯಾಗಿದ್ದಾರೆ. ಆದರೆ ಟೀಮ್ ಮ್ಯಾನೇಜ್ಮೆಂಟ್ ಇತ್ತೀಚೆಗೆ ಆಲ್ರೌಂಡರ್ಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿರುವುದರಿಂದ, ಸ್ಪಿನ್ ವಿಭಾಗದ ಹೊಣೆ ಅಕ್ಷರ್&ನಮನ್ ಧೀರ್ ಹೆಗಲೇರಲಿದೆ. ಇದರಿಂದ ಕುಲದೀಪ್ ಬೆಂಚು ಕಾಯಿಸಬೇಕಾಗುತ್ತದೆ. ಟಿ20 ಸರಣಿಯಲ್ಲಿ ದುಬಾರಿಯಾಗಿದ್ದ ನಮನ್&ನಿತೀಶ್ ರೆಡ್ಡಿ ಏಕದಿನ ಸರಣಿಯ ಬೌಲಿಂಗ್ನಲ್ಲಿ ಸುಧಾರಿತ ನಿರ್ವಹಣೆ ತೋರಬೇಕಿದೆ.
ಟೀಮ್ ನ್ಯೂಸ್:
ಭಾರತ: ಇಬ್ಬರು ಪ್ರಮುಖ ಆಟಗಾರರಾದ ಜಸ್ಪ್ರೀತ್ ಬುಮ್ರಾ, ಹಾರ್ದಿಕ್ ಪಾಂಡ್ಯ ಗೈರಿನ ನಡುವೆ ಭಾರತ ಸಮತೋಲನದ ತಂಡ ಸಂಯೋಜಿಸಬೇಕಿದೆ. ಕಳೆದ ವಿಂಡೀಸ್ ವಿರುದ್ಧದ ಸರಣಿಯಲ್ಲಿ ಪದಾರ್ಪಣೆ ಮಾಡಿದ್ದ ನಮನ್ ಧೀರ್, ಹಾಲಿ ಪ್ರವಾಸದ ಟಿ20 ಸರಣಿಯ ಯಶಸ್ಸಿನ ಬಳಿಕ ಇಲ್ಲೂ ಅವಕಾಶ ಪಡೆಯಬಹುದು. ಇದರಿಂದ ತಜ್ಞ ಸ್ಪಿನ್ನರ್ ಕುಲದೀಪ್ ಯಾದವ್ ಮತ್ತೆ ಹೊರಗುಳಿಯಲಿದ್ದಾರೆ. ಕೋಚ್ ಗಂಭೀರ್ ಯೋಜನೆಯಂತೆ ಭಾರತ ಎಂದಿನಂತೆ ಮತ್ತೆ ಆಲ್ರೌಂಡರ್ಗಳಿಗೆ ಹೆಚ್ಚಿನ ಒತ್ತು ನೀಡಲಿದೆ.
ಸಂಭಾವ್ಯ ತಂಡ: ರೋಹಿತ್, ಗಿಲ್ (ನಾಯಕ), ಕೊಹ್ಲಿ, ಶ್ರೇಯಸ್, ರಾಹುಲ್ (ವಿ.ಕೀ), ನಮನ್ ಧೀರ್, ನಿತೀಶ್ ರೆಡ್ಡಿ, ಅಕ್ಷರ್, ಗುರುನೂರ್, ಸಿರಾಜ್, ಅರ್ಷದೀಪ್.
ನ್ಯೂಜಿಲೆಂಡ್: ಡೆವೊನ್ ಕಾನ್ವೇ ಪಂದ್ಯಕ್ಕೆ ಅಲಭ್ಯರಾಗಿರುವುದರಿಂದ ಟಿಮ್ ಸೈರ್ಟ್ ಏಕದಿನದಲ್ಲೂ ಇನಿಂಗ್ಸ್ ಆರಂಭಿಸುವ ಅವಕಾಶ ಪಡೆಯಲಿದ್ದಾರೆ. ಚಾಪ್ಮನ್ ಮತ್ತು ರಚಿನ್ ರವೀಂದ್ರ ಅಲಭ್ಯತೆಯ ಹಿನ್ನಡೆಯೂ ಕಿವೀಸ್ ತಂಡಕ್ಕಿದೆ.
