ತಾವೇ ವಿನ್ಯಾಸಗೊಳಿಸಿದ ಮಾಸ್ಕ್​ ಧರಿಸಿ ಮಿಂಚುತ್ತಿರುವ ಸಚಿನ್​, ದ್ರಾವಿಡ್​, ಗಂಗೂಲಿ... ಏಕೆ ಗೊತ್ತೇ?

ನವದೆಹಲಿ: ಕ್ರಿಕೆಟ್​ ಮೈದಾನದಲ್ಲಿ ಭರ್ಜರಿ ಬ್ಯಾಟಿಂಗ್​ ಮೂಲಕ ದಾಖಲೆಗಳ ಮೇಲೆ ದಾಖಲೆ ಬರೆದ ಸಚಿನ್​ ತೆಂಡುಲ್ಕರ್​, ಸೌರವ್​ ಗಂಗೂಲಿ ಮತ್ತು ರಾಹುಲ್​ ದ್ರಾವಿಡ್​ ಇದೀಗ ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ. ಈ ಬಾರಿ ಇವರೆಲ್ಲರೂ ಕ್ರಿಕೆಟ್​ಗಾಗಿ ಅಲ್ಲ ಬದಲಿಗೆ ಕರೊನಾ ವಿರುದ್ಧದ ಜಾಗೃತಿಗಾಗಿ ಮತ್ತೊಮ್ಮೆ ಕ್ಯಾಮರಾ ಮುಂದೆ ನಿಂತಿದ್ದಾರೆ.

ಹೌದು... ಭಾರತೀಯ ಕ್ರಿಕೆಟ್​ ನಿಯಂತ್ರಣ ಮಂಡಳಿ (ಬಿಸಿಸಿಐ) ಆರಂಭಿಸಿರುವ #TeamMaskForceನ ಭಾಗವಾಗಿ ದಿಗ್ಗಜ ಆಟಗಾರರು ಸ್ವತಃ ತಾವೇ ವಿನ್ಯಾಸಗೊಳಿಸಿರುವ ಮಾಸ್ಕ್​ಗಳನ್ನು ಧರಿಸುವ ಮೂಲಕ ಕರೊನಾ ವಿರುದ್ಧದ ಹೋರಾಟದಲ್ಲಿ ಮಾಸ್ಕ್​ ಧರಿಸುವ ಮಹತ್ವವನ್ನು ಸಾರುತ್ತಿದ್ದಾರೆ.

ಈ ಮಾಸ್ಕ್​ಗಳ ಮೇಲೆ ತಮ್ಮ ಸಾಧನೆಯನ್ನು ಸಾರುವ, ತಮ್ಮ ಹೆಸರಿನೊಂದಿಗೆ ತಳಕು ಹಾಕಿಕೊಂಡಿರುವ ಚುಟುಕುಹೆಸರುಗಳು, ಅದೃಷ್ಟ ಸಂಖ್ಯೆ ಅಥವಾ ತಮ್ಮ ಹೆಸರಿನ ಲಾಂಛನವನ್ನು ಆಟಗಾರರು ಅಳವಡಿಸಿಕೊಂಡಿರುವುದು ಮತ್ತೊಂದು ವಿಶೇಷವಾಗಿದೆ.

ಬಿಸಿಸಿಐ ಟ್ವೀಟ್​ ಮಾಡಿರುವ ವಿಡಿಯೋ ತುಣುಕಿನಲ್ಲಿ ಭಾರತದ ಪುರುಷ ಮತ್ತು ಮಹಿಳಾ ಕ್ರಿಕೆಟ್​ ತಂಡದ 10 ಸದಸ್ಯರು ಮಾಸ್ಕ್​ ಧರಿಸಿ, ಸುರಕ್ಷಿತವಾಗಿ ಇರುವಂತೆ ಜನರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ.

ವಿರಾಟ್​ ಕೊಹ್ಲಿ ತಮ್ಮ ಮಾಸ್ಕ್​ ಮೇಲೆ ವಿ ಎಂಬ ಇಂಗ್ಲಿಷ್​ ಅಕ್ಷರ ಹಾಕಿಕೊಂಡಿದ್ದರೆ, ಗಂಗೂಲಿ ದಾದಾ ಎಂದು ಬರೆದುಕೊಂಡಿದ್ದಾರೆ. ರಾಹುಲ್​ ದ್ರಾವಿಡ್​ ವಾಲ್​ ಎಂದು ಬರೆದುಕೊಂಡಿದ್ದಾರೆ.

ಟೀಂ ಇಂಡಿಯಾ ನಾಯಕ ವಿರಾಟ್​ ಕೊಹ್ಲಿ ಅವರೊಂದಿಗೆ ಆರಂಭವಾಗುವ ವಿಡಿಯೋ ತುಣುಕಿನಲ್ಲಿ ಸೌರವ್​ ಗಂಗೂಲಿ, ಭಾರತೀಯ ಮಹಿಳಾ ಕ್ರಿಕೆಟ್​ ತಂಡದ ಸೆನ್ಷೇಷನ್​ ಸ್ಮೃತಿ ಮಂದನಾ, ರೋಹಿತ್​ ಶರ್ಮ, ಹರ್ಭಜನ್​ ಸಿಂಗ್​, ಮಹಿಳಾ ಕ್ರಿಕೆಟ್​ ತಂಡದ ನಾಯಕ ಹರ್ಮನ್​ಪ್ರೀತ್​ ಕೌರ್​​, ರಾಹುಲ್​ ದ್ರಾವಿಡ್​, ವೀರೇಂದ್ರ ಸೆಹ್ವಾಗ್​, ಮಿಥಾಲಿ ರಾಜ್​ ಹಾಗೂ ನಂ.10 ಸಚಿನ್​ ತೆಂಡುಲ್ಕರ್​ ಕ್ರಮವಾಗಿ ಕಾಣಿಸಿಕೊಳ್ಳುತ್ತಾರೆ.

https://www.vijayavani.net/indian-armys-fake-soldier-behind-bars-in-chikkamagaluru/