ತ್ರಾಸಿ ಜಂಕ್ಷನ್ ಬಳಿಯಿಂದ ಅಂಡರ್ಪಾಸ್ವರೆಗೆ, ತ್ರಾಸಿ ಜಂಕ್ಷನ್ನಿಂದ ತ್ರಾಸಿ ಕಡಲ ತೀರದ ಪಾರ್ಕ್ ತನಕ ಎರಡೂ ಬದಿಯಲ್ಲಿ ಮಳೆ ನೀರು ಹರಿದು ಹೋಗಲು ಸರಿಯಾದ ಚರಂಡಿ ವ್ಯವಸ್ಥೆ ಇಲ್ಲ. ಇದರಿಂದಾಗಿ ಬೈಂದೂರು ಭಾಗದಿಂದ ಬರುವಾಗ ಹೆದ್ದಾರಿಯ ಇಕ್ಕೆಲಗಳಲ್ಲಿ ನೆಲೆಸಿರುವ ಹತ್ತಾರು ಮನೆಗಳಿಗೆ, ಅಂಗಡಿ, ಹೋಟೆಲ್ ಉದ್ಯಮ ನಡೆಸುತ್ತಿರುವವರಿಗೆ ಪ್ರತಿ ವರ್ಷ ಮಳೆ ನೀರು ನುಗ್ಗಿ ನರಕ ಯಾತನೆ ಅನುಭವಿಸುವಂತಾಗಿದೆ. ತ್ರಾಸಿ ಜಂಕ್ಷನ್ನಿಂದ ಪೊಲೀಸ್ ನಿಲ್ದಾಣದ ಎದುರಿಗಿರುವ ಅಂಡರ್ಪಾಸ್ವರೆಗೆ, ತ್ರಾಸಿ ಜಂಕ್ಷನ್ನಿಂದ ತ್ರಾಸಿ ಕಡಲ ತೀರದ ಪಾರ್ಕ್ ತನಕ ಎರಡೂ ಕಡೆಯಿಂದ ಸರ್ವಿಸ್ ರಸ್ತೆ ನಿರ್ಮಿಸಿ ಕೊಡಬೇಕಿದೆ. ಆದರೆ ಇಲ್ಲಿ ಅಂಡರ್ಪಾಸ್ ಬಳಿಯಿಂದ ಅಣ್ಣಪ್ಪಯ್ಯ ಸಭಾಭವನದವರೆಗೆ ಸರ್ವಿಸ್ ರಸ್ತೆ ಆಗಿದೆ. ಅಲ್ಲಿಂದ ಮುಂದಕ್ಕೆ ಎರಡೂ ಕಡೆಯಿಂದಲೂ ಸರ್ವಿಸ್ ರಸ್ತೆ ಆಗಿಲ್ಲ. ಇಲ್ಲಿನ ಪರಿಸರದಲ್ಲಿ 3-4 ಸಭಾಭವನಗಳಿದ್ದು, ತ್ರಾಸಿ ಕಡಲ ತೀರದ ತನಕ ಸರ್ವಿಸ್ ರಸ್ತೆಯಾದರೆ ತ್ರಾಸಿಯಿಂದ ಬರುವವರಿಗೆ ಅನುಕೂಲವಾಗಲಿದೆ.
