ಕಾರವಾರ: ಶಿರೂರು ಗುಡ್ಡ ಕುಸಿತದ ಮಹಾ ದುರಂತದ ಸಂದರ್ಭದಲ್ಲಿ 11ರಷ್ಟು ಜನರಿದ್ದ ಲಕ್ಷ್ಮಣ ನಾಯ್ಕ ಅವರ ಚಹಾ ಅಂಗಡಿಯ ಸ್ಥಳದಲ್ಲಿ ಈಗ ಕೆಂಪು ಮಣ್ಣಿನ ಗುಡ್ಡೆ ಮಾತ್ರ ಉಳಿದಿದೆ.
ಜು.16ರಂದು ಗುಡ್ಡ ಕುಸಿದು ಚಹಾ ಅಂಗಡಿ ನಾಪತ್ತೆಯಾಗಿತ್ತು. ಅಲ್ಲಿ ದೊಡ್ಡ ಮಣ್ಣಿನ ರಾಶಿ ಬಿದ್ದಿತ್ತು. ಅಂಗಡಿಯ ಅವಶೇಷಗಳು, ಕೆಲವು ಜನರೂ ಅದೇ ಸ್ಥಳದಲ್ಲಿ ಸಿಲುಕಿರಬಹುದು ಎಂಬ ಅಂದಾಜಿನಲ್ಲಿ ಕಾರ್ಯಾಚರಣೆ ನಡೆಸಲಾಯಿತು. ಆದರೆ, ಜಿಲ್ಲಾಡಳಿತ ಹಾಗೂ ಜನರ ಕಲ್ಪನೆ ಹುಸಿಯಾಗಿದೆ. 8 ದಿನಗಳಿಂದ ಹಂತ, ಹಂತವಾಗಿ ಮಣ್ಣು ತೆರವು ಮಾಡಲಾಗಿದೆ. ಹೆದ್ದಾರಿ, ಚಹಾ ಅಂಗಡಿ ಸ್ಥಳದಲ್ಲಿದ್ದ 10 ಅಡಿಗೂ ಹೆಚ್ಚು ಎತ್ತರದ ಮಣ್ಣನ್ನು ಹೆದ್ದಾರಿಯ ಮಟ್ಟಕ್ಕೆ ತೆರವು ಮಾಡಲಾಗಿದೆ. ಅಚ್ಚರಿ ಎಂದರೆ ಒಂದೇ ಒಂದು ಅವಶೇಷವೂ ಅಲ್ಲಿ ಲಭ್ಯವಾಗಿಲ್ಲ. ಎಂಟು ದಿನಗಳ ಹಿಂದೆ ಟೀ ಸ್ಟಾಲ್ ಇದ್ದ ಇದೇ ಸ್ಥಳ ಹೌದೇ ಎಂದು ಅನುಮಾನ ಮೂಡುವಂತಿದೆ. ಗುಡ್ಡದಿಂದ ಕುಸಿದ ಮಣ್ಣು ಟ್ಯಾಂಕರ್ಗಳು ಮಾತ್ರವಲ್ಲ ಟಿ ಸ್ಟಾಲ್ ಹಾಗೂ ಅದರಲ್ಲಿದ್ದ ಜನರನ್ನೂ ಸಂಪೂರ್ಣವಾಗಿ ನದಿಗೆ ನೂಕಿರುವುದು ಈಗ ಖಚಿತವಾಗಿದೆ.
ದುರಂತ ಸಂಭವಿಸಿ 8 ದಿನ ಕಳೆದು ಹೋಗಿದೆ. ಇನ್ನೂ ಮೂವರು ಪತ್ತೆಯಾಗಬೇಕಿದೆ. ಇದರಿಂದ ಈಗ ನದಿಯ ನಡುವೆ ಇರುವ ಮಣ್ಣು ತೆಗೆಯುವ ಕಾರ್ಯಾಚರಣೆಯನ್ನು ಭಾರತೀಯ ಸೇನೆ, ಎನ್ಡಿಆರ್ಎಫ್ ಚುರುಕುಗೊಳಿಸಿದೆ. ಕೇರಳದಿಂದ ಆಗಮಿಸಿದ 20 ಜನರ ತಂಡವೂ ಕಾರ್ಯಾಚರಣೆ ಕೈಗೊಂಡಿದೆ.
