ಹಾಲಿ ವಿಶ್ವ ನಂ. 1 ಟೆನಿಸ್​ ಆಟಗಾರನ ಕ್ರಷ್​ ಈ ಮಾಜಿ ನಂ. 1 ಆಟಗಾರ್ತಿ!

ಟೊರಾಂಟೊ: ಇತ್ತೀಚೆಗೆ ವಿಂಬಲ್ಡನ್​ ಪ್ರಶಸ್ತಿ ಗೆದ್ದು ಟೆನಿಸ್​ ಜಗತ್ತಿನಲ್ಲಿ ಹೊಸ ಸಂಚಲನ ಸೃಷ್ಟಿಸಿರುವ ವಿಶ್ವ ನಂ. 1 ಆಟಗಾರ ಸ್ಪೇನ್​ನ ಕಾಲೋಸ್​ ಅಲ್ಕರಾಜ್​ ಅವರಿಗೆ ಇತ್ತೀಚೆಗೆ ಅದಕ್ಕಿಂತಲೂ ಸಂಭ್ರಮದ ಕ್ಷಣ ಎದುರಾಗಿತ್ತು. ಅದು ಅವರ 'ಕ್ರಷ್​' ಅನ್ನು ಭೇಟಿಯಾದ ಕ್ಷಣವಾಗಿತ್ತು!

ಹೌದು, 20 ವರ್ಷದ ಅಲ್ಕರಾಜ್​ ಕಳೆದ ಬುಧವಾರ ಟೊರಾಂಟೊದಲ್ಲಿ ಮಾಜಿ ವಿಶ್ವ ನಂ. 1 ಆಟಗಾರ್ತಿ ಆಗಿರುವ ರಷ್ಯಾದ ಮರಿಯಾ ಶರಪೋವಾರನ್ನು ಭೇಟಿಯಾದರು. ಈ ವೇಳೆ ಶರಪೋವಾ ತನ್ನ ಕ್ರಷ್​ ಎಂದು ಹೇಳಿ ಅಲ್ಕರಾಜ್​ ಸಂಭ್ರಮಿಸಿದ್ದಾರೆ.

"ನಾನು ಟೆನಿಸ್​ ಆಡಲು ಆರಂಭಿಸಿದ ದಿನದಿಂದಲೂ ಶರಪೋವಾ ನನ್ನ ಕ್ರಷ್​. ಆಕೆಯನ್ನು ಭೇಟಿಯಾಗಿದ್ದು ನನಗೆ ಅಪಾರ ಸಂತಸ ತಂದಿದೆ. ಆಕೆ ಅತ್ಯಂತ ಚಾರ್ಮಿಂಗ್​. ವಿಂಬಲ್ಡನ್​ ಪ್ರಶಸ್ತಿ ಗೆದ್ದಿರುವುದಕ್ಕೆ ನನ್ನನ್ನು ಅಭಿನಂದಿಸಿದರು' ಎಂದು ಅಲ್ಕರಾಜ್​ ಹೇಳಿದ್ದಾರೆ. 36 ವರ್ಷದ ಶರಪೋವಾ 2004ರಲ್ಲಿ 17ನೇ ವಯಸ್ಸಿನಲ್ಲೇ ವಿಂಬಲ್ಡನ್​ ಪ್ರಶಸ್ತಿ ಗೆದ್ದಿದ್ದರು. ಬಳಿಕ 18ನೇ ವಯಸ್ಸಿನಲ್ಲಿ ವಿಶ್ವ ನಂ. 1 ಪಟ್ಟಕ್ಕೇರಿದ್ದರು. ಎಲ್ಲ 4 ಗ್ರಾಂಡ್​ ಸ್ಲಾಂ ಪ್ರಶಸ್ತಿ ಗೆದ್ದ ಅಪರೂಪದ ಸಾಧಕಿಯಲ್ಲಿ ಒಬ್ಬರಾಗಿದ್ದಾರೆ.

ಮುಂಬರುವ ಯುಎಸ್​ ಓಪನ್​ ಗ್ರಾಂಡ್​ ಸ್ಲಾಂನಲ್ಲಿ ಅಲ್ಕರಾಜ್​ ಹಾಲಿ ಚಾಂಪಿಯನ್​ ಆಗಿ ಕಣಕ್ಕಿಳಿಯಲಿದ್ದಾರೆ. ಅವರಿಲ್ಲಿ ಕಳೆದ ವರ್ಷ ಪ್ರಶಸ್ತಿ ಗೆದ್ದು ಇತಿಹಾಸ ನಿರ್ಮಿಸಿದ್ದರು. ವಿಂಬಲ್ಡನ್​ ಗೆಲುವಿನ ಬಳಿಕ ಕೆನಡ ಓಪನ್​ ಮೂಲಕ ಅವರು ಮರಳಿ ಕಣಕ್ಕಿಳಿಯುತ್ತಿದ್ದಾರೆ.

https://www.vijayavani.net/lose-even-to-kenya-but-not-to-pakistan-anil-kumble