ಸಂಭಾವ್ಯ ತಂಡ: ವಿಲ್ ಯಂಗ್, ಟಿಮ್ ಸೈರ್ಟ್, ಡೆರಿಲ್ ಮಿಚೆಲ್, ಫಿಲಿಪ್ಸ್, ಲಾಥಮ್ (ವಿ.ಕೀ), ಬ್ರೇಸ್ವೆಲ್, ಸ್ಯಾಂಟ್ನರ್ (ನಾಯಕ), ನಾಥನ್ ಸ್ಮಿತ್, ಜೇಮಿಸನ್, ಹೆನ್ರಿ/ಟಿಕ್ನರ್, ಡಫಿ.
ಏಕದಿನ ಸರಣಿ ವೇಳಾಪಟ್ಟಿ
ಪಂದ್ಯ ದಿನಾಂಕ ಸ್ಥಳ
1. ನ.4 ಆಕ್ಲೆಂಡ್
2. ನ.7 ವೆಲ್ಲಿಂಗ್ಟನ್
3. ನ. 10 ಹ್ಯಾಮಿಲ್ಟನ್
4. ನ.13 ಮೌಂಟ್ ಮೌಂಗನುಯಿ
5. ನ. 15 ಮೌಂಟ್ ಮೌಂಗನುಯಿ
ಎಲ್ಲ ಪಂದ್ಯ ಆರಂಭ: ಬೆಳಗ್ಗೆ 7.30
ನೇರಪ್ರಸಾರ: ಸೋನಿ ಸ್ಪೋರ್ಟ್ಸ್, ಸೋನಿ ಲಿವ್
5-6ರಲ್ಲಿ ಏರಿಳಿತ, ಗಿಲ್ ಸುಳಿವು
ಮುಂದಿನ ವರ್ಷದ ವಿಶ್ವಕಪ್ಗೆ ಭಾರತ ತಂಡದ ಅಗ್ರ 4 ಬ್ಯಾಟರ್ಸ್ ಫಿಕ್ಸ್ ಅಗಿದ್ದಾರೆ. 5-6ನೇ ಕ್ರಮಾಂಕದಲ್ಲಿ ಸ್ವಲ್ಪ ಏರಿಳಿತ ಇರಲಿದೆ ಮತ್ತು ಹಾರ್ದಿಕ್ ಪಾಂಡ್ಯ ಮರಳಿದ ಬಳಿಕ 7-8ನೇ ಕ್ರಮಾಂಕದ ಸಮಸ್ಯೆಯೂ ಬಗೆಹರಿಯಲಿದೆ ಎಂದು ಭಾರತ ತಂಡದ ನಾಯಕ ಶುಭಮಾನ್ ಗಿಲ್ ತಿಳಿಸಿದ್ದಾರೆ. ಅಗ್ರ 4ರಲ್ಲಿ ಬಲಗೈ ಬ್ಯಾಟರ್ಗಳೇ ಇರುವುದರಿಂದ, ಅಗತ್ಯಬಿದ್ದಾಗ 5ನೇ ಕ್ರಮಾಂಕದಲ್ಲಿ ಅಕ್ಷರ್ ಪಟೇಲ್ ಆಡಿಸುವೆವು. ಕೆಲ ಪರಿಸ್ಥಿತಿಗಳಲ್ಲಿ ಕೆಎಲ್ ರಾಹುಲ್ ಅವರೇ ಆ ಕ್ರಮಾಂಕದಲ್ಲಿ ಆಡಬಹುದು. ಹಾರ್ದಿಕ್ ಪಾಂಡ್ಯ ಗಾಯದಿಂದ ಚೇತರಿಸಿಕೊಂಡು ಮರಳಿದಾಗ ತಂಡಕ್ಕೆ ಹೆಚ್ಚಿನ ಸಮತೋಲನವೂ ಸಿಗಲಿದೆ ಎಂದು ಗಿಲ್ ವಿವರಿಸಿದ್ದಾರೆ.
