ಪದ್ಮಶ್ರೀ ವಿಜೇತರಾದವರಿಗೆ ಇತರ ರಾಜ್ಯಗಳಲ್ಲಿ ಲಕ್ಷಾಂತರ ರೂ. ಬಹುಮಾನ ಪ್ರಕಟಿಸುವುದರ ಜತೆಗೆ ಮಾಸಿಕ ಪಿಂಚಣಿ ಘೋಷಿಸುತ್ತಿದ್ದಾರೆ. ಆದರೆ ಕೇರಳ ಸರ್ಕಾರ ಪದ್ಮಶ್ರೀ ವಿಜೇತರನ್ನು ಸನ್ಮಾನಿಸಲು ಮುಂದಾಗದಿರುವುದು ವಿಷಾದನೀಯ. ಸತ್ಯನಾರಾಯಣ ಬೆಳೇರಿ ಅವರನ್ನು ವಿವಿಧ ಸಾರ್ವಜನಿಕ ಕಾರ್ಯಕ್ರಮಗಳಿಗೆ ಆಹ್ವಾನಿಸುತ್ತಿದ್ದರೂ ಯಾತ್ರಾ ಭತ್ಯೆ ನೀಡದೆ ಕಳುಹಿಸಿಕೊಡಲಾಗುತ್ತಿದೆ. ಬಹುತೇಕ ಕೃಷಿ ಇಲಾಖೆಯ ಕಾರ್ಯಕ್ರಮಗಳಿಗೆ ಪದ್ಮಶ್ರೀ ವಿಜೇತರನ್ನು ಆಹ್ವಾನಿಸಲಾಗುತ್ತದೆ. ಪತ್ನಿ, ಮೂವರು ಮಕ್ಕಳೊಂದಿಗೆ ತರವಾಡು ಮನೆಯಲ್ಲಿ ಜೀವನ ಸಾಗಿಸುತ್ತಿರುವ ಸತ್ಯನಾರಾಯಣ ಅವರಿಗೆ ಸ್ವಂತ ಮನೆಯ ಕನಸು ಇನ್ನೂ ನನಸಾಗಿಲ್ಲ. ಕೃಷಿಯೊಂದಿಗೆ ಕಲೆ, ಸಾಹಿತ್ಯ ಮೈಗೂಡಿಸಿಕೊಂಡು ಕೃಷಿಯೇತರ ಕೆಲಸಗಳಲ್ಲೂ ತಮ್ಮನ್ನು ತೊಡಗಿಸಿಕೊಳ್ಳುತ್ತಿದ್ದಾರೆ.
