ವಿಶ್ವ ಅಥ್ಲೆಟಿಕ್ಸ್​ನಲ್ಲಿ ಮೊದಲ ದಿನ ಭಾರತೀಯರಿಗೆ ನಿರಾಸೆ

ಬುಡಾಪೆಸ್ಟ್​: ರಾಷ್ಟ್ರೀಯ ದಾಖಲೆವೀರ ಅವಿನಾಶ್​ ಸಾಬ್ಲೆ ವಿಶ್ವ ಅಥ್ಲೆಟಿಕ್ಸ್​ ಚಾಂಪಿಯನ್​ಷಿಪ್​ನಲ್ಲಿ ಪುರುಷರ 3000 ಮೀ. ಸ್ಟೀಪಲ್​ಚೇಸ್​ ಸ್ಪರ್ಧೆಯಲ್ಲಿ ಫೈನಲ್​ಗೇರಲು ವಿಫಲರಾಗಿದ್ದಾರೆ. ಮೊದಲ ದಿನದ ಸ್ಪರ್ಧೆಗಳಲ್ಲಿ ಭಾರತದ ಇತರ ಅಥ್ಲೀಟ್​ಗಳೂ ನಿರಾಸೆ ಮೂಡಿಸಿದರು.

ಮಹಾರಾಷ್ಟ್ರದ 28 ವರ್ಷದ ಸೈನಿಕ ಅವಿನಾಶ್​ ಸಾಬ್ಳೆ ಕೂಟದ ಮೊದಲ ದಿನವಾದ ಶನಿವಾರ ನಡೆದ ಸ್ಪರ್ಧೆಯ ಹೀಟ್ಸ್​ನಲ್ಲಿ 7ನೇ ಸ್ಥಾನಕ್ಕೆ ತೃಪ್ತಿಪಟ್ಟರು. ಅಗ್ರ ಐವರು ಮಾತ್ರ ಫೈನಲ್​ ಪ್ರವೇಶಿಸಿದರು. ಅವಿನಾಶ್​ 8 ನಿಮಿಷ, 22.24 ಸೆಕೆಂಡ್​ಗಳಲ್ಲಿ ಸ್ಪರ್ಧೆ ಮುಗಿಸಿದರು. 2,300 ಮೀ.ವರೆಗೆ ಮುನ್ನಡೆಯಲ್ಲಿದ್ದ ಅವಿನಾಶ್​ ನಂತರ ಲಯ ಕಳೆದುಕೊಂಡರು. ಅದರಲ್ಲೂ ಕೊನೇ ಸುತ್ತಿನಲ್ಲಿ ನಿರಾಸೆ ಮೂಡಿಸಿದ ಅವರು, ತನ್ನ ರಾಷ್ಟ್ರೀಯ ದಾಖಲೆಗಿಂತ (8ನಿ, 11.20 ಸೆ) ಕಳಪೆ ನಿರ್ವಹಣೆ ತೋರಿದರು. ಕಳೆದ ವರ್ಷದ ಕೂಟದಲ್ಲಿ ಫೈನಲ್​ಗೇರಿದ್ದ ಅವಿನಾಶ್​ ಈ ಬಾರಿಯೂ ಅದನ್ನು ಪುನರಾವರ್ತಿಸುವ ನಿರೀೆ ಇತ್ತು. ಇದಕ್ಕಾಗಿ ವಿದೇಶದಲ್ಲೂ ತರಬೇತಿ ಪಡೆದಿದ್ದರು. ಆದರೆ ಫೈನಲ್​ ಸ್ಪರ್ಧೆಗೆ ಹೆಚ್ಚಿನ ಶಕ್ತಿ ಕಾಯ್ದುಕೊಳ್ಳುವ ಕಾರ್ಯತಂತ್ರದೊಂದಿಗೆ ಓಡಿದ ಅವಿನಾಶ್​ ಹೀಟ್ಸ್​ನಲ್ಲೇ ಎಡವಟ್ಟು ಮಾಡಿಕೊಂಡರು.

ದಿನದ ಮೊದಲ ಸ್ಪರ್ಧೆಯಾದ ಪುರುಷರ 20 ಕಿಲೋಮೀಟರ್​ ನಡಿಗೆ ಸ್ಪರ್ಧೆಯಲ್ಲಿ ಭಾರತದ ವಿಕಾಸ್​ ಸಿಂಗ್​ 1 ಗಂಟೆ, 21ನಿಮಿಷ 58 ಸೆಕೆಂಡ್​ಗಳಲ್ಲಿ ಸ್ಪರ್ಧೆ ಮುಗಿಸಿ 28ನೇ ಸ್ಥಾನ ಪಡೆದರು. ಪರಂಜೀತ್​ ಸಿಂಗ್​ (1 ಗಂಟೆ, 24 ನಿಮಿಷ, 02ಸೆಕೆಂಡ್​) ಮತ್ತು ಆಕಾಶ್​ದೀಪ್​ ಸಿಂಗ್​ (1 ಗಂಟೆ, 31 ನಿಮಿಷ, 12 ಸೆಕೆಂಡ್​) ಕ್ರಮವಾಗಿ 35 ಮತ್ತು 47ನೇ ಸ್ಥಾನಕ್ಕೆ ತೃಪ್ತಿಪಟ್ಟರು.

ಶೈಲಿ ಸಿಂಗ್​ಗೆ 24ನೇ ಸ್ಥಾನ

ಮಾಜಿ ಲಾಂಗ್​ ಜಂಪ್​ ತಾರೆ ಅಂಜು ಬಾಬಿ ಜಾರ್ಜ್​ ಅವರ ಶಿಷ್ಯೆಯಾಗಿರುವ ಶೈಲಿ ಸಿಂಗ್​ ಅರ್ಹತಾ ಸುತ್ತಿನಲ್ಲೇ ನಿರಾಸೆ ಅನುಭವಿಸಿ 24ನೇ ಸ್ಥಾನಕ್ಕೆ ತೃಪ್ತಿಪಟ್ಟರು. 19 ವರ್ಷದ ಶೈಲಿ ಸಿಂಗ್​ ಗರಿಷ್ಠ 6.40 ಮೀಟರ್​ ಹಾರಿ ಅರ್ಹತಾ ಸುತ್ತಿನ ಬಿ ಗುಂಪಿನ 18 ಸ್ಪರ್ಧಿಗಳಲ್ಲಿ 14ನೇ ಸ್ಥಾನ ಪಡೆದರು. 6.76 ಮೀ. ಹಾರಿರುವ ವೈಯಕ್ತಿಕ ಶ್ರೇಷ್ಠ ದಾಖಲೆ ಹೊಂದಿರುವ ಶೈಲಿ ಸಿಂಗ್​, ಮೊದಲ ಯತ್ನದಲ್ಲಿ 6.26 ಮೀ. ಹಾರಿದರೆ, ಮುಂದಿನ 2 ಯತ್ನಗಳಲ್ಲಿ 6.40 ಮೀ. ಮತ್ತು 6.30 ಮೀ. ಹಾರಿದರು. 6.80 ಮೀ. ಹಾರಿದವರು ಮತ್ತು ಅಗ್ರ 12ರಲ್ಲಿ ಸ್ಥಾನ ಪಡೆದವರು ಮಾತ್ರ ಫೈನಲ್​ಗೆ ಅರ್ಹತೆ ಪಡೆದರು.

https://www.vijayavani.net/icc-unveils-mascots-for-odi-world-cup-2023-launches-competition-for-names