ತಮ್ಮನ್ನು ಫೇಕ್​ ಅಂದವರಿಗೆ ಸೋನು ಕೊಟ್ಟ ಉತ್ತರವೇನು?

ಮುಂಬೈ: ಕೆಲವೇ ದಿನಗಳ ಹಿಂದಿನ ಮಾತು. ಕರೊನಾ ಮತ್ತು ಲಾಕ್​ಡೌನ್​ನಿಂದ ತೀವ್ರ ಸಂಕಷ್ಟಕ್ಕೀಡಾಗಿದ್ದ ಜನರ ಸಹಾಯಕ್ಕೆ ನಿಂತವರು ಬಾಲಿವುಡ್​ ನಟ ಸೋನು ಸೂದ್​. ಸಾವಿರಾರು ಜನರನ್ನು ತಮ್ಮ ಊರಿಗೆ ಕಳುಹಿಸಿಕೊಡುವ ಜತೆಗೆ ಅವರಿಗೆ ಅಲ್ಲಿ ಕೆಲಸ ಸಿಗುವಂತೆ ನೋಡಿಕೊಂಡವರು ಅವರು. ಅಲ್ಲಿಂದ ಸತತವಾಗಿ ಒಂದಿಲ್ಲೊಂದು ಸಹಾಯ ಮಾಡುತ್ತಲೇ ಇರುವ ಸೋನು, ನ್ಯಾಷನಲ್​ ಹೀರೋ ಆಗಿ ಬೆಳೆದರು.

ಇದನ್ನೂ ಓದಿ: ಅನರ್ಘ್ಯ ಅದಿತಿ : ‘ಆನ’ ಎಂಬ ಲೇಡಿ ಸೂಪರ್ ಹೀರೋ

ಆದರೆ, ಯಾರು ಅವರಿಗೆ ಹಿಂದೊಮ್ಮೆ ಜೈಕಾರ ಹಾಕಿದರೋ, ಈಗ ಅವರೇ ಸೋನು ವಿರುದ್ಧ ತಿರುಗಿಬಿದ್ದಿದ್ದಾರೆ. ಸೋನು ಸಹಾಯ ಮಾಡುತ್ತಿರುವುದು ಪ್ರಚಾರ ಗಿಟ್ಟಿಸಿಕೊಳ್ಳುವುದಕ್ಕೆ ಎಂದು ಟ್ರೋಲ್​ ಮಾಡುತ್ತಿದ್ದಾರೆ. ಅದಕ್ಕೆ ಕಾರಣ, ಸೋನು ಇತ್ತೀಚೆಗೆ ಮಾಡಿದ ಒಂದು ಟ್ವೀಟ್​. ಈ ಟ್ವೀಟ್​ ನೋಡಿ, ಜನ ಸೋನು ಮಾಡುತ್ತಿರುವುದು ಅಪ್ಪಟ ನಾಟಕ ಎಂದು ಕಾಲೆಳೆಯುತ್ತಿದ್ದಾರೆ.

ಇಷ್ಟಕ್ಕೂ ಆಗಿದ್ದೇನೆಂದರೆ, ಭಾನುವಾರ ಸ್ನೇಹಲ್​ ಮಿಸಲ್​ ಎನ್ನುವವರು ಒಂದು ಟ್ವೀಟ್​ ಮಾಡಿದ್ದರು. ತಮ್ಮ ಮಗನಿಗೆ ತುರ್ತಾಗಿ ಓಪನ್​ ಹಾರ್ಟ್​ ಸರ್ಜರಿ ಆಗಬೇಕಿದ್ದು, ಸಹಾಯ ಮಾಡುವಂತೆ ಕೇಳಿಕೊಂಡಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ಸೋನು, ಮರುದಿನವೇ ಆಪರೇಷನ್​ ಮಾಡಿಸುವುದಕ್ಕೆ ಎಲ್ಲಾ ವ್ಯವಸ್ಥೆ ಮಾಡುವುದಾಗಿ ಉತ್ತರ ಕೊಟ್ಟಿದ್ದರು.

ಟ್ವಿಸ್ಟ್​ ಇರುವುದೇ ಇಲ್ಲಿ. ಸ್ನೇಹಲ್​ ಅವರು ಬರೀ ಟ್ವೀಟ್​ ಮಾಡಿದ್ದರೇ ಹೊರತು. ಯಾರನ್ನೂ ಟ್ಯಾಗ್​ ಮಾಡಿರಲಿಲ್ಲ. ಆದರೆ, ಸೋನು ಮಾತ್ರ ಸ್ನೇಹಲ್​ ಅವರ ಟ್ವೀಟ್​ಗೆ ಉತ್ತರ ಕೊಟ್ಟಿದ್ದರು. ನೆಟ್ಟಿಗರಿಗೆ ಅನುಮಾನ ಬಂದಿದ್ದೇ ಆಗ. ಸೋನು ಅವರನ್ನು ಟ್ಯಾಗ್​ ಮಾಡದಿದ್ದರೂ, ಅವರು ಉತ್ತರ ಕೊಟ್ಟಿದ್ದು ಯಾಕೆ? ಅದರಲ್ಲೂ ಸ್ನೇಹಲ್​ಗೇ ಉತ್ತರ ಕೊಟ್ಟಿದ್ದು ಹೇಗೆ? ಎಂಬಂತಹ ಪ್ರಶ್ನೆಗಳನ್ನು ಎತ್ತುವುದರ ಜತೆಗೆ, ಬಹುಶಃ ಇದು ಸೋನು ಅವರ ಪ್ರಚಾರದ ತಂಡದ ತಂತ್ರವೇ ಇರಬೇಕು ಎಂದು ಅನುಮಾನ ವ್ಯಕ್ತಪಡಿಸಿದ್ದರು.

ಇದನ್ನೂ ಓದಿ: ಕರಣ್​ ಪಾರ್ಟಿಯಲ್ಲಿ ಡ್ರಗ್ಸ್​ ಬಳಕೆಯಾದ ಸಾಕ್ಷಿ ಇಲ್ಲ ಎಂದ ಫಾರೆನ್ಸಿಕ್​ ಲ್ಯಾಬ್​ …

ಇದಕ್ಕೆ ಉತ್ತರಿಸಿರುವ ಸೋನು, 'ಅಗತ್ಯವಿರುವವರು ನನ್ನನ್ನು ಹೇಗೋ ಹುಡುಕಿಕೊಂಡು ಬರುತ್ತಾರೆ ಅಥವಾ ಅಗತ್ಯವಿರುವವರಿಗೆ ನಾನು ಹೇಗೋ ತಲುಪುತ್ತೇನೆ. ಇಲ್ಲಿ ಉದ್ದೇಶವಷ್ಟೇ ಮುಖ್ಯ. ಕೆಲವರಿಗೆ ಅರ್ಥವಾಗುವುದಿಲ್ಲ. ಬೇಕಾದರೆ ನಾಳೆ ಅದೇ ರೋಗಿ ಎಸ್​ಆರ್​ಸಿಸಿ ಆಸ್ಪತ್ರೆಯಲ್ಲಿ ಇರುತ್ತಾರೆ ಮತ್ತು ಯಾರು ಬೇಕಾದರೂ ಹೋಗಿ ಸಹಾಯ ಮಾಡಬಹುದು. ನಿಮ್ಮ ಸಹಾಯದಿಂದ ಅವರು ಖುಷಿಪಡಬಹುದು' ಎಂದು ಉತ್ತರ ಕೊಟ್ಟಿದ್ದಾರೆ.

https://www.vijayavani.net/one-and-only-crazy-star-ravichandran/