ಪದಕ ವಿಜೇತರಿಗೆ ನಗದು: ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಅಗ್ರ ಮೂವರು ವಿಜೇತರಿಗೆ ಚಿನ್ನ, ಬೆಳ್ಳಿ, ಕಂಚಿನ ಪದಕಗಳನ್ನಷ್ಟೇ ವಿತರಿಸಲಾಗುತ್ತದೆ. ಕೆಲವೊಮ್ಮೆ ಆತಿಥೇಯ ದೇಶಗಳು ಹೂಗುಚ್ಛಗಳನ್ನೂ ನೀಡಿ ಸತ್ಕರಿಸುತ್ತವೆ. ಇದರ ಹೊರತಾಗಿ ಸ್ಪರ್ಧಾ ವಿಜೇತರಿಗೆ ಯಾವುದೇ ನಗದುಬಹುಮಾನವನ್ನು ಸಂಘಟಕರು ನೀಡುವುದಿಲ್ಲ. ಆದರೆ ಇದೇ ಮೊದಲ ಬಾರಿಗೆ ಅಥ್ಲೆಟಿಕ್ಸ್ನಲ್ಲಿ ಎಲ್ಲ 48 ಸ್ವರ್ಣ ವಿಜೇತರಿಗೆ ತಲಾ 42 ಲಕ್ಷ ರೂಪಾಯಿ (50 ಸಾವಿರ ಡಾಲರ್) ನಗದು ಬಹುಮಾನ ಸಿಗಲಿದೆ. ಒಲಿಂಪಿಕ್ಸ್ನಿಂದ ಬರುವ ಆದಾಯದಲ್ಲಿ ತನಗೆ ಸಿಗುವ ಪಾಲಿನಲ್ಲಿ ವಿಶ್ವ ಅಥ್ಲೆಟಿಕ್ಸ್ ಸಂಸ್ಥೆ ಈ ಬಹುಮಾನವನ್ನು ವಿತರಿಸುತ್ತಿದೆ. 2028ರಿಂದ ಬೆಳ್ಳಿ, ಕಂಚು ವಿಜೇತರಿಗೂ ನಗದು ಬಹುಮಾನ ನೀಡುವುದಾಗಿ ತಿಳಿಸಿದೆ. ಇದರ ಹೊರತಾಗಿ ಕ್ರೀಡಾಪಟುಗಳಿಗೆ ಅವರ ತವರಿನ ದೇಶದ ಸರ್ಕಾರಗಳು ಬಹುಮಾನ ನೀಡುವುದು ಇದ್ದೇ ಇರುತ್ತದೆ. ಆತಿಥೇಯ ಫ್ರಾನ್ಸ್ ತನ್ನ ದೇಶದ ಸ್ವರ್ಣ ವಿಜೇತರಿಗೆ 71 ಲಕ್ಷ ರೂ. ಬಹುಮಾನ ನೀಡುವುದಾಗಿ ತಿಳಿಸಿದೆ. ಅಮೆರಿಕ ಚಿನ್ನ, ಬೆಳ್ಳಿ, ಕಂಚು ವಿಜೇತರಿಗೆ ಕ್ರಮವಾಗಿ 32, 19, 13 ಲಕ್ಷ ರೂ. ಬಹುಮಾನ ನೀಡುವುದಾಗಿ ತಿಳಿಸಿದೆ. ಇದಕ್ಕೆ ಹೋಲಿಸಿದರೆ ಭಾರತದ ಕ್ರೀಡಾಪಟುಗಳೇ ಭಾಗ್ಯವಂತರಾಗಿದ್ದು, ಪದಕ ಗೆದ್ದರೆ ಕೋಟಿ ಕೋಟಿ ಲೆಕ್ಕದಲ್ಲಿ ಬಹುಮಾನ ಗಳಿಸುವ ಅವಕಾಶ ಹೊಂದಿದ್ದಾರೆ.