*ರೋಹಿತ್-ಕೊಹ್ಲಿ ಈಗಲೂ ಉತ್ತಮವಾಗಿ ಆಡುತ್ತಿದ್ದಾರೆ. ವಿಂಡೀಸ್ ವಿರುದ್ಧದ ಕಳೆದ ಸರಣಿಯಲ್ಲಿ ಅವರ ಆಟ ಗಮನಿಸಿದ್ದೆ. ಹೀಗಾಗಿ ಅವರಿಗೆ ಬೌಲಿಂಗ್ ಮಾಡುವಾಗ ಅತ್ಯಂತ ಶಿಸ್ತುಬದ್ಧವಾಗಿರುವಂತೆ ಮತ್ತು ಕಾರ್ಯತಂತ್ರಕ್ಕೆ ತಕ್ಕಂತೆ ಬೌಲಿಂಗ್ ಮಾಡುವಂತೆ ಬೌಲರ್ಗಳಿಗೆ ಸೂಚಿಸಿರುವೆ.
| ಮಿಚೆಲ್ ಸ್ಯಾಂಟ್ನರ್, ಕಿವೀಸ್ ನಾಯಕ
ಮೊದಲ ಪಂದ್ಯಕ್ಕೆ ಕಾನ್ವೇ ಅಲಭ್ಯ
ನ್ಯೂಜಿಲೆಂಡ್ ಎಡಗೈ ಆರಂಭಿಕ ಡೆವೊನ್ ಕಾನ್ವೇ ಭಾರತ ವಿರುದ್ಧದ ಮೊದಲ ಏಕದಿನ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ. ಅಭ್ಯಾಸದ ವೇಳೆ ಸಹ-ಆಟಗಾರ ಮ್ಯಾಟ್ ಹೆನ್ರಿಗೆ ಆಕಸ್ಮಿಕ ಢಿಕ್ಕಿಯಾಗಿ ಕನ್ಕಷನ್ಗೆ ಒಳಗಾಗಿರುವ ಕಾರಣ ಅವರು ಹೊರಗುಳಿಯಲಿದ್ದು, ಕೊನೇ ಟಿ20ಯಲ್ಲಿ ಮಿಂಚಿದ ಟಿಮ್ ಸೈರ್ಟ್ ಬದಲಿಗರಾಗಿ ಆಡಲಿದ್ದಾರೆ.
ಏಕದಿನದಲ್ಲೂ ರನ್ಮಳೆ ನಿರೀಕ್ಷೆ
ಈಡನ್ ಪಾರ್ಕ್ ಮೈದಾನದ ನೇರ ಬೌಂಡರಿ ಕೇವಲ 55 ಮೀ. ದೂರವಿದೆ. ಹೀಗಾಗಿ ಇದು ಹೆಚ್ಚಿನ ರನ್ ತಂದುಕೊಡುವ ಜಾಗವಾಗಿದೆ. 4 ದಿನಗಳ ಹಿಂದಷ್ಟೇ ಇಲ್ಲಿ ನಡೆದ ಟಿ20 ಪಂದ್ಯದಲ್ಲಿ ನ್ಯೂಜಿಲೆಂಡ್, ಇದರ ಲಾಭವೆತ್ತಿ 259 ರನ್ ಕಲೆಹಾಕಿತ್ತು. ಭಾರತವೂ ಆರಂಭಿಕ ಆಘಾತದ ನಡುವೆ 172 ರನ್ ಸೇರಿಸಿತ್ತು. ಹೀಗಾಗಿ ಇದೀಗ ಏಕದಿನದಲ್ಲೂ ಅದೇ ರೀತಿ ರನ್ಪ್ರವಾಹ ಮುಂದುವರಿಯುವ ನಿರೀಕ್ಷೆ ಇದೆ.
